Македонија
(Видео) „Уште колку здрави деца како Јана треба да умрат“, „Сложни доктори и во петок закопуваат“, со пароли се бараше правда во Битола

Со транспаренти „Секогаш во нашите срца Јаничка“, „Формалности ни го водат здравството“, „Какви реформи“, „Сите сме Јана“, „Купена диплома слугува на народот“, „Зошто јагнето божјо ни го јадовте волци“, „Немаме солзи да ви ги исплачиме гревовите“, битолчани бараат правда и одговори од што почина петгодишната Јана Христова. Тие од плоштадот Магнолија прашаа: „Уште колку здрави деца како Јана треба да умрат“. Игор Петковски, кум на починатото девојче, посочи дека на плоштадот излегле за да изразат и поддршка кон семејството.
„Пораката која сакаме да ја упатиме е првично дека стоиме позади секој кој го кажа семејството Христовски. Стоиме зад нив, поддршката наша ја имаат, секогаш, затоа што веруваме дека тоа што го изјавуваат таа е вистината. Многу луѓе, односно институциите сакаат да го прикажат сомнеж но ние не веруваме дека тие се сомневаат. Тие ја кажуваат вистината. Народот и граѓаните во тоа што се сомневаат – тоа се институциите. Од сите анкети, народот не им верува на институциите, особено на Министерството за здравство, ДСЗИ, но како и да е, ние сепак ќе почекаме. Најважно за нас е обдукцијата. Од тие резултати ќе видиме како делуваме од наодот и Обивнителството, кажа Игор Петковски, кум на Јана.
Меѓу присутните имаше и многу деца. Тие со себе имаа и транспаренти со пароли како: „Сложни доктори и во петок закопуваат“, „Ако немаш пријател умри си“, „Јана стана ангел чувар на сите други деца…“, „Безгрешен доктор според ДСЗИ не постои“.
Државниот санитарен и здравствен инспекторат изврши вонреден инспекциски надзор во ЈЗУ Клиничка болница „Д-р Трифун Пановски“ Битола, каде почина петгодишната Јана Христовска. Здравствените инспектори, констатирале дека на девојчето му била дадена глукоза заедно со фисиолошки раствор – но тоа не е констатирано како грешка на педијатрите кои го третирале девојчето. Направен е и увид во медицинската евиденција, а земени се изјави и од здравствените работници кои го третирале детето.
Сведоштво за последните моменти на Јана имаше и татко ѝ за „Макфакс“. Тој и неговата сопруга се убедени дека за смртта на нивната ќерка пресудна била инфузијата со гликоза што ја добила и покрај тоа што претходно анализите покажале дека шеќерот ѝ е 9. По инфузијата, шеќерот ѝ се качил на 19 и состојбата ѝ се искомплицирала, а по три часа, им соопштиле дека починала.
Протест под мотото „Правда за Јана“ имаше и во Скопје.
Фото: Бабам Битола
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се организира транспортот на телото на Александар Карадакоски – управителот на „Пулс“ кој почина во Литванија

Институциите го организираат транспортот од Литванија на телото на 29-годишниот Александар Карадакоски, кој е 60 жртва од пожарот во дискотеката „Пулс“ во Кочани.
Министерството за надворешни работи соопшти дека преку амбасадата во Варшава е во комуникација со семејството на Карадакоски, и со надлежните институции во Литванија.
Од тука велат дека во моментот се преземаат сите неопходни активности за завршување на конзуларните постапки и за организација на транспортот на телото на починатиот македонски државјанин назад во земјата.
Веста за смртта на управителот на дискотеката „Пулс“ кој беше еден од критичните пациенти беше објавена денес. Директна причина за смртта на Карадакоски се изгореници на дишното стебло, извести попладнево Небојша Настов, директор на Клиниката за хируршки болести „Св. Наум Охридски“, каде што Карадакоски бил згрижен пред за отпатува во Литванија. Деведесет отсто од дишните органи му биле изгорени од пламенот што го вдишал, утврдиле лекарите во Литванија.
Министерот за здравство Арбен Таравари претходно рече дека Карадакоски бил во најкритична состојба од сите 193 лица повредени во пожарот во дискотеката. Му откажала функцијата на бубрезите на 1 април, бил ставен на дијализа, практично имал рани на 36 проценти од телото од втор и трет степен, што отвора простор за инфекции.
Обвинителството ја запре постапката против починатиот управител на „Пулс“.
Македонија
Не е вистина дека има цијанид стотици пати над дозволеното во Крива Река, рече директорката на инспекторатот, Гиновска

