Македонија
(Видео) Форум за управување со интернет: Најголем непријател на лажните вести е вистината

На третиот Форум за управување со интернет, што денеска се одржа во Скопје, говореа министерот Роберт Поповски, задолжен за комуникации, отчетност и транспарентност, заменик-министерот за информатичко општество и администрација, Александар Бајдевски, и Марјан Забрчанец, посебен советник за односи со јавност на претседателот на Владата на Северна Македонија Зоран Заев.
Министерот Поповски во своето обраќање рече дека иако терминот управување подразбира дека управувањето со интернетот е одредена рамка на правила, управувањето со интернет мора да се погрижи интернетот да остане глобален, отворен и слободен простор и простор каде што луѓето уживаат исти права и имаат ист степен на заштита.
„Во нашата земја, која не многу одамна имаше сериозни проблеми со слободата заради репресивните политики во сферата на медиумите и слободата на изразувањето, интернетот беше единственото место за слободоумната мисла. Затоа, наша обврска е да ги направиме можностите на интернет отворени за сите: со намалувањето или целосното укинување на дигиталниот јаз, со гаранции за еднаков пристап и со овозможување на придобивките од мрежата да им припаѓаат на сите. Без исклучок. Во таа насока на Форумот за управување со интернетот – Македонија гледам како на точка од која на креирањето на нашата визија ќе ѝ посветиме поизострен фокус и поголема енергија со колку што е можно пошироката инклузивност на сите засегнати страни. Интернет-просторот им припаѓа на сите. Ниту една страна нема ниту може да има ексклузивно право во оваа сфера“, рече министерот Поповски во своето обраќање.
Посебен акцент на овој настан министерот Поповски стави на справувањето со манипулативната пропаганда на интернет како мрежа преку која изворите на лажните вести се пуштени на максимум.
Како една од мерките за борба против лажните вести од планот за одлучна акција против ширењето на лажните вести на Владата на Северна Македонија, ја издвои медиумската писменост која ќе биде многу позастапена во образованието и дека во еден процес на активно партнерство со граѓанскиот сектор ќе се спроведат програми и тренинзи за медиумска писменост и за вработените во државната администрација.
Заменик-министерот за информатичко општество и администрација, Александар Бајдевски, во дел од своето обраќање се задржа на имплементацијата на 5Г во Република Северна Македонија за значителен пораст на квалитетот на интернетот за корисниците, за поголема сигурност и за проширување на бројот на понудени услуги за граѓаните.
„Клучната мерка за поддршка на Националниот оперативен бродбенд-план е создавањето јавна оптичка мрежа, која главниот фокус го става на максимизирање на поволностите од имплементацијата на 5Г, вклучително и развојот на економскиот пазар преку поддршка и развој на нови услуги во разни вертикални сегменти на пазарот“, истакна заменик-министерот за информатичко општество и администрација, Александар Бајдевски.
Во делот на панелот на Форумот за управување со интернетот посветен на темата „Mедиуми – медиумска писменост, регулација – саморегулација – борба против дезинформации“, Марјан Забрчанец, посебен советник за односи со јавност на претседателот на Владата, Заев, истакна дека Владата тргнува од својата програмска и стратешка определба за објективно и транспарентно информирање за своето работење и дека следејќи ги овие принципи, од последна во регионот, денеска е лидер по транспарентно работење и информирање на јавноста за своите политики.
„Најголем непријател на лагата е вистината и затоа напорите и политиките на сите засегнати страни треба да одат во насока на обезбедување канали за ширење на вистината. Треба да го поттикнуваме сомнежот и да создаваме критички настроена јавност која ќе има капацитети да ги препознава лагите и да ја шири вистината. Најважно е да се прашаме што можеме сите ние да направиме во борбата против лажните вести и дезинформации, сите засегнати од овој феномен, за да се справиме со оваа појава, која сериозно ги поткопува демократските вредности, ги поттикнува омразата и конфликтите. Медиумската писменост е само една од мерките и за таа цел веќе е поведена иницијатива со граѓанскиот сектор, кој има одлично искуство во оваа сфера, и со институциите на Владата, пред сè, Министерството за образование и наука и Бирото за развој на образованието, да се исцртаат контурите за најдобар, применлив и одржлив модел за медиумска писменост во образованиот процес“, информира Забрчанец и додаде дека во делот на соработката со медиумите на овој план Владата целосно ќе ја поддржува саморегулацијата како методологија според која медиумите самите ќе понудат решенија според професионалните кодекси и стандарди и во таа насока истакна дека од особен придонес е листата на медиуми, кои се придржуваат до овие начела што ја подготвуваат Советот за етика во медиумите и Здружението на новинарите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Предлог-резолуцијата со Бугарија е штетна – ВМРО-ДПМНЕ отвора затворени прашања

