Македонија
(Видео) Тренчевска за амандманот за поддршка за настраданите во трагедијата во Кочани: Да покажеме дека сме единствени кога е најпотребно

Пратеничката група на СДСМ и коалцијата поднесе комисиски амандман за ребалансот на Буџетот, со кој се предлага обезбедување на средства во висина од една милијарда и дваесет милиони денари за финансиска поддршка на повредените и семејствата на починатите лица во трагедијата што се случи во дискотеката „Пулс“, во Кочани, како и за реновирање и набавка на неопходна медицинска опрема за Општата болница во Кочани.
„Во март се случи најголемата трагедија во историјата на нашата држава. Загинаа 62 млади животи, а над 200 лица беа повредени, од кои многу со трајни последици. Владата досега не инвестираше доволно за справување со последиците, а најголем дел од помошта стигна од граѓаните и општествено одговорни компании преку Црвениот крст и Сапорт Кочани“, рече пратеничката на СДСМ, Јована Тренчевска.
Таа додаде дека амандманот е одговор на секојдневните апели на семејствата на загинатите и на повредените, кои со месеци бараат поддршка и правда.
„Сведоци сме секојдневно на излегувањето низ улиците на Кочани на семејствата на загинатите. Сведоци сме секојдневно на барањето на помош и поддршка од настраданите и повредените од оваа трагедија, од овој пожар, и од тие причини сметаме дека овој амандман навистина ќе помогне и во справувањето со проблемите во болницата, и за обезбедување на средства за реновирање и за обезбедување на медицински материјал, меѓутоа и во оној дел што значи поддршка и помош на семејствата и на повредените од пожарот во Кочани“, рече Тренчевска.
При тоа, Тренчевска апелираше до сите пратеници да го поддржат амандманот, испраќајќи порака дека Собранието треба да стои зад граѓаните во најтешките моменти.
„Да покажеме дека сме единствени кога е најпотребно – за да помогнеме, да обновиме и да вратиме надеж таму каде што е најмногу изгубена“, изјави Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муртезани домаќин на австриската и словенечката делегација: Гласна поддршка за нашата европска иднина

Министерот за европски прашања на Република Северна Македонија, Орхан Муртезани, ги пречека делегациите од Република Австрија и Република Словенија, кои престојуваат во работна посета на земјата, а кои се предводени од Сојузната министерка за Европа, интеграција и семејство на Република Австрија, Клаудија Плаколм и државната секретарка во Министерството за надворешни и европски прашања на Република Словенија, Нева Грашич. Во рамките на посетата се одржаа билатерални средби и заедничка трилатерална средба на која беше потврдена континуираната и принципиелна поддршка од Австрија и Словенија за европската интеграција на Северна Македонија.
На состанокот беше истакната исклучителната важност на продлабочувањето на соработката со двете држави, кои како докажани пријатели и партнери на нашата земја, доследно ја поддржуваат нејзината европска перспектива. Министерот Муртезани изрази благодарност за досегашната силна и видлива поддршка што Австрија ја дава во рамките на политиката на проширување на Европската Унија и за нејзината активна улога во афирмацијата на концептот на постепена интеграција, како средство за побрзо приближување на земјите од Западен Балкан кон европското семејство. Притоа, тој потенцираше дека Северна Македонија останува посветена на исполнувањето на обврските и реформите врз основа на заслуги и очекува европскиот процес да продолжи со јасна и меритократска динамика.
Во разговорите со австриската страна беше нагласено значењето на ангажманот на Австриската агенција за развој (ADA) во регионот, особено во областите на добро владеење, владеење на правото, одржлив и инклузивен економски развој, како и заштита на животната средина и климатските политики. Министерот Муртезани ја изрази подготвеноста за посилно вклучување на Агенцијата во координациските механизми на Владата, како и интерес за воспоставување постојано претставништво на ADA во земјата, со цел уште поефикасна реализација на заедничките развојни приоритети.
Во рамките на разговорите со словенечката делегација, беше потврдена долгогодишната традиција на пријателство и блиска соработка меѓу двете земји, кои немаат отворени прашања и се одликуваат со исклучително партнерски односи. Словенија и понатаму останува еден од најгласните и најконзистентни поддржувачи на европската интеграција на Северна Македонија, како и активен учесник во реализацијата на билатерални и регионални проекти за институционално зајакнување и развој. Во тој контекст, беше посочена и успешната имплементација на повеќе инфраструктурни и енергетски проекти финансирани со словенечки развојни средства, насочени кон заштита на животната средина, дигитализација, иновации и локален економски развој.
Министерот Муртезани ја нагласи подготвеноста на Република Северна Македонија за натамошно интензивирање на политичкиот дијалог и продлабочување на соработката со Република Австрија и Република Словенија, во духот на заедничките европски вредности и регионалната солидарност. Тој подвлече дека искреното пријателство и конкретната поддршка што нашата земја ги добива од овие две држави претставуваат значаен поттик за продолжување на реформскиот процес и забрзување на европската интеграција на Северна Македонија.
Македонија
Заев: Најостро и категорично ги отфрлам лагите и клеветењата од Мицкоски за наводни „куферчиња со пари од поранешен премиер од Бугарија“

„Небулози, клевети и навреди се методите на Мицкоски со кои сака да се оправда за катастрофата која и ја нанесува на целата држава. Неспособноста да испорача макар и еден единствен резултат во која било сфера од општеството и политиката, залиена со неговата самобендисаност и аздисаност ќе го турне во политичка провалија. Но, ќе мораме да внимаваме да не ни ја повлече и државата со себе во таа провалија“, реагира поранешниот претседател на СДСМ и експремиер, Зоран Заев.
„Најостро и категорично ги отфрлам лагите и клеветењата од Мицкоски за наводни “куферчиња со пари од поранешен премиер од Бугарија” како невистини и како очаен обид на неспособниот премиер да го пренасочи вниманието на јавноста од неговите неуспеси кон неговите измислици.
А, кога сме веќе кај куферите, видовме во снимките што сами си ги пуштија во јавност дека експерти за куфери со пари се токму неговите поддржувачи и финансиери. Оние за кои се фалеше дека му ги плаќале сметките за струја во Белата палата, оние несудени бугарски конзули и осудени криминалци пуштени да се бранат од слобода за да ја напаѓаат опозицијата“, додава Заев.
Македонија
„Филипче и СДС, по теркот на нивниот гуру Заев, се спремни за ново предавство за спас на кариерите“, велат од ВМР0-ДПМНЕ

„Филипче и СДС, по теркот на нивниот гуру Заев, се спремни за ново предавство за спас на кариерите. Заев со Бугарија, освен фирмите и бизнисите, го спојува и црвената жица, онаа македонската која ја продаде за куферчиња полни пари, а сега Филипче сака истото да го направи. Се е исто и прочитано“, велат од ВМРО-ДПМНЕ.
„Филипче за спас на неговата кариера и спас на неговиот гуру е спремен да го продаде и она малку достоинство и интегритет што ни го оставија, за да ги спаси бизнисите во Бугарија.
Црвените линии на Филипче се подарок за Бугарија, односно бонбона бизнис од СДС за Бугарите.
ВМРО-ДПМНЕ тоа нема да го дозволи. Наш интерес е македонскиот народ“, се наведува во соопштението на ВМРО-ДПМНЕ.