Македонија
(Видео) УЈП сè уште го истражува имотот на верските заедници

Сè уште не е завршена постапката што ја отвори Управата за јавни приходи за имотот, парите и даноците на верските заедници, која беше отворена пред неколку месеци.
Директорката на УЈП, Сања Лукаревска, на денешната прес-конференција рече дека се во контакт со сметководителите и на МПЦ и на ИВЗ и дека се работи за обемна анализа за која е потребно подолго време, но службите вршат проверка и оценување на состојбите што се од важност по однос на даноците.
„Сите документи што ги побаравме од другите институции ги анализираме во согласност со нашите надлежности, односно во согласност со Законот за даночната постапка и Законот за добивката, со кој е предвидено дека такви здруженија и непрофитани организации подлежат на даночење откако ќе поминат одреден лимит на средства. Се истражува и за МПЦ и за ИВЗ. Во моментот не можам да сооопштам детали затоа што сè уште прибираме документи во соработка со службени лица што работат на финансикото работење на двете верски организации“, рече Лукаревска.
Што се однесува до воведување фискализација за услугите на црквите, како што се продавање свеќи, услуги за венчавање или крштевка, од УЈП информираат дека засега нема законска рамка со која би можела да се спроведе.
„Вакви иницијативи имало и порано, но сепак треба да се заземе став по ова прашање и да се координираме и со Министерството за финансии“, рече Лукаревска.
Прашањето на фискализација беше актуелно пред неколку години кога на заедничка средба од страна на УЈП беа разгледани барањата на претставниците на петте уставни верски заедници (МПЦ, ИВЗ, Католичката црква, Еврејската заедница и Евангелско-методистичката црква). Еден од аргументите за изземање на верските заедници од фискализација беше дека верските објекти се финансираат токму од доброволните прилози на верниците, кои не треба да се регистрираат како готовински плаќања.
Инаку, православните верници за услуга за венчавање треба да издвојат 6.000 денари, за крштевка 4.000, а за погреб 3.000. Средствата се уплаќаат на рака и за нив граѓаните не добиваат фискални сметки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Над 15.000 матуранти утре ќе полагаат мајчин јазик и литература

Над 15.000 матуранти утре ќе го полагаат мајчин јазик и литература, задолжителен дел во рамки на првиот екстерен испит.
За државна матура годинава се пријавени 15.004 кандидати, од кои 8.816 ученици се од средните стручни училишта, 5.966 од гимназиите и 222 од училиштата за уметничко образование.
Вториот екстерен испит од државната матура, кој е изборен (математика, англиски јазик, француски јазик, германски јазик, руски јазик, италијански јазик, филозофија, естетика), ќе се полага на 11 јуни.
Матурантите кои во јуни нема да ја положат државната матура или не во целост, ќе имаат втора шанса. На 12 август е испитот по мајчин јазик, а два дена подоцна е полагањето на изборниот екстерен испит.
Македонија
Вкусна трпеза и музика во 18 часот во Паркот на Франкофонијата во Скопје

Градоначалникот Горан Герасимовски ги поканува скопјани денеска во 18.00 часот на добра традиционална македонска и европска трпеза во Паркот на Франкофонијата. Герасимовски вели дека културно-гастрономскиот настан „Нож и виљушка на европска чинија“ e можност за дружење, културна размена и зајакнување на заедништвото.
„Денеска, со почеток во 18.00 часот повторно го организираме настанот ‘Нож и виљушка на европска чинија’, кадешто ќе дегустираме вкусна храна и ќе слушаме добра музика од диџеј Зоки Бејбе и Наде Талевска бенд. Центар поврзува – преку храна и музика. Ве чекаме во Паркот на Франкофонија да го прославиме богатството на различности со убава трпеза и пријатна атмосфера“, истакнува Герасимовски.
Гастрономскиот настан „Нож и виљушка на европска чинија“ е организиран од Општина Центар и истиот е отворен за сите граѓани.
Македонија
Објавен конкурсот за државната награда „Св Климент Охридски“ за 2025 година

Одборот за доделување на државната награда „Св. Климент Охридски“ распиша Конкурс за доделување на државната награда „Св. Климент Охридски“ за 2025 година.
Со оваа награда се оддава највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност.
Конкурсот за државната награда ќе трае од 1 до 30 јуни 2025 година.