Македонија
(Видео) Трајковска: Центарци наседнаа на лагите кои им ги ветуваше Богдановиќ за време на локалните избори
Поминаа две години од мандатот на Саша Богдановиќ како градоначалник на општина Центар. Две години на лаги, неработење и неостварени ветувања. Очигледно е дека центарци наседнаа на лагите кои им ги ветуваше Богдановиќ за време на локалните избори, обвини Антоанета Трајковска од ВМРО-ДПМНЕ.
„Наместо на решавање на реалните проблеми со коишто се соочуваат граѓаните, тој се занимава со работи што немаат ефект во квалитетот на живеењето на жителите на Центар. ВМРО-ДПМНЕ е овде да ги потсети граѓаните на дел од лагите и ветувањата што им ги даде на жителите во Изборната програма. Затоа прашуваме:
До каде е изградбата на мултифункционалната сала на Работнички што ја ветивте пред изборите, па дури направивте и спот и видео по тој повод?
До каде е изградбата на гасификацијата и колку домаќинства приклучивте на неа?
До каде е модерното вертикално зеленило на зградите? Да ве потсетам дека имате дури и илустративна сликичка во вашата сликовница наречена „План за живот“.
Господине Богдановиќ, дали знаете дека сè уште има делови на општината коишто немаат канализација и луѓето живеат како во минатиот век. До каде е изградбата на градинката во Маџар Маало и стационарот за кучиња? Имате исто така обврска да дадете одговор до каде се реконструираните 40 улици коишто ги имате набројано во вашата програма? Свесни ли сте дека ветивте изградба на кула за прочистување на воздухот со којашто центарци ќе дишат алпски воздух. До каде е нивната изградба? До каде е чистиот воздух што го ветувавте? Сте ги погледнале ли мерните станици надвор да видите дека се гушиме?
Таа обвини дека Богдановиќ освен гол популизам и фалби со туѓи проекти, не направил ништо корисно за општината. Вели дека со импровизации на диво и со позајмени клупи од други училишта, го отворил училиштето во Капиштец.
„Нема потреба да зборуваме за пропаднатите проекти на Богдановиќ. Доволно е граѓаните да ја отворат неговата сликовница ‘План за живот’ и ќе видат со кои лаги ги освои на локалните избори. Богдановиќ ќе остане запаметен како градоначалник по непотизмот и партиските вработувања во општината и во ПОЦ. 2 ВМРО-ДПМНЕ останува доследна партија што секогаш се залага за интересите на граѓаните. Затоа и го потсетуваме градоначалникот да почне со работа и да ги исполни ветувањата дадени во неговата програма. Две години изминаа, наредните две години брзо проаѓаат. Затоа ВМРО-ДПМНЕ е овде да ги порази лагите, непотизмот и неубавото владеење на Богдановиќ во општина Центар“, порача Трајковска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Коцевски: Ако градоначалникот Ѓорѓиевски има докази за злоупотреби во јавните претпријатија нека пријави
Републичкиот јавен обвинител Љупчо Коцевски изјави дека градоначалникот на Скопје, Орце Ѓорѓиевски, доколку има докази за злоупотреби во јавните претпријатија, е надлежен тоа да го пријави во Министерството за внатрешни работи или во Јавното обвинителство.
„Во однос на изјавите на градоначалникот, ќе кажам дека тој како градоначалник, доколку има докази и е надлежен, тоа може да го пријави на надлежните органи – МВР, и да ги достави тие документи евентуално во Јавното обвинителство. И досега Обвинителството така постапувало, што значи дека ќе постапува и натаму. Ако има злоупотреби, стоиме на располагање“, изјави Коцевски.
Градоначалникот Ѓорѓиевски претходно на социјалните мрежи објави дека во скопските јавни претпријатија се отпуштени 500 лица кои со месеци или години не доаѓале на работа, и дека нема да има толеранција за такви случаи.
Дополнително во телевизиско гостување, Ѓорѓиевски објасни дека до него пристигнале документи кои укажуваат на можни незаконитости во работењето на повеќе претпријатија.
Македонија
Следната недела почнува судењето за пожарот во „Пулс“, обвинителството со тим од 15 обвинители
Судскиот процес за трагичниот пожар во дискотеката „Пулс“ во Кочани, во кој животот го загубија 63 лица, а над 200 беа повредени, почнува следната недела, на 19 ноември.
Државниот јавен обвинител Љупчо Коцевски најави дека обвинението ќе го застапува тим од околу 15 обвинители, со веќе утврден план за нивна координација.
„Во судница обвинението ќе го застапуваат истите обвинители што беа и досега, но најверојатно ќе ангажираме уште неколку, за да не се одолговлекува постапката. Од наша страна сме целосно подготвени и екипирани“, изјави Коцевски, додавајќи дека вчера се одржал координациски состанок во Јавното обвинителство.
Обвинението, поднесено во јуни годинава, опфаќа 34 физички и три правни лица, обвинети за тешки дела против општата сигурност. Меѓу нив се тројца поранешни градоначалници на Кочани, четворица директори на Дирекцијата за заштита и спасување, пет државни службеници, генерален секретар и двајца поранешни министри за економија. Првообвинети се тројцата одговорни лица и сопственици на фирмата чија подружница бил кабарето „Пулс“.
Покрај главниот предмет, се води и посебна истрага против 13 полицајци поврзани со случајот, која се одвива побавно поради одложени сослушувања на сведоци. Одлуката од Јавното обвинителство се очекува на почетокот на декември.
Во Основното јавно обвинителство Кочани се води и предистражна постапка против службеници на Управата за јавни приходи.
Македонија
Утре делови од Шуто Оризари без вода за пиење
Од ЈП Водовод и Канализација известуваат дека утре ( среда ) поради промена на затворач ф-125мм на крстосницата Индира Ганди/Гвадалахара, прекинато водоснабдување ќе имаат следниве улици; Гвадалахара, Индира Ганди, Метохиска, Јован Хаџи Шишко и Гарсија Лорка.
Водоснабдувањето ќе биде прекинато од 09:00 часот до завршување со работните активности.(општина Шуто Оризари)

