Македонија
(Видео) Ѓорѓиевски: Компанијата шверцер на кокаин добивала државни тендери

„Власта на Заев и криминалот се во коалиција. Последна потврда за тоа е информацијата дека лицата што шверцувале кокаин од Мексико добивале и државни тендери. А денес видовме од медиумите дека има сомнеж за дополнителната заменик-министерка за внатрешни работи, Славјанка Петровска, дека директно брифирала во медиуми за текот на акцијата на МВР, со што ги довела животите на полицајците во ризик. Значи, имаме компанија шверцер на кокаин, која добивала државни тендери, и Славјанка, заменик-министер за МВР, која брифира информации со што ја загрозува акцијата“, изјави Орце Ѓорѓиевски, член на ИК на ВМРО-ДПМНЕ.
Според него, фирмата „Бенекс компании“ од Крушопек, чија дејност била увоз на овошје, завчера беше откриена дека заедно со пратките банани пренесувала и кокаин. Но, оваа таа фирма на 31 декември 2018 година на јавен тендер му продала возило на Јавното комунално претпријатие „Тетово“ во износ од еден и пол милион денари. Тоа е време кога Зоран Заев е премиер, Оливер Спасовски министер за внатрешни работи, а Теута Арифи градоначалник на Тетово како кандидат поддржан од СДСМ.
„Скандал до скандал. Кој ќе сноси одговорност сега? Замислете, од илјадници фирми јавна набавка, добила токму оваа фирма, ‘Бенекс’ од Крушопек добила и државни пари. Долго време посочувавме дека во Македонија цвета трговијата со дрога, а Заев и Спасовски ништо не презедоа за нејзино сузбивање. Напротив, гледаме дека наркокартелите дури и биле поддржувани со народни пари. Но, дали е само оваа помош, помошта што ја добиле од власта на Зоран Заев и Оливер Спасовски? Доволен повод за сомнеж за нелегални активности на фирмата ‘Бенекс’ требало да им биде фактот што таа фирма во 2018 година пријавила обрт од речиси 3 милиони евра.
Ќе признаете дека оваа сума е незамислива за многу други сериозни компании, а не за една фирма што увезува овошје. Колку ли пратки со кокаин „Бенекс“ направила во време на Зоран Заев и Оливер Спасовски? Колку од кокаинот поминал низ Македонија, а колку останал да се продава тука? Колку милиони евра била заработката на наркокартелот од Крушопек и дали од тие милиони, неколку завршиле кај претставници од власта? Дополнително, постојат основани сомненија дека високи полициски функционери, предводени директно од заменик-министерот Славјанка Петровска, ја загрозиле акцијата на специјалните полициски сили во Крушопек.
Во текот на акцијата, првин на социјалните мрежи, а потоа и во медиумите, била лиферувана веста за акцијата за сузбивање трговија со дрога, па биле пуштани полувистини. Дали на тој начин биле информирани наркокартелите и се попречувало во спроведувањето на полициската операција? Зарем до таму дојдовме, структурите во полицијата поврзани со подземјето, да минираат акции на своите колеги и со тоа да ги доведуваат во опасност. Криминалот расцвета со Зоран Заев и Оливер Спасовски. Наркокартелите владеат не само со подземјето и улиците туку и со целата држава. На нарковласта мора да ѝ се застане на патот. На 12 април народот ќе ги казни Заев и Спасовски за нивното шурување со подземјето и криминалот. По 12 април, во Македонија ќе владеат правото и правната држава“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ најави ревизија на сите спорни урбанистички планови, нови катни гаражи, чиста и безбедна општина со енергетски ефикасни фасади

