Денеска е почетокот на изборната кампања и ќе бидам реален и искрен како секогаш. Од СДСМ не очекуваме фер, транспарентна и демократска кампања. Не го очекуваме тоа затоа што СДСМ и Зоран Заев се нервозни бидејќи знаат дека губат, истакна генералниот секретар на ВМРО-ДПМНЕ, Игор Јанушев.

„Токму таа нервоза преткампањата ја направи нефер и недемократска. Нема друга земја во Европа каде што власта ја почнува кампањата со бомба фрлена на имотот на потпретседателот на најголемата партија. Нема друга европска земја каде што власта со законски декрет сака да ја збрише опозицијата од медиумите преку преполовување на минутите кои законски ѝ следуваат, нема друга држава каде што власта дели пакети поткуп, нема друга европска земја каде што секој ден е нов скандал. Ова го прават не затоа што се силни туку затоа што се слаби и уплашени од пораз. Затоа Заев ќе паднеш. И не ги повлекувај луѓето со тебе. ВМРО-ДПМНЕ ќе победи, а така ќе победи и Македонија.

Овие 21 ден ќе бидат финалето на една битка за враќање на државата во рацете на народот и преземање контрола врз нашите судбини. Видовме како не треба и како Заев е неспособен да испорача  каков било резултат. Овие луѓе владеат со измама и криминал. Држава во која првиот човек е амнестиран рекетар, а неговите директори ги гледаме со купови пари со мито. Ова мора да престане.

Затоа овие 21 ден се многу важни. ВМРО-ДПМНЕ ќе води кампања преку која ќе биде помеѓу народот низ улиците во градовите и селата. Секој носител со кандидатите за пратеници ќе биде присутни на терен, на средби со граѓаните согласно препораките на здравствените власти. ВМРО-ДПМНЕ не се откажува од непосредната комуникација со народот и апелираме на почитување на мерките за заштита од коронавирусот. На овие избори ќе имаме двојна задача да ја поразиме корона-заразата и да го поразиме поголемиот вирус, вирусот на криминал и корупција, а тоа е оваа власт. Ние ја претставивме нашата програма и мерките кои се дел од проектот „Обнова“, со кои е обврзуваме на подобар живот. Ја имаме најдобрата програма во однос на власта, која нема ништо освен лаги и манипулации. Очекуваме убедлива победа со двоцифрена разлика во бројот на пратеници во однос на СДСМ.

Ги повикувам незадоволните, социјално загрозените, обесправените, работниците, земјоделците, стопанствениците. Ве повикувам сите вас да ни се приклучите. Имаме подадена рака кон секого и за секое прашање ќе дојдеме заедно до решението. Ви ветуваме работа, извесност и иднина. Различни сме од СДСМ. Изборот е помеѓу измама и обнова, помеѓу безидејност и концепт и стратегија, помеѓу криминал и чесност, изборот е помеѓу Заев и Македонија.

На овие избори многу е важно да се гласа, само гласот значи став за промени кон подобро, ако не гласате ќе наградите сè што досега видовме, а видовме убијци кои се пуштаат на слобода, рекетари кои поминуваат неказнето, директори со мито во рацете, искривен ‘рбет и сменет идентитет, туѓи платформи и лични интереси. Затоа ние настапуваме со слоганот ‘Исправи се Македонијо! Одбери обнова!’ Само така заедно ќе донесеме успеси, правда и повеќе пари за секого. Само така ќе си ја вратиме државата во рацете на народот и само така ќе покажеме дека Македонија е посилна од сите нив. Убеден сум во победа и подобра иднина. ‘Исправи се Македонијо, одбери обнова!’“ порача Јанушев.