Собранието ги усвои измените на Законот за служба во Армијата откога ова законско решение цела година беше блокирано од страна на опозицијата. Овие измени и дополнувања обезбедуваат сериозни придобивки за припадниците на Армијата. Следува зголемување на платите на активниот воен и цивилен персонал над 2.000 денари, изјави Миле Талески, пратеник на СДСМ, на денешната прес-конференција.

Тој додаде дека професионалните војници стекнуваат право на исплата на станарина од моментот на склучување на првиот договор за вработување во Армијата. За активниот воен и цивилен персонал се предвидува исплата на боледување во висина од 100 % од основната плата и додатоци на плата, а се воведуваат поволни услови за стипендирање млади и перспективни кадри од критични специјалности за Армијата. Придобивки има и во делот пензионирање на војниците.

Талески наведе дека од сега војниците ќе стекнуваат право на пензија со навршени 40 години работен стаж, односно 38 години за жени, без оглед на возраста. Има и нова пресметка за активен воен и цивилен персонал, кој правото на пензија го стекнал од денот на формирањето на Армијата, во висина од 80 % од најповолните 10 години од пензискиот стаж.

Талески истакна дека со измените се создава можност за исплата на испратнина за професионалните војници со навршени 45 години возраст во износ од две просечни плати, но не помалку од 1.000 евра за секоја година помината во службата. Она што исто така е важно е тоа што со законските измени се регулира областа на професионалност, непристрасност и законитост во вршењето на должностите во Армијата и во Министерството за одбрана на политички неутрален начин.

Законот децидно предвидува дека во Армијата нема место за партиско дејствување и можеби токму ова беше причината зошто ВМРО-ДПМНЕ со 2.000 амандмани се обидуваше да го закочи носењето на овој закон.

СДСМ преку Владата и парламентарното мнозинство ќе продолжи да инвестира во одбраната, во човечкиот капитал и во сето она што е важно за државата, додаде Талески.