Македонија
(Видео) Шахпаска: Успехот ќе биде целосен ако охрабриме најмалку уште една жена да зачекори храбро во светот на мажите
Министерката за труд и социјална политика, Јагода Шахпаска, денеска учествуваше на меѓународната конференција „Жените во надворешната политика“, организиран од страна на Министерството за надворешни работи. Во своето обраќање на тема „Ковид-19 и неговото економско влијание врз жените“, рече дека и покрај светската здравствено-економска криза, Министерството за труд и социјална политика донесе два клучни закона – Законот за спречување и заштита од дискриминацијата и Законот за спречување и заштита од насилството врз жените и семејното насилство.
„Изминатава една и пол година нашето општество, а верувам и целиот свет, се увери колку жените на своите плеќи, секоја во различен сектор, го понесе товарот од здравствената и економската криза. Фактот дека 74 проценти од здравствените работници се жени говори за нивното присуство во првите борбени редови во справување со пандемијата. Во градинките, во образованието, во трговијата, каде што доминантно се вработени жени, се покажаа нивната храброст и упорност. Дадоа сѐ од себе и не дозволија здравството да потклекне, образованието да застане, децата да не бидат згрижени, продавниците да бидат затворени“, рече Шахпаска.
Според неа, формирањето на првата независна и професионална Комисија за заштита од дискриминацијата е од големо значење бидејќи таа спроведува мултисекторски пристап на институциите во борбата против насилството врз жените и семејното насилство. Исто така, во насока на унапредување на родовата еднаквост во нашата држава, Министерството за труд и социјална политика работи на подготовка на законот за родова еднаквост, кој треба да овозможи унапредување на положбата на жените и еднакви можности во остварувањето на правата, еднаков пристап до ресурси, еднакво учество во јавниот и политичкиот живот, еднаквост во носењето одлуки.
„Вашиот, мојот, нашиот професионален успех, ќе биде целосен само доколку дадеме поддршка, охрабриме, поттикнеме, мотивираме, барем уште една жена да зачекори храбро во светот на мажите. Само на тој начин ќе ја оствариме нашата мисија и ќе ја исполниме визијата и на Беназир Буто, првата жена премиерка на Пакистан, која во едно доминантно машко општество, прилично затворено за нови и прогресивни идеи, успеа да создаде слободно, отворено и прогресивно општество“, порача Шахпаска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Воведуваме „Центарска картичка“ со попусти за културни, спортски настани, локали и продавници
Кандидатот за градоначалник на Општина Центар, Горан Герасимовски, денеска најави дека се воведува „Центарска картичка“ со попусти за културни и спортски настани, локали и продавници.
„Секој центарец добива еднаш годишно бесплатна карта за театарска претстава, а за секоја следна купена карта добива 20% попуст. Со картичката, овоможуваме и 20% попуст за натпреварите на нашиот најтрофеен клуб „Работнички“, како и попусти за влез на базен. На нашите центарци, на децата и возрасните им овозможуваме подобри услови и поволности“, рече Герасимовски.
Македонија
Почина Агим Јонуз
Политичкиот анлитичар, Агим Јонуз, почина во Скопје на 63 години по боледување.
Јонуз беше активен во политичкиот живот во Македонија не само како аналитичар и колумнист, туку и како поранешен советник и портпарол на поранешниот претседател на Собранието, Лупчо Јордановски и на поранешниот премиер Бучковски.
Во 2021 година Јонуз беше носител на листа на советници за Град Скопје предложен од „Твоја Партија“.
Јавноста го познаваше како чест гостин во политичките дебатни емисии на телевизиите.
Погребот на Агим Јонуз ќе се одржи утре, 26 октомври 2025 година, на гробиштата во Бутел.
Македонија
ВМРО-ДПМНЕ веќе има 35 градоначалници, рече Мицкоски по повлекувањето на опонентите од Могила и Македонски Брод, очекува 59
Премиерот и претседател на ВМРО-ДПМНЕ, Христијан Мицкоски од денешниот митинг во Неготино изрази увереност дека кандидатката од ВМРО-ДПМНЕ која има предност пред нејзиниот опонент од СДСМ, ќе биде следниот градоначалник на општината.
Мицкоски нагласи дека граѓаните јасно ја изразиле својата волја и доверба кон ВМРО-ДПМНЕ и Коалицијата, која во првиот круг освоила 33 градоначалници, наспроти тројца од СДСМ, а во вториот круг влегла во 26 општини.
„Веќе во две општини противниците на нашите кандидати се откажаа – Македонски Брод и Могила – така што во овој момент коалицијата има 35 градоначалници и уште во 24 општини е во втор круг. Тоа се 59 потенцијални градоначалници“, рече Мицкоски, додавајќи дека тоа ќе биде историски најголем триумф на македонската политичка сцена.
Тој посочи дека ВМРО-ДПМНЕ е апсолутен победник на овие избори, имајќи мнозинство и во 58 општински совети, а го истакна и водството на кандидатот за градоначалник на Град Скопје, со предност од над три спрема еден во однос на противкандидатот.
Мицкоски ги повика граѓаните масовно да излезат на гласање на 2 ноември и да го заокружат бројот 9, за, како што рече, да се потврди „најголемата победа во историјата на Македонија“.

