Македонија
(Видео) Филипче до Сиљановска: Огромен ризик е спојувањето на безбедносните агенции

Претседателот на Социјалдемократскиот сојуз на Македонија, Венко Филипче, денеска оствари средба со претседателката на Република Северна Македонија, Гордана Сиљановска Давкова. На средбата се разговараше за актуелните политичките состојби во државата со фокус на партизацијата на безбедносните структури и евроинтеграцискиот процес.
Филипче на средбата изрази загриженост за ризикот од спојувањето на Агенцијата за национална безбедност со Агенцијата за разузнавање.
„Изразив загриженост и укажав дека сметам дека треба да реагира за некои работи кои сметам дека се во нејзина надлежност и ингеренции. Тоа е пред сè е партизацијата која се случува во дел од безбедносните структури. Укажав на ризикот што сметаме дека може да биде многу голем, доколку настане фузија на двете безбедносни агенции а се продолжи со ваква партизација, имајќи предвид дека сме имале такво лошо искуство во минатото, една таква гломазна партизирана институција може да се злоупотреби“, рече Филипче.
Во одговор на новинарско прашање а поврзано со спојувањето на безбедносните агенции, Филипче посочи, дека во времето на Владата на СДСМ се направи реформа и тие институции се поделени и професионализирани.
„Затоа сметаме и затоа реагираме дека треба да се запре партизацијата, што во овој момент се случува во Агенцијата за национална безбедност и дополнително сметаме дека обединувањето на агенциите од две во една навистина ќе направи една гломазна институција којашто тешко може да се контролира. Тоа и го укажав на претседателката денеска. И таа ги нотираше сите забелешки“, рече Филипче.
Претседателот на СДСМ Филипче очекува дека ваквата форма на политички дијалог на претседателката на државата со опозицијата да прерасне во редовни средби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Турција погодена од земјотрес со јачина од 4,6 степени

Турција денес беше погодена од земјотрес со јачина од 4,6 степени според Рихтеровата скала, објави Европско-медитеранскиот сеизмолошки центар.
Како што е наведено, епицентарот на земјотресот бил на длабочина од седум километри, околу 57 километри југоисточно од градот Баликешир во западна Турција.
Досега нема извештаи за повредени или материјална штета.
Ова подрачје веќе беше погодено од земјотреси, на почетокот на август и почетокот на септември, потсетуваат медиумите.
Фото: принтскрин
Македонија
(Видео) Андоновска: Ќе се гради Универзална сала, ја враќаме културата во фокусот

Македонија со ВМРО-ДПМНЕ започна време во кое уметноста се вреднува, културното наследство се чува, а културата станува видлива и достапна за сите. Владата предводена од ВМРО-ДПМНЕ ја враќа македонската култура во прв план-со над 2.500 поддржани проекти, нови инвестиции, обновени институции и силна меѓународна промоција, истакна на прес-конференција Викторија Андоновска од ВМРО-ДПМНЕ.
„Во 15 месечниот мандат Владата предводена од ВМРО-ДПМНЕ воведе делегиран буџет за 17 национални установи, се реализираа 551 проект од областа на заштитата на недвижното културно наследство, се реши статусот на 160 вработени во културните институции.
Наскоро ќе започне и изградбата на претходно стопираниот проект на „Стар театар“ во Струмица. По повеќе години застој почнува да се гради и Универзалната сала- симболот на Скопје, а воедно се уредува и гради Турскиот театар. Вкупната вредност на инвестициите за реализација на овие проекти е преку 30 милиони евра. Во текот на мандатот на оваа Влада ќе се гради и Драмскиот театар во Скопје чиј проект се ревидира.
Оваа година ќе започне реализацијата на проектот за интервентна заштита на „Македониумот“ симболот на македонската историја, идентитет и борба“, најави таа.
Појасни дека е започната реконструкција, санација и адаптација на поранешното кино „Партизан“ во Битола, инвестиција вредна 96 милиони денари.
Во Гевгелија, според неа, целосно се реконструира Старата чаршија којашто ќе ја задржи својата автентичност, но и ќе се трансформира во современо културно-туристичко јадро. Вредноста на инвестицијата е 40 милиони денари.
„По 7 години запоставеност, повторно се отвори комплексот „Македонско село“ кој низ својата автентична архитектура и традиција ја раскажува македонската културна приказна.
„Музејот на вода“ во Охрид, кој претходно беше запуштен и заборавен, го доби својот стар сјај, а неговата обнова изнесуваше околу 15 милиони денари. Исто така го продолживме и Проектот за возобновување на Свети Климентовиот универзитет на Плаошник.
ВМРО-ДПМНЕ ја враќа културата во фокусот, во срцето на македонското општеството. ВМРО-ДПМНЕ преку инвестициите во културата го прави вистинскиот избор за твојата иднина-иднина во која македонската приказна е видлива и вреднувана“.
Македонија
Старите униформи ќе се заменуваат со нови, поквалитетни и помодерни: македонската полиција се ребрендира

Министерството за внатрешни работи известува дека е објавен тендер за нови униформи за замена на старите, непрактични и нефункционални униформи со нови, модерни, квалитетни и функционални по терк на европските полиции.
„Министерството, во процесот, кој е целосно транспарентен и одговорен, оствари технички дијалог со дури 13 заинтересирани компании, при што беа земени предвид сите сугестии и предлози“.
Министерството апелира на тендерот да се јават сите заинтересирани компании и во утврдените рокови да може да се промовира новата, модерна, квалитетна и функционална униформа за оние што се грижат за безбедноста на македонските граѓани.
„Македонската полиција заслужува да биде модерна и функционална европска полиција.
Новата униформа во себе ќе содржи елементи како виндјакна, теренска јакна, теренски панталони – летни и зимски, кошули со кратки и долги ракави, капи, маички, чевли со потенок и со подебел ѓон и високи зимски и летни тактички чизми.
Тендерот е објавен на електронскиот систем за јавни набавки на следниот линк и на него може да учествуваат сите заинтересирани компании“, се истакнува во соопштението.