Македонија
(Видео) Тренчевска : Со проширување на капацитетот, градинката „Детска радост“ ќе згрижи 157 деца

Министерката за труд и социјална политика, Јованка Тренчевска заедно со градоначалникот на Општина Струмица,Костадин Костадинов, денеска ја посетија детската градинка „Детска Радост“, од оваа општина, која што го прошири капацитетот за дополнителни 57 деца, со доизградба на нов дел поврзан со постојниот објект.
„Навистина ми претставува задоволство што денеска можам да најавам дека првата и најстара градинка во Струмица „Детска Радост“, објектот 2 го проширува капацитетот за прием на нови 57 деца. Со тоа, оваа градинка, досегашниот капацитет од 100 деца го зголемува на 157,“ рече министерката Тренчевска.
Таа рече дека за изведувањето на градежните работи и опремување на градинката, Министерството од Буџетот има обезбедено средства во износ од 17 милиони денари како дел од Програмата за изградба, опремување и одржување на објекти за детска заштита за 2020 година. Со доградбата, градинката добива 4 нови простории, од кои две (2) јаслени занимални и две (2) занимални во кои ќе бидат сместени деца од 2-4 години.
Министерката Тренчевска информираше и дека во Општина Струмица во завршна фаза е и изградбата на нова детска градинка со капацитет за 307 деца која се гради согласно Проектот за подобрување на социјалните услуги, со поддршка на Светска Банка. Како и дека двете градинки заедно значително ќе го зголемат опфатот на нови деца. Тоа се над 360 деца на кои им се овозможува квалитетно предучилишно воспитание и образование.
Според градоначалникот на Општина Струмица, Костадинов континуираните ангажмани за проширување на капацитетите на постојните градинки, како и изградбата на новите градинки, значат премногу за општина Струмица и нејзините граѓани.
Тој изрази благодарност до Министерството за труд и социјална политика и министерката Тренчевска за заложбата и реализација на новиот објект-детска градинка и уверување дека, активностите ќе продолжат и во иднина, затоа што најмладите струмичани се врвен приоритет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.