Македонија
(Видео) Филипче на самитот на ОН: Заедничка цел е достапна, квалитетна и долгорочно одржлива здравствена заштита

Универзалната здравствена покриеност е главна цел за здравствени реформи во нашата земја, истакна меѓу другото, министерот за здравство, Венко Филипче во своето обраќање на Самитот за универзалната здравствена покриеност на 74-тото Генерално собрание на Обединетите нации во Њујорк.
Филипче нагласи дека таа цел произлегува од заедничката визија на Владата на Република Северна Македонија и на Министерството за здравство, за здравје и благосостојба на секого и насекаде кон што се насочени и здравствените реформи во земјата.
„Заедничка цел е да се изгради достапна, квалитетна и долгорочно одржлива здравствена заштита со граѓаните во центарот на здравствениот систем, а исто така да се зајакнат чувствителноста и одговорноста на поединецот за своето здравје и здравјето на другите. Поставувањето на овој проблем како приоритет осигурува дека сите луѓе имаат пристап до здравствени услуги со доволен квалитет, а тоа ќе игра голема улога во намалувањето на здравствените нееднаквости во Северна Македонија“, потенцираше министерот за здравство Филипче во своето обраќање на Самитот за универзалната здравствена покриеност на 74. Генерално собрание на ОН.
Тој информираше дека Северна Македонија е меѓу првите земји на глобално ниво што ја разгледаа својата заложба за примарна здравствена заштита во согласност со Декларацијата на Астана и дека земјата го продолжи овој процес за време на првиот национален форум за здравствена заштита, што се одржа на 13 февруари 2019 година.
Министерот Филипче го запозна Самитот за универзалната здравствена покриеност за новата визија на земјата за примарната здравствена заштита како клучен национален приоритет насочен кон подобрување на севкупните перформанси на здравствениот систем и истакна дека земјата ја забрзува нејзината имплементација.
„Усогласувањето на примарната здравствена заштита со оваа визија ќе го зголеми нејзиниот капацитет за реакција и ќе обезбеди одржливост на здравствениот систем, спречување и намалување на товарот на незаразните заболувања и подобрување на здравјето и благосостојбата на населението во Северна Македонија“, рече во своето обраќање министерот Филипче и додаде дека мултисекторската соработка продолжува фокусирана на главната цел – да обезбедиме достапен и висококвалитетен здравствен систем ориентиран кон граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Потпишан договор за стратешко партнерство со Унгарија

На покана на министерот за надворешни работи и надворешна трговија, Тимчо Муцунски, денеска во еднодневна посета на Македонија престојуваше унгарскиот министер за надворешни работи и трговија, Петер Сијарто. Посетата беше заокружена со потпишување на Договор за стратешко партнерство помеѓу владите на двете земји.
„На средбата, двајцата министри се осврнаа на одличните билатерални односи, изразувајќи заемно задоволство од интензивниот политички дијалог и развиената секторска соработка. Беше поздравено и тридецениското пријателство и одличната трговска соработка, која бележи континуиран нагорен тренд во изминатиот период. Во тој контекст, од страна на двајцата министри беше констатирано дека македонско-унгарското партнерство е засновано на силни политички врски и развиена економска соработка, кои во претстојниот период ќе добијат уште позасилена динамика“, соопшти МНР.
Во фокусот на разговорите беа и перспективите и предизвиците на процесот на европската интеграција на нашата земја и засилената и недвосмислена поддршка од Унгарија на овој пат, која е насочена кон отворање на преговорите на нашата земја со ЕУ, со цел да се овозможи стабилизирање и подобра перспектива за нашата земја и за земјите од регионот.
Во таа насока, министерот Муцунски изрази уверување дека поддршката ќе продолжи со несмалено темпо и во претстојниот период, имајќи го предвид и неодамна потпишаниот Акциски план за споделување на знаење во однос на ЕУ-пристапувањето помеѓу министерствата за надворешни работи и надворешна трговија и министерствата за европски прашања на двете земји.
На средбата, исто така, стана збор и за сојузништвото и одличната соработка во рамки на НАТО, која е насочена кон справување со актуелните безбедносни предизвици и зачувување на европската и трансатлантската стабилност.
Во рамките на посетата беа потпишани и договор за соработка на владино ниво и договор за соработка во делот на образованието. Имено, министерот Муцунски и министерот Сијарто потпишаа Договор за стратешка соработка меѓу Владата на Република Северна Македонија и Владата на Унгарија, додека од страна на министерот Сијарто и министерката за образование и наука, Весна Јаневска, беше потпишан Меморандум за разбирање меѓу Министерството за образование и наука на Република Северна Македонија и Министерството за надворешни работи и трговија на Унгарија за соработка во рамките на Програмата Stipendium Hungaricum за годините 2026–2028.
Македонија
Годишно по 20 македонски студенти ќе добиваат стипендии за студии во Унгарија

