Македонија
(Видео) Шекеринска: Над 20 отсто од буџетот за одбрана наменети за опремување и модернизација

Буџетот за 2021 година е буџет за одбраната на земјата како членка на НАТО Алијансата. Годинава покажуваме дека обврските, стандардите, критериумите кои што сме ги прифатиле како земја членка на НАТО ги почитуваме. Затоа Северна Македонија и оваа година го зголемува буџетот за 0,2% од БДП, движејќи се кон посакуваните 2%, но годинава за првпат целосно ја исполнуваме и втората обврските на земјите членки на НАТО која што произлезе од Самитот во Велс – а тоа е повеќе од 20% од буџетот за одбраната да се издвои за опремување и за модернизација, рече министерката за одбрана, Радмила Шекеринска, на денешната прес-конференција на која го презентираше одбранбениот буџет за 2021 година, кој трета година по ред расте и во 2021 година ќе достигне 1,57 посто од бруто домашниот производ, односно над 11 милијарди денари.
Таа кажа дека со буџетот за 2021 година ќе го продолжиме процесот на опремување и модернизација на Армијата, за што се обезбедени 38 посто повеќе средства отколку во буџетот за 2020 година.
Со овој буџет се добива и ново подмладување на Армијата, подобрување на стандардот на армиските припадници, квалитетна логистичка поддршка, реконструкција на армиските објекти, подобри услови на најголемиот полигон и Криволак и стабилно финансирање на Армија која е дел од Алијансата.
„Кризната состојба со КОВИД–19 во која што се наоѓаме најдобро покажува дека инвестирањето во Армијата е инвестиција во безбедноста на сите граѓани. Во овие три години, порастот на буџетот за одбраната ни овозможи да добиеме мотивирана, подобро обучена и подобро опремена Армија. Денес тоа не е само Армија на Република Северна Македонија, денес тоа е и армија на земја членка на НАТО. Подготвена да одговори на секој предизвик како што во моментов и помага на државата во справувањето со кризата“, информираше министерката и додаде дека во однос на овогодинешниот буџет, одбраната во 2021 година ќе има повеќе средства за речиси 10 проценти во однос на буџетот за 2020 година.
Министерката истакна дека изминатите три години фокусот на вниманието беше ставен на состојбата со персоналот, особено во Армијата каде платите беа зголемени за најмалку 16 проценти, а во некои категории и повеќе, и преземени беа и конкретни чекори како измени во Законот за служба во Армијата со цел, преку зголемување на интересот за воената професија, да се обезбедат квалитетни професионални војници и да се зајакне и подмлади старешинскиот кадар. Продолжува и исплатата на станарина за припадниците на Армијата која започна од први март годинава.
Пример за успешното зголемување на интересот, рече министерката, е последниот конкурс за професионални војници каде за едно место се пријавија 10 кандидати, споредено со конкурсите од претходните години кога за едно место имаше пријавено во просек по само 1 до 1,5 кандидати.
Шекеринска истакна дека до крајот на 2020 година ќе имаме вкупно 270 нововработени професионални војници, и најави дека следната година овој број ќе се зголеми за уште дополнителни 200 со што значително ќе се подмлади армискиот кадар, особено во делот на професионалните војници.
Продолжува и инвестирањето во човечките капацитети – во 2021 година се планира прием на 54 нови офицери, дел од Воената академија, но и од граѓани кои претходно завршиле цивилен факултет, а се од критични специјалности важни за Армијата.
По цели 11 години пауза, започнува процесот на обновување на подофицерскиот кадар, кој е ’рбетот на Армијата, истакна Шекеринска и додаде дека заради 11-те години без курс за подофицери во моментов има дури 456 подофицери помалку од потребниот број.
„Неодамна заврши конкурсот за избор на кандидати и во следниве четири месеци ќе имаме два курса во кои што по 60 професионални војници ќе добијат шанса да бидат подофицери на нашата Армија. Со тоа, во овој дел навистина ќе решиме еден проблем кој што траел една декада“, порача министерката за одбрана.
Како што беше најавено, од 2021 година започнува и стипендирањето на студенти за критичните специјалности во Армијата, што е потврда дека вложуваме во луѓето и во нивните знаења и вештини кои и се потребни на Армијата.
„За припадниците на Армијата во меѓународни мисии и операции, во буџетот имаме 447 милиони денари од кои најголемиот дел – 6 милиони евра се за плати и надоместоци, а останатиот дел за логистички трошоци“ рече министерката и дополни дека со тоа исполнуваме уште една задача во споделувањето на товарот на земјите членки на НАТО, а тоа е придонесот во меѓународни операции, кој го зголемуваме.
