Македонија
(Видео) Шутаров: Хаосот продолжува, Мицкоски и ДПМНЕ го вратија Скопје 60 години назад

Христијан Мицкоски за време на кампањата за локалните избори, заедно со сите градоначалници на ДПМНЕ, во Скопје бараа поддршка од граѓаните и ветуваа модерно Скопје. Наместо модерно, Мицкоски и ДПМНЕ, Скопје го претворија во една голема депонија, вели Гордан Шутаров, советник во Советот на Град Скопје.
Со денови, додава тој, Скопје се задушува во смет, во нечистотија, во смрдеа изложувајќи ги граѓаните на сериозна опасност од појава и ширење на зарази, особено во жешките денови, за што предупредувања добивме и од голем број доктори и професионалци.
„За жал, неспособната локална власт на ДПМНЕ, која ветуваше модерен град, за многу краток период создаде нечист град, со нефункционални јавни претпријатија, град во хаос кој уназадува наместо да се развива. За 20 месеци, ДПМНЕ го врати Скопје назад за 60 години. Довербата кшто скопјани им ја дадоа на Мицкоски, ДПМНЕ и на Арсовска ја изневерија целосно за што бараме јавно да им се извинат на граѓаните. Не се само сметот и нечистотијата. Речиси и да нема сегмент во градот Скопје кој е функционален. Јавниот превоз во Скопје исто така не функционира. Ветувањата за набавка на нови 250 еколошки автобуси, за бесплатен превоз, за модерен транспорт ,фабрика за автобуси не се остварија“, истакна Шутаров.
Советникот во Советот на Град Скопје оценува дека не се реализира ниту еден проект во градот, а проектите од минатата локална власт на СДСМ стојат закочени.
Објаснува дека е прекинат проектот за еколошки и брз јавен превоз, познат како „Бас рапид транзит“, зад кој застана и ЕБОР прогласувајќи го како најеколошки проект во областа на јавниот транспорт.
Иако е целосно готов, мостот во Аеродром стои нефункционален, исто како што мостот на улицата Беласица е нефункционален иако Арсовска ветуваше брзо пуштање во употреба. Проектот за Универзалната сала е закочен, исто како и улицата Васко Карангелески, клучката во Момин Поток, кружните текови кај „Нова Македонија“, кои треба да ја поврзат новата подземна сообраќајница кај комплексот „Лимак“. Јавните претпријатија се нефункционални, услугите кон граѓаните се на историско најниско и најлошо ниво. Поминаа 20 месеци од мандатот на ДПМНЕ, се трошат годишно околу 100 милиони евра, пари на скопјани, а Скопје наместо развој, стагнира“, рече Шутаров.
Според него, скопјани се целосно изневерени од страна на Мицкоски и ДПМНЕ.
„Лично Мицкоски бараше гласови за Арсовска, ја промовира како најдобра менаџерка и вистинска мајка и тој е директно одговорен за ова што се случува денеска во Скопје“, истакна Шутаров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Хаос на улиците и нарушена безбедност, уште колку луѓе треба да загинат за Тошковски да понесе одговорност“, прашува СДСМ

„Последната криминална престрелка на Бит Пазар со смртни последици е уште еден доказ за сериозното нарушување на јавната безбедност и нефункционирањето на институциите под раководство на министерот за внатрешни работи, Панче Тошковски“, велат од СДСМ.
„Граѓаните на Скопје и цела Македонија се чувствуваат небезбедно на улиците, додека криминалот и насилството се шират на секој чекор.
Наместо ефикасна превенција и реакција, сведоци сме на институционален хаос и нефункционалност на Министерството за внатрешни работи.
Оваа неспособност загрозува човечки животи.
Уште колку луѓе треба да загинат по улиците за Тошковски да понесе одговорност?
Министерот Тошковски мора веднаш да преземе одговорност за загрозената безбедност.
СДСМ бара итна и транспарентна истрага за престрелката, целосно расветлување на настанот и изведување на виновниците пред лицето на правдата.
Дополнително, потребна е промена на безбедносниот систем и засилени мерки за зајакнување на јавната безбедност, особено во чувствителни области.
Граѓаните не заслужуваат да живеат во страв, граѓаните заслужуваат мирен и безбеден живот, а институциите мора да обезбедат сигурност“, соопшти СДСМ.
Македонија
Единствената работа што беше организирана во владеењето на СДС и ДУИ беше криминалот, реагира ВМРО-ДПМНЕ

„А ако станува збор за организираност и наведувањата дека оваа Влада е неорганизирана, би констатирале само дека единствената работа во која што владата на СДС и ДУИ беше организирана беше криминалот, организираниот криминал, затоа и впрочем нема да се чепне или да се направи ревизија на работењето, а да не излезе од тоа некаква форма на организиран криминал правен од претходната влада во таа институција“, реагира ВМРО-ДПМНЕ на изјавата на Венко Филипче.
„Оттука, и логично е што на СДС ние им делуваме неорганизирано затоа што нивниот впечаток и критериум за организираност е исклучиво за организираност во некој криминал, тие не се навикнати на организирана работа на проекти, затворање дупки и реформи, затоа и ваква забуна се создава кај нив.
За нив најорганизиран и за пример е веројатно нивниот партнер ДУИ со кои градат специфичен однос на ниво на политички и коруптивен садомазохизам, што може да е нов правец во политичката култура во државата“, се додава во реакцијата на ВМРО-ДПМНЕ.
Македонија
Градоначалникот Ѓорѓиевски со жителите на Црниче го одбележа празникот Балаклија

Градоначалникот Орце Ѓорѓиевски денес беше присутен на местото Балаклија во Црниче, каде заедно со жителите го прослави Источен Петок, значаен православен празник кој секоја година се одбележува на првата недела по Велигден. Тој истакна дека посебно му е драго што ова свето место, на кое се наоѓа изворот, беше ослободено од узурпација, вратено на жителите оплеменето со нови содржини кои овозможуваат вистинско уживање на сите кои го посетуваат, информира општина Кисела Вода.
Го истакна своето задоволство што следната година ќе ја има честа токму тој да биде кум на овој значаен настан.
– Нека е за многу години Источен Петок – Балаклија! Другата година кумството е мое, дар од Бога за што ми е огромна чест! Денес, заедно со мојот народ од Црниче го славиме овој голем празник кој спаѓа во Светлата Недела. Празник посветен на Пресвета Богородица на кој ѝ се оддава признание и се верува дека на овој ден му ги миела раните на Исус Христос, па затоа водите од изворите денеска се лековити и верниците масовно ги посетуваат за да ги измијат очите и лицето. Ова култно место во Црниче на кое има извор и кое до лани беше узурпирано, го ослободивме и го вративме на жителите, оплеменето со содржини за вистинско уживање и рекреација на сите кои го посетуваат. Горд сум на сплотеноста на мојот народ на ваквите денови, затоа Македонија е богата земја која меѓусебната љубов и почит ја одржувала низ вековите.
За многу години да ни е, здравје и бериќет кај сите-изјави градоначалникот на Кисела Вода, Орце Ѓорѓиевски.