Македонија
(Видео) Тренчевска: Земјата е лидер во регионот во воспоставување и имплементирање на социјални услуги за лица со попреченост
Министерката за труд и социјална политика, Јованка Тренчевска, денеска, во Владата оствари средба со претставниците на Националниот сојуз на слепите лица, со цел да ги чуе нивните барања и воедно да се најде најсоодветното решение. Побараа раст на додатокот за попреченост. Тој да биде 40 % од просечната плата во државата, 30 % од просечната плата за правото за туѓа нега и помагала за слепите како системско решение.
Тренчевска се осврна на политиките и мерките што оваа Влада ги креира и ги имплементира изминативе години, како што се: растот на гарантираната минимална помош, намалување на возраста за лична асистенција од 18 на 6 години, измени во Законот за детската заштита, со кои висината на посебниот додаток треба да се покачи 15 % и измени во Законот за социјалната заштита, каде што се намалува возрасната граница на родителите, кои се грижеле за своето дете со попреченост во својот дом до неговата 26-годишна возраст, како и правото за лична асистенција на лицата со комбинирана попреченост, измени што се во собраниска процедура.
„Република Северна Македонија е лидер во регионот, но и пошироко, во воспоставување и имплементација на социјалните услуги на локално ниво, во заедницата, односно домот на граѓаните на кои поддршката им е неопходна за нивно функционирање. А со тоа и нивно поголемо вклучување во сите сфери на општественото живеење“, рече Тренчевска.
Таа информира дека преку Проектот за подобрување на социјалните услуги, кој го спроведува Министерството за труд и социјална политика, досега само со првиот јавен повик за доделување грантови се реализираа 22 проекта во 27 општини. Преку овие услуги опфатени се околу 700 корисници. Проектот опфаќа помош и нега во домот, дневни центри за деца со попреченост, помош на стари лица во дневен центар и рехабилитација и регенерација на лица со попреченост во локалната средина со услуги за советување. Преку овие услуги опфатени се околу 700 корисници.
Министерката посочи дека во државава отворени се 35 дневни центри за деца со попреченост, кои ги посетуваат 400 деца со попреченост.
Во тек е изработка на дизајн за воспоставување регистар за деца и лица со попреченост, кој треба да биде завршен до крајот на 2022 година.
Сите нови детски градинки се градат во согласност со стандарди што вклучуваат инклузивност, а постојните се приспособуваат затоа што секое дете има право да биде дел од предучилишниот процес. Во таа насока се и трите нови сензорни игралишта во Кривогаштани, Крушево и во Струмица, како и две нови сензорни соби во детски градинки.
Од септември 2022 година Министерството за труд и социјална политика во соработка со Националниот сојуз на глувите и наглувите почнува со обуки за вработените во претшколските установи за знаковен јазик. Овие обуки особено се наменети за вработените, каде што имаме згрижено деца со пречки во слухот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.
Македонија
Силните дождови поплавија подруми и гаражи во Охрид
Локални дождови вчера и во текот на ноќта имаше на повеќе места во државата. Регионалниот Центар за управување со кризи (ЦУК) Охрид, известува дека се добиени пријави на граѓани за поплавување на подруми и гаража на две куќи на ул. „Стив Наумов“, во Охрид. Од страна на Општина Охрид е контактирано со ЈП „Нискоградба“ и ЈП „Колекторски систем“ дека колекторскиот систем не можел да ја прими во целост количината на вода која поради обилните врнежи од дожд, бидејќи во тој период на пороен дожд количината вода била голема. За кратко време состојбата е санирана.
Од ЦУК потсетуваат за голема внимателност при појава на локалните нагли метео промени и особена внимателност при грмежите и молњите, односно при силните електрични празнења. Препораките се да не се престојува на отворен простор и под осамени дрвја.
Потсетување има и за внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.