Македонија
(Видео) Стоилковски: Јавен интерес е одговорот дали веќе е склучен договор Македонија да е партнер со Бугаринот Васил Божков, притворен мафијаш, коцкарски могул

„Сè уште молчат Владата и Артан Груби, молчи и директорот на Државната лотарија, Перпарим Бајрами, шефот на кабинетот на Груби, всушност, за скандалот, можноста Македонија да биде 15 години партнер со најголемиот бугарски мафијаш, притворен, човек со докази за контакти со Пригожин, човекот на Путин според бугарскиот обвинител, партнер, Македонија да ја направат партнер со човек од црната листа на САД заради криминал, корупција, подмитување министри и функционери за да му минуваат законите за коцкање во Бугарија!“, рече Наум Стоилковски, портпарол на ВМРО-ДПМНЕ.
„Ај што молчи Груби, ај што молчат ДУИ и Владата, молчат и институции, како ЈО.
Фактите се следни:
По две години неуспешни обиди да го сменат законот за игри на среќа, Груби со владин потпис ѝ одобрува на Државната лотарија, каде што директорот е негов личен шеф на кабинетот, човек од доверба, за три нови лиценци на фирми за коцкање, фирми во ортаклак со Македонија.
Лотарија на Македонија објавува оглас на 11 септември со важење до 23 октомври! И во тој оглас се прави фоторобот на посакуваната коцкарница – да е странска, присутна на Балканот, да работи 8 години, да направила огромен капитал од онлајн-коцкање. Сè на сè, убаво стокмен оглас.
Според овој оглас, се упатува на бугарскиот коцкарски могул Васил Божков-Черепот.
Тој и дури 58 негови фирми поврзани со него од 2021 година се на црната листа на САД. Како најпознати коцкарници на интернет се 7777.бг, односно 8888.бг, и од 2021 година одат во рацете на друг, се верува близок на Божков, според пишувањето на бугарските медиуми, кој избега во Дубаи. Ова е информација од декември 2021 година, додека сега годинава, летово кога се враќа назад и е во притвор во Бугарија, тој ги презема повторно фирмите, ова е информација 9 август 2023 година, веројатно по системот на Ковачевски и Заев, чувари на фотелји.
Лотаријата и институциите мора да одговорат, од јавен интерес е дали веќе е склучен договор со фирма што е поврзана со Васил Божков, познат како Черепот во Бугарија?
Дали притисокот на Артан Груби и ДУИ за Законот за игри на среќа, да се промени Законот за игри на среќа, ваквите зафати со владин потпис на Артан Груби, дали зад нивната огромна заинтересираност за него постои и можност за огромна корупција, однапред договорен влез на фирмата, легализирано со можеби формален оглас сега од Лотарија на Македонија?
Македонија тоне во сиромаштија, а Владата ја интересираат само закони за марихуана и закони за коцкање и закон зад кој лежи огромен потенцијал за криминал и корупција! Само избори се спасот!“, изјави Наум Стоилковски, портпарол на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.