Дома, продолжуваме да ја подобруваме и логистичката поддршка на Армијата – ја снабдивме Армијата со униформи, чизми, материјални средства и муниција и не само што го решаваме само наталожениот проблем, туку „правиме систем во кој тој проблем не смее веќе никогаш да се појави“.
„Со средства во буџетот од 2021 година ќе обезбедиме целосен континуитет на редовно снабдување со потребните материјали, замена на униформи, чизми, ќе набавиме свечени униформи и комплетирање на целиот тој комплет. Даваме дополнително спортска целосна опрема која што ќе ги зајакне капацитетите и ќе ја зајакне кондицијата во нашата Армија. Но, се разбира обезбедуваме и опрема и муниција од секаков вид за вежби, со главен фокус на подготовка на нашата НАТО декларирана единица Лесната пешадиска борбена група“, рече министерката.
Но, главниот дел и многу важен дел од нашата работа во 2021 година, порача, ќе биде да го продолжиме процесот на опремување и модернизација на Армијата, за што се обезбедени 2,8 милијарди денари или 25 посто од одбранбениот буџет.
„Навистина инвестираме во следна генерација опрема, следна генерација вооружување, обезбедување на техника, обезбедување на соодветна опрема која што ќе доликува на земја членка на НАТО“, рече Шекеринска. Со повеќегодишни договори набавуваме нови оклопни возила, неборбени возила, логистичка опрема за декларираните единици, информатичка опрема и опрема за сајбер безбедност, опрема за пешадија, артилериски средства.
Продолжуваат и капиталните инвестиции и тоа со забрзано темпо – за реконструкција на објекти и инфраструктура во 2021 година ќе има 25 посто повеќе отколку во 2020 година, кога беа успешно завршени повеќе вакви проекти, меѓу кои и реновирањето и опремувањето на објектот во Куманово каде сега е сместена командата на Бригадата на Југоисточна Европа, како и целосното реновирање на два големи објекти во касарната „Илинден“.
Министерката информираше дека планираните 328 милиони денари за оваа намена ќе се инвестираат во реновирање на нови објекти, на патната инфраструктура и објектите за сместување и обука на полигонот „Криволак“, кој, рече, е еден од клучните капацитети со кои Северна Македонија дава придонес кон колективната безбедност на НАТО.
„Уште во 2021 очекуваме повторно на ’Криволак’ да бидеме домаќини на една голема воена вежба ’Одлучен удар 21’ каде што навистина ќе покажеме дополнително кои се капацитетите, кои се можностите на овој полигон, не само за нашата Армија, туку и за сите сојузници“, рече министерката. Додаде дека инвестициите и осовременувањето на овој полигон, ќе ни даде шанса не само да придонесеме во колективната безбедност, туку и да имаме некакви бенефити за нашата економија и за нашиот буџет.
„Со предложениот буџет за 2021 година во одбраната за нови 0,2 проценти од БДП, со издвојувањето на 25% за модернизација, покажавме дека на нашиот збор може да му се верува. Дека продолжуваме со исполнување на обврските како и во периодот кога чекавме на членство во НАТО. Тоа не го правиме, сета оваа инвестиција, вложување во луѓе и во опрема, не го правиме само за НАТО туку пред се го правиме за својата држава, за нашите граѓани и за нивната и наша заедничка безбедност. Добра држава значи и добра Армија, а во добра Армија треба да се инвестира. Она што го покажавме минатите години, ќе продолжиме да го правиме и во 2021. Да инвестираме таму каде што резултатите веќе се гледаат “, заклучи министерката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дали пироманите и некрофилите од СДС се радуваат на пожарите и мислат дека ќе помине паниката која ја прават во државата со фотографии од пожари во Шпанија, прашуваат од ВМРО-ДПМНЕ

Пироманската и некрофилската СДС сака да создаде некаква паника и хистерија помеѓу народот и дава се од себе да направи некаква слика дека Владата не се справува со пожарите, нешто во кое што никој не им верува, велат од ВМРО-ДПМНЕ.
СДС, додаваат од партијата на Мицкоски, тоне во својата безидејност и немајќи како да докажат дека Владата предводена од ВМРО-ДПМНЕ не се справува со пожарите, користат слики од пожари во Шпанија за да пробаат некако да си ја потврдат тезата.
„Во Бугарија има над 240 пожари, во Грција над 50, во Турција над 80, во Албанија над 40, во Косово на 10тина. Се евакуираат граѓани од местата каде што имаат пожари, се повикуваат ЕУ механизмите, надлежните институции и пожарникарите се 24 часа на терен и цел Балкан е на силен удар на високи температури и пожари кои уништуваат куќи, имоти, земјоделски површини. Во неколку од овие држави имаме дури и жртви.