Потпретседателката на СДСМ, Кристина Костова, оцени дека предлогот на ВМРО-ДПМНЕ за заедничка резолуција со Бугарија за македонскиот јазик и идентитет е штетен и претставува нов удар врз македонските национални позиции.
„Станува збор за свесно враќање наназад. Клучното прашање е зошто се отвораат теми кои се веќе затворени, кога македонскиот јазик и идентитет се неспорни, потврдени и признаени во светот и Европа“, изјави Костова како одговор на новинарско прашање.
Според неа, ваквиот потег му дава дополнителен маневарски простор на бугарскиот политички фактор за нови условувања.
Таа оцени дека ВМРО-ДПМНЕ нема никакво влијание во Европскиот парламент, што, како што рече, се покажало и со гласањето за последниот извештај за Македонија.
Македонија
(Видео) Костова: Трошоците за живот растат, на четиричлено семејство му се потребни над 65.000 денари за основни трошоци

Граѓаните од месец во месец се посиромашни – трошоците за живот растат, а платите стагнираат. Според последните податоци, на едно четиричлено семејство во јули му се потребни над 65.000 денари само за основни трошоци. Само за храна, им требаат речиси 24.000 денари. Тоа е повеќе од минималната плата која стои ниско во место, додека цените пробиваат плафон, изјави Кристина Костова, потпретседателка на СДСМ.
Таа додаде дека за само три месеци, синдикалната кошничка е поскапа за 2.637 денари, а годишната инфлација достигнала 4,5%.
„Ова не се бројки на „четврта економија“, туку алармантни податоци за економија во колапс. Јасен, недвосмислен доказ за целосниот дебакл на економските политики на Владата на Христијан Мицкоски. И во вакви услови, додека народот не знае што ќе стави на трпеза, наместо да преземе мерки, Мицкоски прави весела математика со „пет типови синдикални кошнички“.
Фактот дека народот нема пари не може да се сокрие со инженеринг во бројот на кошнички“, рече Костова.
Кога станува збор за функционерите, додаде таа, има пари, а за народот нема.
„Македонија е на дното по животен стандард во Европа. Време е Владата да престане со ПР и калкулации и конечно да ги прифати мерките што СДСМ ги предлага од првиот ден: зголемување на минималната плата на 500 евра и укинување на ДДВ на храна. Ова се вистински, конкретни чекори што ќе донесат реална помош и ќе го подобрат стандардот на граѓаните“, рече Костова.
Македонија
Алиу во Тетово: 155 луѓе од Клиничката болница ќе добијат договори на неопределено време

Министерот за здравство, Азир Алиу, денеска, во Тетово, оствари средба со 155 лица – медицински персонал и со раководството на Клиничката болница – Тетово, при што инфирмира дека, конечно, се става крај на долгогодишната неправда и ќе ги добијат договорите.
„Една институција, за да биде компатибилна и да нуди услуги, кои се квалитетни, има три неопходни столба – едниот е инфраструктурен, вториот е организациски и третиот е човечкиот фактор, за кој веруваме дека е најважен, затоа инвестираме во подобрување на капацитетот на здравствените институции. Задоволство ми е што токму првата средба ми беше тука со колегите, кои имаат еден од највиталните нерешени проблеми, а тоа е вработувањето. Некои од нив работеа и по 10 години, а други по месец или година, беа и без плата, за да бидат дел од институцијата. Денес, по еден и пол месец, задоволни сме што тие се веќе дел од Клиничката болница – Тетово, 155 вработени, чии процедури административно ги завршивме. Сега крајниот чекор е за полагање администратеивен тест за да може да се потпишат договорите меѓу директорот и вработените“, изјави министерот Алиу.
Министерството за здравство останува посветено на принципите на еднаквост, почит и институционална правда, особено кон професиите, кои се столб на здравствениот систем.