Македонија
(Видео) Трајчева ја прикажа планираната хациенда на Рашковски вредна 463 илјади евра, тој им се налути и на неа и на судот
Куќа на два ката, со базен, а илустрирана на 3Д-скица. Вака изгледаше основниот проект на име Дамјан и Миа Рашковски, деца на ексгенералниот секретар Драги Рашковски, презентиран на рочиштето за „Софтвери“. Обвинителката Ивана Трајчева посочи дека токму по овој проект е планирано да се гради куќата во Побожје, каде што Рашковски купил земјиште. Основниот проект бил одобрен и доставен до Општина Чучер Сандево, но повлечен кога се отворила предистрагата за „Софтвери“. Рашковски забележа зошто судот дозволил да се изведе овој доказ. Трајчева, пак, наброја што содржи тој и посочи дека, според него, изградбата ќе чинела 28.528.409 денари или нешто над 463 илјади евра.
„Ова е основен проект на име Дамјан и Миа Рашковски. Може да се види дека е предвидено да има два влеза, наведена е површината. Ова се предвидените работи што требало да се изведат за влезот број 1 во вкупен износ од 18.991.857 денари. Има рекапитулација за влезот два – вкупно 9.536.552 денара, или за двата влеза 28.528.409 денари“, рече обвинителката Трајчева презентирајќи го доказот.
Спецификацијата беше долга и не беше читана на рочиштето. Обвинителката, по презентацијата на проектот, посочи дека била поднесена и изјава за повлекување на проектот доставена до Општината. Тоа, според неа, се случило кога и јавно било објавено дека е отворена предистрага во која е опфатен Рашковски.
„Поднесена е изјава за повлекување проекти во време на водење на предистражната постапка, кога е јавно објавено“, рече Трајчева на рочиштето.
Во судницата реагира и Рашковски. Тој не го оспоруваше проектот, туку му пречеше што доказот е презентиран во судница.
„Разочаран сум што судот дозволи да се изведе овој доказ. Ова е повлечен проект, нема врска со обвинението. Ова е нереализирана работа, не се знае кој е бизнис-планот. Ова е само на штета… Треба да си многу несреќен човек за да предложиш ваков доказ до судот“, рече Рашковски.
За имотот во Побожје, Рашковски беше прашан и на интервју во „А1он“. Тој тогаш рече дека на плацот нема градба, но не одговори дали била планирана градба на хациенда.
„Имотот во Побожје е исто една од фамите што се направија. Таму дури луѓето ме прашуваа кога може да одат, а на тоа земјоделско земјиште не постои нешто што е повисоко од камен од 20 сантиметри. Една нива, изорана. Дојде од мравка слон се направи и излезе дека таму веќе постои хациенда со базени, тениски игралишта. Станува збор за нива, расцепкани парцели. Целиот имот е купен 70 илјади евра, а е купен со средства што сум ги имал пред да станам секретар. Сега само сум ги употребил – наместо да купам автомобил, сум ги искористил да купам имот. И кредит, кој за таа намена е земен. Обвинителството гледам го проучило целиот процес на купување, до земање договори од нотари, проверка на сметки. Целиот имот вреди 70 илјади. Јас не работам од вчера, работам од 18 години, работам 20 години. Средствата што сум ги имал, сум сметал дека е добра инвестиција и сум го купил на име на децата“, рече Рашковски во интервју за „А1он“ пред четири месеци, без да одговори на прашањето дали планирал да гради.
На рочиштето беа презентирани и други материјални докази. Меѓу нив и такви со кои обвинителката побиваше дека некогаш скрила каков било документ што го добила од Генералниот секретаријат. Рашковски, пак, реагира на дописите што беа читани. Подолга дискусија имаше и за известувањето од Управата за финансиска полиција за банкарските сметки од Љубен Милошоски (роднина на семејството Рашковски). За него, на минатите рочишта Рашковски тврдеше дека префрлал високи суми пари на сметките од децата за да го оправда потеклото. Обвинителката Трајчева, пак, презентира известување од Управата за финансиско разузнавање, во кое стои дека Милошоски имал лимит на сметката од 50 илјади, па, така не можел да оди во минус до 500 илјади, како што претходно беше презентирано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
МВР потврди: Уапсен Артан Груби
На граничниот премин „Блаце“, припадници на Министерство за внатрешни работи го уапсија поранешниот прв вицепремиер Артан Груби.
„Денеска (23.02.2026) во 06:10 часот на Граничниот премин Блаце, на влез во државата, од слобода е лишен Артан Груби (48), кој беше баран со меѓународна потерница за истрага за сторено кривично дело по чл.354 ст.5 в.в. ст.3 в.в ст.1 в.в со чл.22. од КЗ“, велат од МВР.
Груби се товари за злоупотреба на службената положба во случај поврзан со Државна лотарија. Во предметот осомничен е и Перпарим Бајрами, а истрагата се однесува на наводна проневера од околу осум милиони евра преку набавка на ВЛТ апарати.
Македонија
Без струја денеска делови од Бутел, Карпош и Кисела Вода
Од ЕВН Македонија АД известуваат дека денеска без електрична енергија ќе останат:
– во периодот од 08.00 до 10.00 часот, корисниците од улицата Марко Крале лоцирани околу објектот бр. 51, општина Бутел;
– во периодот од 08.30 до 10.00 часот, корисниците од улицата Козле лоцирани позади фабриката Реплек, општина Карпош;
– во периодот од 08.35 до 11.00 часот, корисниците од улицата Радишанска, општина Бутел;
– во периодот од 12.00 до 16.00 часот, дел од корисниците од улицата 1439 во населба Пинтија, општина Кисела Вода.
Македонија
Без вода денеска дел од Кисела Вода
Од ЈП Водовод и Канализација известуваат дека денеска поради изведување водоводен приклучок од ф – 100 мм – во близина на Макпетрол, без вода ќе останат корисниците од улицата Христо Татарчев лоцирани на потегот од улицата Народни Херои до улицата Франк Харкорд-Манинг, општина Кисела Вода.
Водоснабдувањето ќе биде прекинато во периодот од 09.00 часот па се до завршување на работата

