Македонија
(Видео) Јаневска: Ни срам, ни перде, СДС и ДУИ спремаат поткуп на студентите и учениците со право на глас на претстојните избори

Криминално – расипничкото политичко дуо СДС и ДУИ најавија наводно нови мерки со кои ќе ги поддржеле учениците и студентите во државата, за да им го олеснеле учењето и тоа токму пред претстојните избори.
Ќе даделе по 1200 денари во следните 6 месеци за 105 илјади ученици од социјално загрозени семејства. Тоа се кумулативно 7200 денари, колку што чини едно пазарење на храна за едно семејство да може да преживее една недела. Срамно и недолично, истакна Весна Јаневска, претседател на Комисија за образование и наука на ВМРО-ДПМНЕ.
„Но, тука има и еден друг момент. Одиме со проста математика. Во државата има 250 илјади ученици. Ако Владата дава поддршка на 105 илјади ученици од социјално загрозени семејства, тоа значи дека речиси половина од учениците живеат во сиромаштија токму поради лошите политики и грабежите на СДС и ДУИ, кои сега ќе ги збогателе со по 1200 месечно во период од половина година. Самите се издаваат колку го осиромашиле народот и очекуваат од истиот да ги гласа на избори“, додаде Јаневска.
„Како што соопштија, по 600 денари ќе давале на студенти што студирале надвор од нивното место на живеење. Ја навредуваат интелектуалната маса и иднината на оваа држава. Владата уште не им ги исплатила стипендиите што им следуваат за оваа година. Им скратија по еден оброк од студентските домови, а воведоа наводно дополнително право – субвенциониран студентски оброк, но и тоа не им се исплаќа редовно, а скратено им е на огромно мнозинство еден куп студенти, така што кумулативно студентите се оштетени. Но СДС и ДУИ немаат гајле, веќе најавуваат нови лаги и даваат нови ветувања. Замислете, 15 илјади студенти ќе добивале по 600 денари месечно до крај на академската година. Премногу, премногу мизерно и бедно!
Ќе давале и ваучери за туризам за студентите. Откако успеаја да натераат цели генерации да се иселат од државата, сега на тие што останале ќе им давале ваучери и ќе го развиваат туризмот. Ве се молам“, потенцира таа.
Во името на ВМРО–ДПМНЕ, апелира до учениците и студентите, и до нивните семејства, да не наседнуваат на овие, како што ги нарекува, евтини трикови, тие се веќе видени.
„Ништо не добиле досега и нема да добијат од оваа Влада. Вистинската грижа ќе започне со промената на власта, која е на повидок. Ќе следуваат конкретни мерки со кои ќе се унапредува ученичкиот и студентскиот стандард и тоа од почетокот на мандатот на новата Влада, а не на крајот од мандатот како што овие сега прават во обид да останат во своите фотелји“, оценува Јаневска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ледено невреме доаѓа кон Македонија: се очекува силен ветер, дожд, снег и минусни температури

Денешниот ден донесе вистинска пролет во Македонија и сончево време во најголемиот дел од земјата, но во наредните часови следува бурна промена на времето.
Моќен циклон во овој момент носи обилен снег и силен ветер во источна и североисточна Европа.
Снегот и бурните ветрови како дел од студениот фронт стигнаа до северот на Романија и Словачка.
Во исто време, во Македонија се уште е топло, температурата во Скопје е 14 степени, а за само неколку часа студениот фронт ќе ја намали температурата за повеќе од 10 степени за многу краток временски интервал.
Според информациите од Управата за хидрометеоролошки работи (УХМР) ќе има продор на студена воздушна маса од север, кој ќе предизвика значителна промена на времето.
Ќе преовладува претежно облачно време со врнежи од дожд, а на повисоките места од дожд и снег.
На планините врнежите ќе бидат од снег и ќе се формира снежна покривка од 10 до 15 сантиметри.
Ќе дува засилен северен ветер со брзина од над 70 километри на час и температурите значително ќе опаднат.
Во понеделник со засилен северен ветер наместа повремено ќе провејува слаб снег.
Потоа времето ќе биде стабилно и ветровито со утринските температури кои насекаде ќе бидат негативни и ќе се спуштат до минус 7 степени.
Кон крајот на следната недела се очекува постепен пораст на температурите.
Македонија
(Видео) Директорката на клиниката за пластична хирургија низ солзи им се заблагодари на странските доктори за помошта по трагедијата во Кочани

Д-р Јасмина Ѓоргиевска Павловска, директорката на Универзитетска клиника за пластична и реконструктивна хирургија низ солзи се заблагодари на докторите од Израел, Чешка и Србија кои дојдоа во земјава за да им помогнат на нашите доктори по големата трагедија во Кочани.
„Сакам да ви се заблагодарам на сите што сте тука и ни помагате во оваа ситуација. Завршивте одлична работа. Ни го дадовте патот по кој треба да одиме, за да го направиме најдоброто за овие млади души и да им дадеме шанса да го видат светот“, вели Ѓоргиевска Павловска.
Емотивното видео го објави Sheba Medical Center Global Impact, еден од водечките светски медицински центри, со седиште во Израел. Нивниот тим изведе 35 процедури на пациенти во четири различни болници во Македонија.
Македонија
(Видео) Гинов: Во ниту еден момент не е доведено во прашање водоснабдувањето на Битола

Изнесени се опасни лаги и манипулации од партиска говорница на една политичка партија, дека „ќе секнат чешмите во Битола“ и сакам јавно да побарам од советничката од СДСМ Мирјана Захариевска Ралевска да им се извини на битолчани и одговорно тврдам дека во ниту еден момент водоснабдувањето на Битола не е и нема да биде доведено во прашање, кажа денеска на прес-конференција Андреј Гинов, директор на ЈКП Водовод Битола.
„Околу „загубата“ на ЈКП Водовод Битола ќе кажам само неколку работи: -вкупните приходи за 2024 година се околу 284 милиони денари, вкупните расходи се околу 346 милиони денари, што продуцира загуба од околу 61 милион денари. Ако се земат предвид само неколку ставки на расходи и приходи ќе се види јасно зошто е тоа така. Вкупен приход од наплата на вода од правни и физички лица е околу 262 милиони денари, а од останатата реализација е околу 22 милиони денари, а додека расходите по само три основи и тоа : електрична енергија околу 43 милиони денари, сирова вода- кон „Стрежево“(заради сушата минатото лето) околу 50 милиони денари и трошоци за плати за вработените 148 милиони денари – што дава вкупен расход кога се додава и ДДВ по само три ставки е повеќе од 280 милиони денари“, рече Гинов.
Ова, според него, покажува дека целокупниот приход при висока наплата на сметки од околу 95% е близу вкупниот расход за само овие три ставки.
„Само за илустрација би кажал уште две споредби и тоа: во 2021 година во ЈКП Водовод имаше вкупно 227 вработени и трошокот за плата изнесуваше околу 107 милиони денари, а сега во 2024 год. има вкупно 205 вработени (22 вработени помалку) а трошокот за плати изнесува околу 148 милиони денари што е за 41 милион денари повеќе при значително помал број на вработени.
Во текот на 2021 година „Водовод“ влезе во непотребна инвестиција за „нова управна зграда“ за која што се потрошени повеќе од 60 милиони денари колку што изнесува сегашната загуба на ЈКП Водовод Битола“, истакна Гинов.