Македонија
(Видео) Фон дер Лаен: Вашето место е во ЕУ, нема сомнеж дека македонскиот јазик е ваш јазик
Претседателката на Европската комисија, Урсула фон дер Лаен, побара да се прифати францускиот предлог. Таа ги убедуваше пратениците дека местото на Македонија ѝ е во Европската Унија, дека со францускиот предлог не се задира во идентитеските прашања, а јазикот е македонски без фусноти. Таа посочи дека го разбира револтот што го има кај некои од пратениците бидејќи Македонија не ги почна преговорите по договорот со Грција, но го поздравува тоа што државата не се откажала од оваа цел.
„Пратеници, многумина од вас ќе бидат разбирливо фрустрирани што вашата држава сè уште не ги почнала пристапните преговори. И да ви кажам, и јас сум. Комисијата препорачува отворање на преговорите во последните 13 години. И, се разбира, ќе бидете фрустирани што отворањето на преговорите со ЕУ не се случи веднаш по договорот од Преспа. Ова беше горчливо. Но, никогаш не се откажавте, а и ние заедно никогаш не се откажавме. Заедно го следевме нашиот сон за една ЕУ. Заедно ќе го претвориме овој сон во реалност. Сите мора да го свртиме погледот напред, мора да ја искористиме можноста што е пред нас и да ги почнеме пристапните преговори, да работиме на патот што ве води во ЕУ. Тоа може да го направиме веќе следната недела, следната седмица, со преземање на првиот чекор од ревидираниот француски предлог. Сите сте свесни и запознаени со овој ревидиран предлог. Ги зема предвид грижите на сите страни. Бидете уверени дека Комисијата секогаш била покрај оваа држава, на ваша страна, продолжува да го прави тоа, да стои на ваша страна, да стои таму, како утре, така и задутре. Убедени сме дека ова е од историско значење. Но, одлуката е ваша и само ваша. На крајот на краиштата, станува збор за патот што вие го избравте, како што го избравте и претходно со Охридскиот рамоквен договор градењето на демократијата. Доколку го одобрите ревидираниот француски предлог, доколку го прифатите францускиот предлог, ќе го преземеме првиот чекор во преговарачкиот процес. Нема сомнеж дека македонскиот јазик е ваш јазик. Предлогот го прифаќа и вашиот национален идентитет. Можете да сметате на мене како претседател на ЕК дека ќе се осигурам оти процесот на пристапување ќе ги почитува европските принципи и стандарди. Идентитеските прашања не се дел од пристапните преговори“, посочи претседателката на Европската комисија, Урсула фон дер Лаен.
Според неа, ако се прифати францускиот предлог, кој ги штител македонските интереси, веднаш ќе се почне со скрининг-процесот.
„Сакав да бидам овде за да ви се обратам директно, за од мене да слушнете како Европа ве чека. Чекајќи и надевајќи се дека ќе направите уште еден чекор кон нашата Унија. Вашата држава е кандидат да стане членка на ЕУ од 2005 година. Многу од вас овде и многу други што се отсутни – работевте напорно за да станете членка на ЕУ. Четири години подоцна, во 2009 година, ЕК препорача да ги отвориме пристапните преговори со вас. Од тогаш постојано сме покрај вас. И, сега, конечно, би можеле да бидеме на прагот на еден одлучувачки чекор напред. Овде сум денеска бидејќи верувам дека ова е моментот да продолжите напред кон нашата заедничка иднина. Кон нашата заедничка иднина, во ЕУ, со Северна Македонија како полнопоравна членка. Повторно покажавте смелост, покажавте и решителност. Договорат од Преспа беше пример за храброст, две земји што се согласија да одат напред. Ова ви го отвори патот кон членството на НАТО. По повеќе од две години, Северна Македонија покажа дека е партнер од доверба, која обезбедува безбедност за алијансата. Јас знам дека истото ова ќе се случи кога вие ќе станете членка на ЕУ. Го знам ова бидејќи покажавте витален капацитет да го промените вашето општество кон подобро. Вашите напори за борбата против корупцијата се за пофалба. Воспоставивте силно досие за човековите права, имате слободни медиуми, имате енергично граѓанско општество, вие сте успешен модел за мултиетничко општество, кои со охридскиот Рамковен договор го избравте патот на мирот наместо конфликт“, посочи Фон дер Лаен.
Таа повика да се размисли пред да се донесе одлука. Ги посочи придобивките и потсети дека во светот има војна и пандемија.
„Некои велат дека е подобро нов договор отколку овој на Франција. Ваше право е тоа. Но, размислете колку се обидувавме да дојдеме до овде. Ве охрабрувам да ја искористите оваа можност. Со отворањето на оваа врата сега, Северна Македонија се зајакнува што ќе биде дел од преговарачкиот процес, ќе имате придобивки. Јас имам деца, некои имаат внуци и сите заедно сакаме едно нешто и споделуваме еден сон: еден ден да погледнеме назад и да кажеме дека сите наши деца и внуци се дел од исто европско семејство. Ова е иднината за која одлучувате овде, тука, денес, утре и во деновите што се пред вас. Пратеници, живееме во тешки времиња. Бидејќи пандемијата на Ковид-19 се протега во третата година, нејзините ефекти катастрофално влијаат, руската војна предизвика глобална криза во Украина, растат цените на енергентите. Се бориме со влошената климатска криза. Ова се предизвици со кои мора да се соочиме. Мора да ги совладаме. Вашата држава дорасна на задачата, стоите цврсто со Унијата, вие сте партнер од доверба, ви благодарам. Заслужувате да се движите напред. Сега е на вас да направите чекор“, посочи таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бендевска: Да го продолжиме заветот од Илинден и пораката од АСНОМ
По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република
Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност
Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република
Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во...
