Македонија
(Видео) Трет јавен повик за проекти за прекугранична соработка со Косово

Третиот јавен повик за проекти за прекугранична соработка со Косово е објавен и ќе трае до 20 мај, соопшти на прес-конференција министерот за локална самоуправа, Сухејл Фазлиу.
За овој јавен повик од ИПА Инструментот на Европската Унија на располагање се ставени 2 милиони и четириесет илјади евра за проекти за двете земји, а средствата за кофинансирање во висина од 15 насто, за проектите што се имплементираат во нашата земја, ќе ги обезбеди Министерството за локална самоуправа.
Проектите треба да имаат влијание на поттикнување на туризмот, културното и природното наследство, како и на зачувување на животната средина, промовирање на адаптација и ублажување на климатските промени, спречување и управување со ризици.
На јавниот повик можат да аплицираат општини, граѓански организации, училишта, универзитети, бизнис асоцијации и други непрофитни субјекти во соработка со партнери од соседната земја, во случајот од Република Косово.
,,Ги охрабрувам сите заинтересирани да се пријавата и да не ја пропуштат можноста да направат нешто повеќе за себе, за општината, за прекуграничниот регион и за државата. Проектите за прекугранична соработка се оддлична можност да работиме заеднички на решавање на прашањата во регионот, да споделуваме информации, да се запознаваме подобро и да создаваме мрежи на соработка, која што може да се прошири во многу различни области. Наша цел е во вториот програмски период да оствариме степен на реализација од над 90 проценти на финансиските средства, ставени на располагање од Европската Унија, рече министерот за локална самоуправа Сухејл Фазлиу.
Програмата за прекугранична соработка со Косово 2014-2020, започна со имплементација во јануари 2016 година и на располагање има вкупен буџет од 8,4 милиони евра за заеднички проекти. До сега преку оваа програма се финансирани 9 проекти во вредност од 2,5 милиони евра за корисници на грантови од двете страни на границата. Проектите се во фаза на имлементација.Сите потребни информации за јавниот повик се објавени на ВЕБ страницата на Министерството за локална самоуправа, на линкот на Програмата за прекугранична соработка МК-КС (http://cbc-ks-mk.com/opencalls).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Почна акцијата за чистење на депонијата во Никуштак, ќе бидат потрошени пет милиони денари

Министерството за животна средина и просторно планирање денес ја започна акцијата за санација на дивата депонија во селото Никуштак, општина Липково.
Оваа депонија, идентификувана како една од најопасните во Националниот план за управување со отпад, претставува сериозна закана за здравјето и животната средина, како за жителите на Липково, така и за соседните општини. Честите пожари и постојаното загадување се голема загриженост за граѓаните од регионот.
Од Буџетот за 2025 година за овој проект се обезбедени околу 5 милиони денари, како и механичка опрема за безбедно управување со отпад. По завршувањето на техничките подготовки, денес започнаа градежните работи на терен.
Меџити рече дека санацијата на оваа депонија е голем чекор кон заштита на здравјето на граѓаните и подобрување на условите за живот во општина Ликове и околниот регион. Тој нагласи дека нема повеќе време за чекање и дека институциите имаат обврска конкретно да дејствуваат на терен.
Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).