Македонија
(Видео) Чулев: Заедно ќе ја победиме пандемијата
Министерот за внатрешни работи, Наќе Чулев во обраќање до граѓаните и припадниците на Министерството за внатрешни работи, изрази надеж дека пандемијата ќе биде победена и истакна дека важно е победата да не биде „пирова“, односно да биде со што помалку изгубени човечки животи, затоа што само човечкиот живот има непроценлива вредност.
„Борбата за секој човечки живот, за здравјето на граѓаните мора да биде бескомпромисна, сеопфатна, дисциплинирана – со еден збор императивна сама по себе! Институциите на системот, особено оние што се на првата линија во стратешката превенција и справување со пандемијата, а тука пред се мислам на министерствата за здравство, на полицијата, на армијата но и другите важни чинители во вакви кризни состојби, мораат, крајно пожртвувано, како и до сега да ги вложат сите свои капацитети, сите свои расположиви потенцијали за да го обезбедат здравјето и здравствената сигурност на секој наш граѓанин. Ние во целосна соработка со вас почитувани граѓани тоа и ќе го направиме“, рече Чулев.
„Се работи за мисија која нема друга алтернатива и која можеме да ја реализираме сите заедно, сплотени и солидарни. Конечно, таквото заедништво, денес на големиот христијански празник Велигден, треба да биде одраз на нашата свесност за важноста на таа највозвишена морална вредност, на највисоката етичка доблест што треба да ја оживотвориме како конкретно дело а не пароли: пожртвуваност за секој поединец! И не само сега, туку и во деновите потоа кога ќе мораме со ист ако не и уште посилен напор да се соочиме со лузните што пандемијата ќе ги остави зад себе. Оти луѓето се тие што го прават општеството, а не спротивно.
Денес на овој голем празник сакам уште еднаш да ја истакнам и потенцирам важноста на полицијата во овие значајни денови за сите нас и уште еднаш да изразам признание и благодарност за нивната храброст и нивната пожртвуваност во сиот овој период.
На крајот дозволете ми на сите наши граѓани од христијанска вероисповед да им го честитам големиот празник на Христовото воскресение, со една единствена желба: сите ние независно на верската или друга определба да бидеме мудри и разумни, сочувствителни и кооперативни, истрајувајќи и победувајќи го премрежието со кое што човештвото се соочува денес. Покрај сите други успеси и вечната потрага по совршенство, подеми и падови, на крајот на денот се се сведува на првата и последна, една и единствена вредност, која човекот може да ја постигне, а тоа е да има љубов, блискост, да има семејство. Во оваа прилика уште еднаш упатувам порака, денешниот ден празнувајте го во кругот на семејството и останете дома.
Честит велигден. Христос воскресна. Навистина воскресна!“, истакна Чулев во обраќањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.