Од друга страна пак, во Македонија имаме 8 активни пожари, 7 под контрола и 36 изгаснати пожари. Тоа значи дека надлежните реагираат брзо и ефикасно. Тоа значи дека она што го говорат пироманите и некрофилите од СДС, не е воопшто точно“, се истакнува во информацијата од партијата на власт.
Според нив, граѓаните знаат дека СДС изминатите 7 години не успеа да се справи со пожарите, а Владата предводена од ВМРО-ДПМНЕ ги користи сите механизми кои се пристапни да ги изгаснат пожарите и успешно се справува.
„Прашањето е, дали СДС со ова сака да го покрие сомнежот дека лица блиски до нив имаат некакво учество во подметнувањето на пожарите, кои за среќа веднаш се локализираат, ставаат под контрола и гасат.
Следен пат кога пироманите и некрофилите од СДС ќе говорат за пожари и неуспеси, нека се обидат барем сликата да биде од Македонија“.
Македонија
И јас ќе ги прашам Фетаи и Меџити дали користеле службени возила за приватни или партиски цели, вели Мицкоски

Десет дена по медиумските објави, во кои се гледаат службени возила на вицепремиерите Изет Меџити и Арбен Фетаи нешто пред полноќ паркирани пред трговскиот центар „Мавровка“, премиерот Христијан Мицкоски не знае дали таму биле на владин состанок. Тој денес рече дека ќе ги праша на каков состанок биле со службените возила.
„Ние како Влада работиме до доцна навечер, и јас исто така. Сигурно биле на состанок во кој имало потреба и поврзани работи со Владата, а доколку не биле, тогаш треба да им се извинат на граѓаните. Ако ги користеле за приватни или партиски цели, да им се извинат на граѓаните затоа што ги трошат ресурсите на граѓаните. Но, доколку имале состанок на тема поврзана со владините политики, тогаш во ред. Претпоставувам дека тие ќе го дадат одговорот, а и јас ќе ги прашам“, рече премиерот Мицксоки.
Екипа на „360 степени.мк“ на 18 јуни објави дека ги фотографирала службените автомобили на заменик-претседателот на Владата задолжен за добро владеење, Арбен Фетаи, и на вицепремиерот и министер за животна средина, Изет Меџити, паркирани на булеварот Крсте Петков-Мисирков пред трговскиот центар „Мавровка“ околу 23 часот, во близина на партиски штаб на „Вреди“, чии членови се обајцата.
Вицепремиерите сѐ уште јавно не кажаа на каков состанок биле.
За да се избегне користењето службени возила за приватни и за партиски цели, оваа Влада најави регистарски таблички во боја за да може секој граѓанин да ги разликува од приватните возила и да пријави сомнеж за злоупотреба, но најавата сѐ уште не е реализирана.
Македонија
Состојбата со пожарите е под контрола, ангажирани се и Армијата и полицијата, вели Мицкоски

Премиерот Христијан Мицкоски, одговарајќи на новинарско прашање во врска со состојбата со пожарите и тоа како државата се справува со ситуацијата, изјави дека е повикан ЕУ-механизмот за помош, но мобилизирани се сите капацитети во Македонија за справување со пожарите и состојбите сега се под контрола.
„Имаме од 30, па и повеќе пожари секој ден. Вчера беа над 50 пожари. За повеќето од нив постојат основани сомневања дека се подметнати или, пак, се случиле од негрижа. До сега можам да кажам дека во јули ја држиме работата целосно под контрола. Во функција се сите оперативни летала што ги имаат Дирекцијата за заштита и спасување, Армијата и полицијата. Во функција се и оние возила, специјални возила, условно да кажам, што ги подготвивме бидејќи знаевме што нè очекува вакво лето. Го активиравме и европскиот механизам, мислам дека е активиран уште пред неколку дена“, посочи Мицкоски.
Огнена стихија има насекаде во Европа, рече премиерот, потенцирајќи за медитеранскиот дел.
„Но имајте предвид дека ваков тип на огнена стихија има насекаде во Европа, зборувам во медитеранскиот дел. Во Грција има жртви, огромни пожари, цели населби се зафатени. Во Турција исто така има жртви и повредени, цели населби, цели градови. Албанија, Косово, Босна, Хрватска, Србија, до пред некој ден знам дека имаше речиси 240 на ден. Шпанија, Италија, Кипар исто така. Така што, во овој момент нема слободни воздухоплови кои би биле дел од тој ЕУ-механизам што би помогнал. Во моментот повеќе од 200 припадници на Армијата се на терен. Полициските службеници, практично полицајците, ги возат оние специјалните возила, БТР, „пинцгауери“ и „хермелини“. Се организираме, работата е под контрола. Пожари ќе има цело лето, ќе има и во август. Во овој момент немаме некаде огнена стихија што е надвор од контрола“, објасни тој.