Македонија
(ВИДЕО) Студија за Водно – експанзија на населбите главна закана за планината

Обемната студија во која се вброени сите аспекти за валоризација на заштитеното подрачје парк-шума „Водно“ денеска беше презентирана во големата сала на Град Скопје. Меѓу многубројните податоци во оваа студија за природните, социо-економските и остатнатите вредности на Водно обработени се и заканите, односно дадено е резиме на главните фактори за уништување со кои се соочува ова подрачје. Тука се посочени експанзија на населбите, пробивање на патиштата, изградбата на предаватели и антени, заканите од ерозија, пожарите, губењето на хабитатите и др.
„Како резултат на истражувањата може да се заклучи дека досегашното управување на заштитеното подрачје парк-шума Водно, од аспект на законските надлежности и преземени активности, не придонесе во доволна мера кон неговото соодветно интегрирано управување, односно не ги даде потребните ефекти, со оглед на што се јави несоодветно користење на земјиштето и неконтролирана урбанизација, пренамена на зелените површини на Водно во градежно земјиште и др. поради што се препорачува формирање на посебно Јавно претпријатие за управување со заштитени подрачја на територија на Град Скопје“, пишува во студијата.
Според градоначалникот на Скопје, Петре Шилегов, градежните работи на коридорот за изградба на гасоводот што минува низ Водно се готови во 90 проценти, а исечени се 100 проценти од предвидената шума. Шилегов најави и подготовка на нова студија која ќе се однесува на изградба на оплеменување на Водно со спортско-рекреативни реквизити.
„Оваа студија која е прв ваков обемен и стратешки документ за Водно ни доаѓа токму кога коридорот за изградба на гасоводот што минува низ Водно е речиси готов. По долгите полемики лани, кога беа сослушани сите страни и експерти за изградбата, а се направи промена на трасата, проектот успешно се движи кон крајот. Сигурен сум дека не е направена штета врз природните богатства на Водно, а граѓаните ќе имаат бенефит од гасоводот. Откако е завршена оваа студија за валоризација на заштитеното подрачје Водно, подготвуваме нова за оплеменување на планината со спортско-рекреативни реквизити“, рече Шилегов.
Проектот за валоризација на Водно е финансиран од Еврoпската Унија, преку ИПА 2 – Секторската оперативна програма за животна средина и климатска акција 2014-2020. Таа се спроведува од страна на Програмата за развој на Обединетите нации во соработка со Министерството за животна средина и просторно планирање.
Предмет на оваа студија била ревизија на постојната Студија за валоризација на природните вредности на парк-шумата Водно од 2009 година.
„Со оглед дека во 2012 година од страна на МЖСПП беше донесен нов Правилник за содржината на студијата за валоризација или ревалоризација на заштитено подрачје, извршено е нејзино ревидирање, односно пополнување со нови содржини согласно правилникот. Во оваа студија се дополнети геолошко-геоморфолошките и хидролошките информации за предметното подрачје, детално се обработени флористичките и фаунистичките карактеристики на подрачјето, како и хабитатите, фитоценозите и пределските типови. Во делот на социо-економските карактеристики обработени се населението и населбите, користењето на земјиштетео, постојната инфраструктура, како и стопанските дејности на подрачјето. Главен акцент е даден на идентификацијата и валоризацијата на важните екосистеми и живеалишта, како и на поедините видови растенија, габи и животни и нивната застапеност на меѓународните листи за заштита на биодиверзитетот. Истите се класифицирани според Светската црвена листа на IUCN, Европската црвена листа, Националните црвени листи, листите на видови на меѓународните договори од областа на заштитата на природата ратификувани од страна на Република Македонија…“, пишува во студијата.
Во градителското наследство на парк-шумата Водно вонредно важни се сакралните објекти лоцирани во неговите граници, како што е манастирот Св. Пантелејмон, џамиите во селата Крушопек и Грчец. Црква Св. Пантелејмон – Нерези.
„Според добиените податоци од Агенцијата за катастар на недвижности, од 39,4 km2 или 3943.3 хектари во предложената граница-опфат, 25,83 km2 или 65,23% е државно земјиште, а 13,76 km2 или 34.77% е приватно земјиште. Овие податоци треба да се земат со одредена резерва, со оглед на тоа што мал дел од земјиштето, според катастарската евиденција има непознат сопственик или е ‘неизложено’. Како и да е, во структурата јасно доминира државното земјиште, особено во повисоките делови над 700 m надморска
височина.“
Од увидот во ГИС-системот на Министерството за економина, на подрачјето на парк-шумата Водно не се водат постапки и не се дадени концесии за детални геолошки истражувања, како и експлоатација на минерални суровини. Од страна на Агенцијата за електронски комуникации која издава одобренија за користење на радиофреквенции на правни и физички лица на подрачјето на парк-шумата Водно се доделени повеќе одобренија, и истите се поставени во регистарот на издадени одобренија, кој го води агенцијата, така што за ова подрачје издадени се вкупно 116 концесии, пишува во студијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Чад се шири од неколку места во подножјето на Скопска Црна Гора, Ангелов смирува: Нема опасност за куќите во Чучер
Големи облаци чад се шират од неколку места во подножјето на Скопска Црна Гора. Забележливи се и од градските улици во Скопје, но сосема јасно се гледа каде чади од скопската обиколница, посебно од делот кај Волково.
Освен пожарот кој избувна синоќа над магистралниот пат кон Блаце во близина на Скопје, чад се крева од повисоки делови.
Директорот на Дирекцијата за заштита и спасување (ДЗС), Стојаче Ангелов, попладневно од Чучер-Сандево испрати видеопорака во која вели дека нема опасност за куќите.
„Се наоѓаме веднаш над селото Чучер кое што е делумно загрозено од пожарот што избувна вчера во попладневните часови, но во овој момент, од она што можам да го видам нема реална опасност по околните куќи иако има неколку куќи кои се буквално во шума. Благодарение на храбрите локални жители и благодарение на две екипи на скопската Бригада за противпожарна заштита и една екипа на Национални шуми, во овој момент нема опасност за селото и нема потреба за ширење паника. Паниката не ни помага“, рече директорот Англеов.
Тој се заблагодари на локалното население кое активно се вклучило во гасењето на пожарот покрај пожарникарите. Кажа дека манастирот Св. Никита, за кој на социјалните медиуми се ширеа вести дека е загрозен, е далеку од огнот. Ангелов вели дека дури и да почне да се шири огнот натака, ќе му требаат неколку часа за да стигне до манастирот, а на терен има и пожарникари и локално население.
„Пред малку беше ужасно, сега моментално е малку смирено. Моментално нема опасност за селото. Опасно беше над манастирот и во регионот каде што се викендиците“, вели локалецот Љубиша Стојковски кој го гаснел пожарот.
Додека тие зборуваа се слушнаа неколку експлозии за кои Стојковски објасни дека доаѓаат од сртот на планината каде што е забрането да одат луѓе.
Се уште се шири и пожарот кај Блаце кој избувна вчера, а попладнево Министерството за внатрешни работи целосно го сопре сообраќајот во делот Стенковец – граничен премин Блаце и го затвори граничниот премин.
Македонија
Сиљановска-Давкова на средба со независни советници: реафирмирана потребата од постигнување широк консензус за измените на Изборниот законик