(Видео) Мицкоски: Илинден е симбол на жртвата која генерации пред нас ја дале за слободна Македонија
Премиерот на Македонија, Христијан Мицкоски, денеска од Скопје го честиташе големиот празник 2 Август – Ден на Републиката, Илинден. „Овој...
(Видео) Филипче од Крушево: Илинден е нашиот темел – заедно да ја продолжиме борбата за Македонија
Претседателот на СДСМ, Венко Филипче денеска од Крушево го честита 2 Август, Денот на Републиката – Илинден. „Го честитам празникот...
Kостадиновски: Нашето современо илинденско наследство е вистинската посветеност на владеењето на правото и правната држава
Претседателот на Уставниот суд, Дарко Костадиновски, упати честитка по повод Денот на Републиката, 2 август – Илинден. „Денес, 122 години...
ВМРО-ДПМНЕ: Илинден е ден на обединување, ден кога сите треба да се поклониме пред минатото и да се заветиме за иднината
ВМРО-ДПМНЕ упати честитка по повод Илинден. „Илинден е симбол на нашата непокорност, заветот на Крушево и борбата на партизаните за...
Гаши: Овој ден е симбол на историската борба за слободно, еднакво и демократско општество
Претседателот на Собранието, Африм Гаши, упати честитка по повод 2 Август – Денот на Републиката. „Во име на пратениците и...
Честитка од претседателката Сиљановска-Давкова по повод 2 Август, Илинден – Денот на Републиката
Претседателката на Македонија, Гордана Сиљановска-Давкова упати честитка по повод 2 Август, Илинден – Денот на Републиката. „Илинден е сржта на...
Меџити во Чаир, Касами во Тетово, Бакиу во Скопје – ВЛЕН ги објави кандидатите за градоначалници
Централното претседателство на ВЛЕН ги избра кандидатите за претстојните локални избори. Во Тетово за нов мандат ќе се бори актуелниот...
Браќа од Струшко нападнале семејство во возило во кое имало и деца, ја удирале жената со боксови и клоци
Основното јавно обвинителство Струга поведе постапка против две лица за кривично дело – Насилство. Двајцата браќа, по потекло од струшко,...
Арсовска до Ганиу: Сакаше да ги видиш сите 150 небезбедни згради, нема проблем, ќе ги видиш и ти и цела Македонија
Висар Ганиу лаже, фалсификува, злоупотребува и им овозможува на трети лица да се богатат преку градење згради сега, а кои...
Разрешувањето на Коцевски ќе продолжи од ноември поради изборите, и да даде оставка, Владата е во лавиринт, вели Мицкоски
Од ноември Владата ќе продолжи со процесот за разрешување на државниот обвинител онаму каде што застана, рече денес премиерот Христијан...
Мицкоски: Им благодарам на САД што ја коригираа тарифата од 33 на 15 проценти, оптимист сум дека ќе одиме уште подолу
Премиерот Христијан Мицкоски е задоволен од новите тарифи на САД кон Македонија од 15 проценти. Одговарајќи на новинарско прашање поврзано...
Маркетите да не прават трикови оти ограничувањата може да бидат годишни, не неделни или месечни, порача Мицкоски
Можни се годишни место неделни или месечни ограничувања на маржите за да се заузда растот на цените во маркетите. Премиерот...
Со ретровизорот ја удрил во главата и починала: обвинение за возач што имал слепило, а управувал товарно возило
Основното јавно обвинителство Кавадарци поднесе Обвинителен акт против едно лице за тешки дела против безбедноста на луѓето и имотот во...
Случајот со претседателката на антикорупциската комисија најматен настан за јули, според „Транспаренси“
„Транспаренси интернешнл – Македонија“ го објави редовниот месечен извештај „Бистро – матно“ за јули 2025 година, во кој се евидентирани...
Трамп ја објави листата на нови царини
Претседателот на САД, Доналд Трамп, потпиша извршна наредба со која се воведуваат повисоки царини за десетици земји во целиот свет...
Македонија со царина од 15 отсто
Американскиот претседател Доналд Трамп рано утрово по македонско време објави нови царински стапки. Македонија, доби стапка од 15 отсто, идентична...
Денес, втора седница на Советот за безбедност
Претседателката Гордана Сиљановска-Давкова ја свика втората седница на Советот за безбедност што ќе се одржи денес, 1 август, со почеток...
Во моментот нема активни пожари, надлежните апелираат да се внимава за Илинденските празници
Според податоците на Центарот за управување со кризи (ЦУК), заклучно со 18:00 часот , нема ниту еден активен пожар. Шест...
Автомобил се судри со автобус кај Тетово – тројца загинати, едно дете е повредено
Три лица го загубија животот, а едно дете е повредено во тешка сообраќајна несреќа што попладнево се случи на автопатот...