Македонските студенти ќе можат да користат 20 стипендии годишно за да студираат во Унгарија на унгарски или на странски јазик. Приоритет ќе имаат апликанти кои сакаат да студираат во областа на наука, технологија, инженерство и математика (СТЕМ), како и медицински и здравствени науки и земјоделство.
Стипендиите ќе се доделуваат за редовни додипломски, постдипломски, едностепени магистерски студии и за докторски студии. Исто така и за скратени студии од три до десет месеци за стекнување академски кредити.
Меморандумот за разбирање со кој се регулира соработката во рамките на Програмата Стипендиум Хунгарикум за периодот 2026–2028 година денеска го потпишаа министерката за образование и наука Весна Јаневска и унгарскиот министер за надворешна политика и трговија Петер Сијарто.
Меморандумот предвидува студентите да добиваат платена школарина, сместување во студентски домови во кампусот на високообразовната институција или средства за покривање на трошоците за сместување, право на здравствени услуги, користење на бесплатни библиотечни услуги, како и месечен надоместок за покривање на основните трошоци.
Министрите Јаневска и Сијарто се согласија дека потпишувањето на Меморандумот ги потврдува и јакне пријателските односи меѓу двете земји и ја унапредува соработката во областа на високото образование, во интерес на развој на општество базирано на знаење.
Македонија
Без дозвола реконструиран, со употреба на несоодветни материјали: дискотеката во Кочани не ги исполнувала ниту минималните услови за угостителска дејност

Вчера се приведени 13 лица инволвирани во трагедијата во Кочани, потсети денеска на прес-конференција јавниот обвинител, Љупчо Коцевски.
Тој извести и дека денеска до Основниот суд во Кочани е поднесено обвинение против 34 физички и 3 правни лица за кривични дела поврзани со пожарот во дискотеката „Пулс“ во Кочани.
„Денеска, до Основниот суд во Кочани се поднесува обвинителен акт против 34 физички и 3 правни лица за кривични дела со кои предизвикале значителна опасност за животот и телото на луѓето и за имотот од поголеми размери на место на кое се собрале поголем број луѓе, односно за пожарот при настапот на музичката група ДНК на 16 март, каде што животот го загубија 62 лица, 157 добија тешки повреди и 54 лица имаат повреди“, изјави Коцевски.
За полицајците се бараат мерки за обезбедување присуство бидејќи при акциската контрола дозволиле употреба на пиротехника.
Јавниот обвинител предложи кон осомничените да се определат соодветни мерки за забрана за напуштање на живеалиштето и да се јавуваат кај институциите за спроведување на законот, одземање на патните исправи и слично.
Обвинетите делото го сториле со свесно постапување, рече обвинителот, и дејствувале спротивно на прописите за заштита.
Палењето на пиротехниката не било пријавено во полиција.
Тој рече дека тие се гонат за тешки дела против општата сигурност.
Во деталите за случајот Коцевски рече дека објектот не ги исполнувал ниту минималните услови за угостителска дејност.
За објектот, меѓу другото, немало основен проект за реконструкција со пренамена со соодветна статика и сеизмика, електротехнички и термички елаборати, како и елаборат за заштита од пожари.
Не донеле и не изработиле план за заштита и спасување.
Наспроти ова, првообвинетиот, сопственикот на објектот, презел градежни дејства и реконструиал и вградувал несоодветни материјали, кои носат ризик од предизвикување пожар, објасни Коцевски.
Во објектот не бил испочитуван ниеден пропис во однос на квалитетот на вградените материјали, носивоста и стабилноста на конструктивните материјали, излезот и влезот, паркингот, средства за гаснење пожари.
Обвинет е и братот на сопственикот на објектот, кој продавал влезници за поголем број посетители од дозволеното и дозволувал влез на лица помлади од 18 години иако бил свесен за незаконските дејства, појасни Коцевски како дел од деталите.
Тој потенцира дека во дискотеката никогаш не бил спроведен инспекциски надзор.
Оцени дека секоја од алките во случајот со трагедијата во Кочани имала моќ да го спречи трагичниот настан, но никој не го сторил тоа.