Македонија
(Видео) Стоилковски: Со 40 милиони евра, наместо за лиценци, за три години ќе изградеа нова клиничка болница

СДС и ДУИ даваат 40 милиони евра во три години за лиценци за администрација. Во 2020 година рекордни 15 милиони евра, сега е срушен рекордот од 26 милиони долари, како аманет од Рашковски. Пари на една фирма, фаворизирана од Драги Рашковски, сега од екипата на Димитар Ковачевски, истакна на денешната прес-конференција Наум Стоилковски од ВМРО-ДПМНЕ.
„40 милиони евра за лиценци, додека системот КАТО на Онкологија е исклучен. 40 милиони евра за една фирма, додека луѓе умираа за ‘трикафта’, а телефонски се собираат донации за лекување. 40 милиони евра за лиценци во истите три години додека нема учебници, 40 милиони евра за лиценци, а нема за плати, за пензии, за земјоделците. За споредба, со 40 милиони евра во три години можеше да се изгради цела нова клиничка болница. Лиценците на Владата чинат повеќе од цела клиничка болница во Штип“, истакна Стоилковски.
Владата, дополнува тој, мора да одговори зошто, по само три години, со истата фирма избрана за 15 милиони евра сега прави договор на 25 милиони евра.
Според него, расипништвото на СДС нема граници.
„Договорот за лиценци за безмалку 25 милиони евра, по оние 15 милиони евра пред три години, е потпишан на 1 септември кога без учебници тргна школска година, а во јавноста избувна грозоморниот скандал на Онкологија“, истакнува Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нов напад врз социјален работник во Скопје – фрлани предмети кон вработените, искршен и инвентарот

Тетовец во текот на вчерашниот ден физички нападнал вработен во Меѓуопштинскиот центар за социјални работи во Скопје.
Нападнатиот е 41-годишен социјален работник, кој бил на своето работно место.
Тетовецот кој упаднал во установата оштетил и дел од инвентарот, фрлал тврди предмети и им се заканувал и на другите вработени.
Од МВР велат дека преземаат мерки за расчистување на случајот.
Она што загрижува е што ова се случува по само еден месец откако беше застрелана социјална работничка во Прилеп, што предизвика протести ширум земјата. Зад овој напад стоеше 50 годишен маж, кој претходно побегнал од Психијатриската болница во Демир Хисар. Социјалната работничка беше префрлена во прилепската болница со прострелна рана, но надвор од животна опасност. Напаѓачот за кој подоцна се дозна дека подолго време ја демнел жртвата, беше приведен.
Социјалните работници кои долго алармираат дека се незаштитени, по овој настан излегоа на протести, барајќи нападот врз нив да се третира како напад врз службено лице, да имаат физичко обезбедување, психосоцијална поддршка, подобри услови за работа и построги санкции за насилниците.
На овие протести беше истакнато дека вработените во Центрите за социјална работа секојдневно се соочуваат со закани, вербални и физички напади додека ја вршат својата должност, а недостатокот на безбедносни мерки во институциите каде што работат сериозно го загрозува не само нивното физичко и менталното здравје, туку и квалитетот на услугите што ги обезбедуват.
Македонија
Испитувањето на оштетените од пожарот во „Пулс“ треба да почне на почетокот на мај

Испитувањето на оштетените од пожарот во „Пулс“ во Кочани се предвидува да почне од почетокот на мај.
Од Обвинителството појаснија дека во зависност од здравствената состојба на повредените, a според однапред утврден распоред, навремено ќе ги известат за остварување на нивните права и за вклучување во постапката со нивно испитување.
Во моментот се прибавуваат и сите контактни и адресни податоци за оштетените од пожарот и семејствата на настраданите, како и за нивните полномошници во постапката.
Се додава дека обвинителскиот тим кој постапува во предметот интензивно презема итни дејствија кои не трпат одлагање. Се вршат сослушувања и координација на вештачењата неопходни за обезбедување докази за кривичната постапка.
Македонија
Кривична за тројца полицајци од Кочани поради злоупотреба на службената положба, а во врска со дискотеката „Пулс“

Полицијата поднесе кривична пријава против тројца полициски службеници со иницијали К.Б., Г.Л. и А.Т. поради злоупотреба на службената положба, а во врска со дискотеката „Пулс“ во Кочани.
Од МВР велат дека првопријавениот К.Б., како помлад инспектор-водич на безбедносен реон во Полициската станица Кочани на 7 октомври пред две години, и второпријавениот Г.Л. како инспектор за прифат-сменоводител во Полициската станица Кочани на 25 ноември истата година, по спроведена акциска контрола во кабарето „Пулс“ Кочани изготвиле записник за сторен прекршок и прекршочен платен налог на неактивно правно лице ДПТУ Класик ДМ ДОО Кочани и на одговорно лице Д.Ј., иако знаеле дека на 15 февруари 2023 во Централниот регистар фирмата била регистрирана како Друштво за производство, трговија, услуги и угостителство ДПТУУ ММММ Кафе ДООЕЛ Кочани, подружница кабаре „Пулс“ со одговорно лице М.С., со што овозможиле имотна корист за правното лице ДПТУУ ММММ Кафе ДООЕЛ Кочани и одговорното лице Митко Стојанов.
Третопријавениот А.Т., во време на извршување на кривичното дело на работно место командир на Полициската станица Кочани, во два наврати на 01.02.2024 и на 07.02.2024 одобрил и потпишал барање за поведување прекршочна постапка за констатиран прекршок по член 21 од Законот за прекршоците против јавниот ред и мир против неактивен правен субјект ДПТУ Класик ДМ ДООЕЛ Кочани и одговорно лице Д.Ј. и ги доставил до Основен суд Кочани – Одделение за прекршоци, претходно констатирани од првопријавениот на 07.10.2023 и од второпријавениот на 25.11.2023, иако знаел дека на 15.02.2023 во Централниот регистар правното лице е регистрирано како Друштво за производство, трговија, услуги и угостителство ДПТУУ ММММ Кафе ДООЕЛ Кочани – подружница кабаре „Пулс“ со одговорно лице М.С..