Независните советници сметаат дека со актуелните измени на Изборниот законик коишто предвидуваат обврска за собирање повеќе од 1% потписи од електоратот за поднесување независни кандидатски листи во некои општини, се доведуваат во нерамноправна положба во изборниот процес.
За нив, горенаведените измени се противуставни како од процедурален заради скратената постапка, така и од материјален аспект заради дискриминацијата.
Тие очекуваат од пратениците законско решение што ќе води сметка за уставно загарантираната еднаквост на пасивното и активното избирачко право на секој граѓанин, поттикнување на политичкиот плурализам и овозможување фер и демократски избори.
Претседателката ја реафирмираше потребата од инклузивна постапка во функција на постигнување широк консензус за измените на Изборниот законик, почитување на меѓународните изборни принципи, правила и добри практики, како и водење сметка за одлуките на Уставниот суд.
Македонија
Поради пожар, целосно прекинат сообраќајот кон граничниот премин Блаце

Министерството за внатрешни работи известува дека поради ширењето на пожарот во близина на Блаце, целосно е прекинат сообраќајот на патниот правец Стенковец-ГП Блаце, во двата правци, а затворен е и граничниот премин Блаце.
„Министерството за внатрешни работи во координација со другите надлежни институции презема мерки за гасење на пожарот“.
Апелираат до граѓаните да не тргнуваат кон ГП Блаце до гасењето на пожарот и нормализирање на сообраќајот, за што соодветно ќе ја информираат јавноста.