Македонија
(Видео) Трајчева ја прикажа планираната хациенда на Рашковски вредна 463 илјади евра, тој им се налути и на неа и на судот

Куќа на два ката, со базен, а илустрирана на 3Д-скица. Вака изгледаше основниот проект на име Дамјан и Миа Рашковски, деца на ексгенералниот секретар Драги Рашковски, презентиран на рочиштето за „Софтвери“. Обвинителката Ивана Трајчева посочи дека токму по овој проект е планирано да се гради куќата во Побожје, каде што Рашковски купил земјиште. Основниот проект бил одобрен и доставен до Општина Чучер Сандево, но повлечен кога се отворила предистрагата за „Софтвери“. Рашковски забележа зошто судот дозволил да се изведе овој доказ. Трајчева, пак, наброја што содржи тој и посочи дека, според него, изградбата ќе чинела 28.528.409 денари или нешто над 463 илјади евра.
„Ова е основен проект на име Дамјан и Миа Рашковски. Може да се види дека е предвидено да има два влеза, наведена е површината. Ова се предвидените работи што требало да се изведат за влезот број 1 во вкупен износ од 18.991.857 денари. Има рекапитулација за влезот два – вкупно 9.536.552 денара, или за двата влеза 28.528.409 денари“, рече обвинителката Трајчева презентирајќи го доказот.
Спецификацијата беше долга и не беше читана на рочиштето. Обвинителката, по презентацијата на проектот, посочи дека била поднесена и изјава за повлекување на проектот доставена до Општината. Тоа, според неа, се случило кога и јавно било објавено дека е отворена предистрага во која е опфатен Рашковски.
„Поднесена е изјава за повлекување проекти во време на водење на предистражната постапка, кога е јавно објавено“, рече Трајчева на рочиштето.
Во судницата реагира и Рашковски. Тој не го оспоруваше проектот, туку му пречеше што доказот е презентиран во судница.
„Разочаран сум што судот дозволи да се изведе овој доказ. Ова е повлечен проект, нема врска со обвинението. Ова е нереализирана работа, не се знае кој е бизнис-планот. Ова е само на штета… Треба да си многу несреќен човек за да предложиш ваков доказ до судот“, рече Рашковски.
За имотот во Побожје, Рашковски беше прашан и на интервју во „А1он“. Тој тогаш рече дека на плацот нема градба, но не одговори дали била планирана градба на хациенда.
„Имотот во Побожје е исто една од фамите што се направија. Таму дури луѓето ме прашуваа кога може да одат, а на тоа земјоделско земјиште не постои нешто што е повисоко од камен од 20 сантиметри. Една нива, изорана. Дојде од мравка слон се направи и излезе дека таму веќе постои хациенда со базени, тениски игралишта. Станува збор за нива, расцепкани парцели. Целиот имот е купен 70 илјади евра, а е купен со средства што сум ги имал пред да станам секретар. Сега само сум ги употребил – наместо да купам автомобил, сум ги искористил да купам имот. И кредит, кој за таа намена е земен. Обвинителството гледам го проучило целиот процес на купување, до земање договори од нотари, проверка на сметки. Целиот имот вреди 70 илјади. Јас не работам од вчера, работам од 18 години, работам 20 години. Средствата што сум ги имал, сум сметал дека е добра инвестиција и сум го купил на име на децата“, рече Рашковски во интервју за „А1он“ пред четири месеци, без да одговори на прашањето дали планирал да гради.
На рочиштето беа презентирани и други материјални докази. Меѓу нив и такви со кои обвинителката побиваше дека некогаш скрила каков било документ што го добила од Генералниот секретаријат. Рашковски, пак, реагира на дописите што беа читани. Подолга дискусија имаше и за известувањето од Управата за финансиска полиција за банкарските сметки од Љубен Милошоски (роднина на семејството Рашковски). За него, на минатите рочишта Рашковски тврдеше дека префрлал високи суми пари на сметките од децата за да го оправда потеклото. Обвинителката Трајчева, пак, презентира известување од Управата за финансиско разузнавање, во кое стои дека Милошоски имал лимит на сметката од 50 илјади, па, така не можел да оди во минус до 500 илјади, како што претходно беше презентирано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.
Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.