Денеска, на 62-та седница на Град Скопје, се обрати и советникот Стефан Кирков од редовите на ВМРО-ДПМНЕ кој се осврна на проблемот во Скопје со бездомната популација на кучиња. Тој напомена дека го посетил ЈП Лајка и имал прилика да разговара со вработените кои иако работеле таму повеќе од три години, сепак немаат постојано вработување. Кирков додаде дека проблемот со бездомните кучиња ќе биде решен со нова програма, меѓутоа поднесе молба до сите советници во Град Скопје, да се изгласаат 6 вработувања, бидејќи ова се луѓе кои заслужуваат, затоа што не секој може да ја работи оваа работа, освен оние кои навистина ги сакаат животните.

Кирков посочи дека не може да остане имун кога во прашање се бездомните кучиња на територија на главниот град. Тој го нарече овој проблем рак-рана, проблем кој е децениски и додаде дека политиката не треба да биде дел кога станува збор за животните.

„Сакам да ги известам целата јавност и советниците дека пред неколку недели заедно со мојот колега од Советот, господинот Тони Бојковски, бевме во посета на ова јавно претпријатие. Разговараме и со директорката која можам да кажам дека не прими одлично, не запозна со целокупната работа на претпријатието, со сите проблеми со кои се соочува ова претпријатие“, изјави Кирков.

Кирков објасни дека разговарал и со вработените кои за жал, иако се вработени таму повеќе од 3 години, сепак немаат постојано вработување.

„Ова се истите тие вработени кои сега доаѓаат во оваа програма за вработување до крајот на годината. Се работи се одржувачи на претпријатието, за чувари, за ветеринарни техничари и слично. Сакам како човек кој е директно поврзан со животните и ја следи оваа проблематика да ве запознаам дека оваа работа е навистина комплексна. Не може секој да ја работи оваа работа и навистина треба да си ја сакате работата и да си ги сакате животните за да го работите ова“, додаде Кирков.

Кирков истакна дека смета дека овие вработени треба да добијат шанса за вработување и да бидат задржани во стационарот. Тој предложи до советниците од Град Скопје да се изгласаат 6 вработувања кои се бараат во моментов, и кажа дека ги уверува сите скопјани дека ова претпријатие во моментов ќе биде проширено, а и дека во многу краток период ќе биде решен проблемот со бездомните кучиња.

„Програмата со која работи ЈП Лајка е погрешна и треба да се дополни со тоа што се покажа во изминативе години дека не ги оправда очекувањата на скопјани или пак многу споро го решава проблемот со бездомните кучиња. Метрополата е преплавена има преку 10-тина илјади кучиња на територија на Град Скопје. Ајде да почнеме од некаде да го решаваме проблемот, многу набрзо од сега верувам дека ќе имаме нова програма, нов градоначалник ново раководство, но да дадеме шанса на овие вработени да си ги задржиме затоа што е реткост“, заклучи Кирков.

Министерот за економија и труд Бесар Дурмиши денеска на јавна расправа која се одржа во Собранието го образложи Законот за работно ангажирање на лица.

Тој рече дека Министерството за економија и труд активно работи на мерки за намалување на сивата економија и обезбедување на социјална заштита за работниците, а во таа насока е и предлог Законот за работно ангажирање на лица.

Една од целите на овој закон, рече Дурмиши, е да се спречи иселувањето на младите како и да им се даде на македонските компании легален однос да ангажираат работници.

Со овој закон, како што образложи министерот, се овозможува поедноставена постапка за работно ангажирање на лица за повремени и сезонски работи во одредени дејности.

Со законот би се дозволило да се ангажираат лица со старосна пензија, како и редовни студенти, без притоа тие да ги изгубат другите бенефиции, како што се корисниците на социјалната и детската заштита, евидентирани невработени лица (право на паричен надомест и не се бришат од евиденција на невработени), корисник на старосна и семејна пензија, корисник на право на социјална сигурност, статусот на редовен студент.

Овој закон, додава министерот, помага во борбата против неформалната „сива“ економија, преку формализирање на непријавената работа и е дел од стратешките определби на државата за стимулирање и поддршка на формализацијата на неформалните економски активности преку воспоставување систем на превентивни и стимулативни мерки за поддршка.

Работното ангажирање во поедноставена постапка ќе се врши со пријава на лицето преку регистарот за евиденција на работно ангажирање на Агенцијата за вработување на Република Македонија, додека наплатата на даноците и придонесите ќе се врши преку надградба на системот за наплата на даноците и придонесите на Управата за јавни приходи.

Министерот за здравство, Арбен Таравари, на денешната прес-конференција информираше дека успешно е извршена трансплантација на црн дроб и бубрези, земени се и материјали за коскени ткива.

Тој им се заблагодари на сите здравствени работници кои, и покрај бројните предизвици, продолжуваат да постигнуваат резултати.

-Благодарност на семејствата, кои во најтешките моменти на загуба, покажуваат големина и хуманизам, благодарение на што се спасуваат човечки животи, а се подобрува и квалитетот на живот на пациентите. Огромна благодарност и за сите здравствени работници, вклучени во овој процес кој траеше речиси 48 часа, посочи министерот Таравари на денешната прес-конференција, заедно со директорот на ФЗО, Сашо Клековски, директорот на Дигестивна клиника, проф. д-р Огнен Костовски, проф. д-р Билјана Кузмановска, национален координатор за трансплантација, деканот на Медицински факултет, проф. д-р Светозар Антовиќ, како и доктори од тимовите за трансплантација.

Директорот на Клиниката за дигестивна хирургија, проф. д-р Огнен Костовски, информираше дека на Клиниката за дигестивна хирургија на 12 и 13 март се извршени две сложени интервенции: успешно е трансплантиран црн дроб и два бубрега од кадаверичен дарител, а дополнително се експлантирани коскени ткива и лигаменти. Станува збор за петта трансплантација на црн дроб во Македонија – додаде Костовски.

Тој посочи дека иако јавноста беше фокусирана на несреќата во Кочани, екипите во Скопје тивко, но посветено, продолжија со работа, успешно изведувајќи интервенции кои спасуваат животи.

Исто така, на Клиниката за дигестивна хирургија е направена првата баријатриска интервенција кај пациент со зголемена телесна тежина која е целосно покриена од буџетот на Фондот за здравствено осигурување. Станува збор за пациент кој тежел 130 килограми, а кому индексот на телесна маса изнесувал 40.

Националниот координатор за трансплантација, професорката д-р Билјана Кузмановска, потсети дека зад секоја статистика стојат човечки приказни.

– Тие што донираат се тивки херои. Ние сме тука да им дадеме признание, бидејќи тие го продолжуваат животот на другите – рече таа, посочувајчи дека нституциите соработуваат со странски здравствени системи за едукација на кадарот, со цел зголемување на капацитетот на домашните тимови.

Директорот на Фондот за здравствено осигурување, Сашо Клековски, изјави дека Фондот од јули досега има испратенио пет пациенти во странство за трансплантација од жив донор. Целта, е во Македонија да се достигне просек од 10 трансплантации, годишно, со живи дарители.

Проф. д-р Антовиќ посочи дека кога станува збор за трансплантација од жив донор, се зема половина црн дроб од здрав човек, најчесто некој од семејството на пациентот, додавајќи дека тоа е сложена процедура. За таа цел, во завршна фаза е набавката на нов микроскоп, кој е клучен за сложени интервенции кај жив дарител.