Директорката на Државниот инспекторат за животна средина, Ивана Гиновска, ги отфрла тврдењата кои ги презентираше градоначалникот, Сашко Митовски, повикувајќи се на анализи на акредитирани лаборатории, дека во Крива Река има цијанид стотици пати над дозволеното, по хаваријата во „Тораница“.
„Ги демантирам шпекулациите дека тој ден инспектори од Државниот инспекторат не излегле на терен. Ги отфрлам сите обвинувања дека јас имам изјавено оти се излеала само вода. Таква изјава не постои. Ги демантирам шпекулациите дека има помор на риби во Крива Река. Од 14.03 до денес не е забележан помор. Одговорно тврдам дека цијанид неколку стотици пати над дозволеното во Крива Река, нема, како што твдеше грдоначалникот на 28 март“, рече таа и додаде дека за ширење паника на населението кривично се одговара.
Сепак, директорката потврди дека инспекторите дента кога се случила хаваријата не зеле мостри. Инспекторите се самостојни во своите одлучувања, самите прават проценка, рече таа одговарајќи на новинарско прашање. На нејзино барање, потоа биле земени примероци од шест точки, меѓу кои и онаа на која градоначалникот утредента зел мостра. Резултатите, вели, не се такви какви што ги презентирал градоначалникот.
Прашана дали тоа значи дека се спорни резултатите на акредитираните лаборатории, Гиновска рече: „Не тврдам и не навлегувам во тоа дали се спорни, но резултатите кои беа прочитани од страна на градоначалникот не беа веројатно точно прочитани. Тој направи паника и рече дека неколку стотици пати над дозволеното има цијанид“.
Според анализите на акредитираните лаборатории кои ги има таа, цијаниди во Крива Река има помалку од два.
„Како директор ги побарав сите досегашни испитувања и ми се доставени на увид. Ќе ги достави сите анализи до кумановското јавно обвинителство кое веќе отвори случај – и нивните, и на риболовното друштво „Мрена“ и на компанијата „Булмак“, и на градоначалникот“, додаде.
Директорката рече и дека „екоцид“ не се докажува со земање на еден литар вода, од едно место, само еден примерок, туку со сеопфатна анализа.
Таа заклучи дека предметот со Крива Река е сензитивен и не смее да се користи за дневно политички препукувања.
На компанијата „Булмак“ 2016, додаде таа, изречена им е казна од 180.000-200.000 евра за правниот субјект и 10.000 евра за одговорното лице, која е најголема казна во законот за животна средина. Компанијата потпиша спогодба и предметот е предаден на Комисијата за спогодување, при Министерството за животна средина и просторно планирање.
Директорката на ДИЖС рече дека ќе ги превземе сите соодветни мерки во согласност со законот и ќе ја информира јавноста за следните чекори.
Митовски претходно откри дека во водата има десет пати поголема концентрација на олово и стотици пати повеќе цијанид, азот и фосфор по инцидентот на 14 март.
Македонија
90 отсто од дишните органи на 29-годишниот Карадакоски биле изгорени од пламенот што го вдишал, утврдиле лекарите во Литванија

Директна причина за смртта на 29-годишниот Александар Карадакоски, кој утрово почина во Литванија, се изгореници на дишното стебло, извести попладнево Небојша Настов, директор на Клиниката за хируршки болести „Св. Наум Охридски“, каде што Карадакоски бил згрижен пред за отпатува во Литванија. Во болницата бил примен околу 6 часот на 16 март. Во текот на денот му се влошила состојбата, па во попладневните часови бил ставен на вештачко дишење, а истовремено му ги лекувале и изгорениците.
„Вкупната површина на изгорениците е некаде околу 36 %, кои претежно се наоѓаа во пределот на главата, вратот и горните екстремитети со длабочина од втор и трет степен, што само за себе кажува за интензитетот на пламенот што го има зафатено. Поради делот од пламенот и чадот што ги вдишал, доаѓа до оштетување на внатрешните дишни органи, што е потврдено и од страна на колегите од Литванија во разговор со нашите анестезиолози при брифирањето за здравствената состојба на пациентите, што морам да кажам дека се одвиваше редовно, секој ден или на секои два дена. Утврдено е со бронхоскопско испитување дека е оштетен голем дел од дишното стебло и како последица на тоа доаѓа до влошување на состојбата, која на крајот резултирала со подлегнување на повредите на 29-годишниот Александар Карадакоски“, рече директорот Настов.
Карадакоски останал во „Св. Наум Охридски“ речиси 24 часа пред да биде транспортиран во Литванија со медицински санитетски авион.
Министерот за здравство Арбен Таравари рече дека Карадакоски бил во најкритична состојба од сите 193 лица повредени во пожарот во дискотеката.
„Тој беше најтешкиот пациент. Му откажа функцијата на бубрезите на 1 април, беше ставен на дијализа, практично имаше рани на 36 % од телото од втор и трет степен, што отвора простор за инфекции и тоа е таа компликација плус дишните патишта, изгореници на дишните патишта околу 90 %“, рече министерот Таравари.
Министерството за надворешни работи веќе го организира враќањето на телото на Карадакоски. Министерот Таравари рече дека обдукцијата ќе ја направи Судска медицина во Скопје, а сите трошоци ќе бидат покриени.
Карадакоски е еден од 116 пациенти испратени на лекување во странство по пожарот во дискотеката во Кочани. Денес, од лекување во странство треба да пристигнат уште шестмина пациенти, по двајца од Бугарија, Шпанија и Унгарија, па во странските болници ќе останат 69 пациенти. Од нив тројца се во критична состојба.
Во болниците во Скопје во овој момент се лекуваат 14 пациенти, а за петмина веќе е договорен испис.