Министерот за одбрана на Црна Гора, Предраг Бошковиќ, и началникот на Генералштабот на војската на Црна Гора, Драгутин Дакиќ, присуствуваа на Денот на високи гости на Криволак. Тие ги посетија припадниците на Војската на Црна Гора кои на Криволак изведоа боево гаѓање, по што беа во посета и на Центарот за обука на пилоти во касарната Петровец.

Министерката за одбрана, Шекеринска, која го пречека својот црногорски колега во Петровец, ги потенцираше одличните билатерални односи во доменот на одбраната меѓу двете земји, се заблагодари на силната поддршка што Македонија ја добива од Црна Гора на патот кон НАТО и рече дека позитивните ефекти кои ги има Црна Гора по зачленувањето во НАТО, се голем поттик за Македонија да продолжи цврсто по тој пат.

„НАТО-поканата ја чекавме 10 години и овие 10 години видовме што значи запирање во интегративните процеси. Сметаме дека оваа историска шанса со НАТО-покана и можност да ги почнеме преговорите со ЕУ, Македонија нема да ја испушти. Задоволни сме што со членството во НАТО, Црна Гора покажа дека има и позитивни политички, но и економски ефекти и затоа сакаме час поскоро Македонија да стане членка на НАТО. Подигнат животен стандард, држава која се темели на демократски принципи, на владеење на право, на моќни сојузници и пристапување кон развиениот свет. Тоа е шансата која Црна Гора ја искористи, тоа е шансата која Македонија сега нема да ја пропушти“ рече министерката Шекеринска.

Црна Гора има најдобри билатерални односи со Македонија во регионот рече министерот Бошковиќ, кој ја потврди силната поддршка за Македонија да стане 30-тата земја членка на НАТО.

„Црна Гора пред нешто повеќе од една година стана полноправна членка на НАТО и ние се залагаме целиот регион да стане дел од најголемиот воено – политички сојуз. Тоа е најдобар начин регионот да се избори со сите предизвици и да се посвети на економски развој и подобар живот за своите граѓани. А за тоа да се направи, пред сè регионот треба да е безбеден, да се почитуваат човековите и други права, што е единствено можно со полноправно членство на сите држави на Западен Балкан во Северно-атлантската aлијанса. И поради тоа бевме најголеми поддржувачи на Македонија во НАТО и ги ставивме сите ресурси кога е Македонија во прашање. Она што можам да го пренесам на сите граѓани на Македонија е дека Црна Гора во претходната година дена имаше значаен бенефит од членството во НАТО. Од потполно смирување на политичките тензии до економски бенефити кои се многу добри“, рече Бошковиќ и додаде дека е сигурен дека референдумот ќе успее а Македонија многу бргу ќе стане полноправна членка на НАТО.

Центарот за обука на пилоти на Петровец, кој денеска го посетија двајцата министри, претставува еден од најсовремените објекти за изведување ваков вид обука во Република Македонија па и во регионот. Двајца припадници на Армијата на Црна Гора, поранешни питомци на Воената aкадемија во Република Македонија, се првите двајца странски државјани кои ја завршија обуката за пилоти во нашиот центар. Вежбата на Криволак на припадници на Војската на Црна Гора, на која денеска присуствуваше црногорскиот министер, претставува дел од Планот за билатерална соработка со Црна Гора во 2018 година и е во линија со изразената подготвеност на Министерството за одбрана за засилена билатерална соработка со земји членки на НАТО од регионот и пошироко, како и сигнал за квалитетот и условите за обука кои АП Криволак ги овозможува.