Во преполната сала на Музејот на Современа уметност, вчера се одржа промотивната Конвенција на Движењето ЗНАМ – За наша Македонија, на која беа претставени кандидатот за градоначалник на Општина Центар, Мирослав Лабудовиќ, и советничката листа.
„На Центар му треба предводник кој ќе биде вистински претставник на граѓаните. Доволно млад и енергичен, доволно стручен и посветен татко на општината. На Центар му треба човек кој ќе воведе ред, ќе создаде урбан развој наместо хаос, ќе го исчисти, ќе го направи безбеден и ќе се бори за секоја негова педа. На Центар му треба вистински центарец. На Центар му треба Мирослав Лабудовиќ,“ беше пораката што силно одекна на Конвенцијата.
Во своето обраќање, Лабудовиќ се обврза дека нема да биде градоначалник кој работи само пред избори, туку човек што ќе им служи на граѓаните секој ден од својот мандат. Тој најави ревизија на сите спорни урбанистички планови, нови катни гаражи во Буњаковец, Капиштец и кај новата Железничка станица, чиста и безбедна општина со енергетски ефикасни фасади, како и изградба на Центар Хаб – мултифункционален младински и културно-технолошки центар.
„Секогаш пред очи ќе ја имам главната цел – моите сограѓани. Ќе работиме секојдневно за да го подобриме нивниот живот и Центар да му го вратиме на граѓанинот,“ истакна Лабудовиќ.
Носителот на советничката листа, Мишко Барзов, додаде дека со визија, системски решенија и чесна работа, советниците на ЗНАМ ќе изградат поуредена, почиста и побезбедна општина, додека лидерот на Движењето ЗНАМ, Максим Димитриевски, порача: „Не смееме да дозволиме Центар да остане во погрешни раце. Време е за промена, време е за вистински човек кој и знае и може. Тој човек е нашиот Миро.“
Движењето ЗНАМ на овие избори настапува самостојно со советнички листи во 53 општини и во градот Скопје, со кандидати за градоначалници во Куманово и Центар.
(Соопштение на ЗНАМ)
Македонија
Гичев: ДПМНЕ ги изневери граѓаните, време е за нова позитивна енергија и прогрес во Свети Николе

„Поминаа четири години откако ДПМНЕ е на власт, а освен празни ветувања, не добивме ништо. Четири години без ниту еден капитален проект, освен чадорите и кафезот во срцето на градскиот парк, кои ќе бидат дислоцирани веднаш по моето доаѓање, во првата недела“, порача од трибината во Свети Николе кандидатот за градоначалник на СДСМ, Дејан Гичев.
Тој ја побара поддршката од граѓаните и вети дека повторно ќе го врати сјајот на градот.
„Време е за промени. Време е за прогрес. Поминаа четири години без привлекување инвестиции. Наместо развој, добивме стагнација, наместо отчетност, добивме молк, и наместо подобар живот, добивме повисоки сметки и пониски стандарди. Ветуваа многу, а не направија ништо. Проектот за базен, кој беше целосно подготвен, беше сопрен без никакво објаснување од раководството предводено од ВМРО-ДПМНЕ,“ рече Гичев.
Уверува дека со напорна работа ќе ја реализира својата визија и програма, со конкретни проекти за подобра иднина.
„Со правилно урбанистичко планирање и грижа за хигиената, Свети Николе ќе го направиме чист, урбан и модерен град за живот. Тоа ќе биде обврска на секој од нас. Ќе работиме на обновување, модернизирање и вложување во спортските објекти, како и на поддршка на спортските клубови, со што ќе го оживееме спортот во нашиот град. Партнерството, координацијата и соработката со невладиниот и граѓанскиот сектор ќе овозможат подобра работа во решавањето на конкретните проблеми на граѓаните“, порача Гичев.
Тој кажа дека ВМРО-ДПМНЕ ја имале можноста, но ја прокоцкале, градот стагнирал изминативе четири години, а жителите не добиле ништо од ветеното.
„Ние ќе донесеме вистинска поддршка за земјоделците. Ќе обезбедиме основни услови за работа преку тампонирање на сите земјоделски патишта. Ќе ја вратиме загубената чест на земјоделецот, а ќе ја вратиме и душата на градот. Нашата визија е да ја подобриме заедницата. Предлагаме нови политики и мерки кои директно одговараат на реалните потреби на граѓаните. За младите , нов младински центар. За социјално ранливите фонд за самохрани мајки. Во образованието, стипендии за талентирани деца, порача Гичев.
Македонија
Времето денеска ќе биде сончево со мала до умерена облачност, од утре пад на температурите

Времето денеска ќе биде сончево со мала до умерена облачност. Кон крајот на денот облачноста ќе се зголемува и во текот на ноќта ќе има повремен локален дожд. Ќе дува слаб до умерен ветер претежно од јужен правец. Минималните температури ќе се движат од -3 до 2, а максималните ќе бидат до интервал 12 до 20 степени целзиусови.
Во Скопје, сончево со мала до умерена облачност. Кон крајот на денот облачноста ќе се зголеми. Ќе дува слаб до умерен ветер од јужен правец. Минималната температура во главниот град ќе се спушти до 1 степен, а максималната ќе достигне 17 степени.
Од понеделник до среда ќе дува умерен до засилен северен ветер, а температурите ќе се задржат под просекот за овој период од годината. Пораст на дневната температура се очекува од четврток.