Македонија
(Видео) Јаревски: Дали власта планира продажба на МЕПСО, по истиот принцип, бонбона бизнис, како ЕЛЕМ, во 2006-та?

Веќе втор ден како Владата се крие од јавноста, во врска со последните информации кои доаѓаат од Грција, дека се заинтересирани за купување на МЕПСО. Освен штурото соопштение на МЕПСО, каде не соопштија ништо околу информациите и потврдија дека за ваков чекор решава Владата, оправдано се појавуваат сомнежи и загриженост кај македонските граѓани, рече на денешната прес конференција пратеникот на ВМРО-ДПМНЕ, Тони Јаревски.
Тој потсетува дека на сличен начин во 2006-та година, исто и како сега, неколку месеци пред катастрофалниот изборен пораз, СДСM и ДУИ, против волјата на народот, ја продадоа ЕВН – капитален државен ресурс.
– Овој чекор низ годините, многупати се покажа како негативен за државните интереси и за стандардот на граѓаните, додаде Јаревски и оттука ја праша Владата предводена од ДУИ и СДСM:
– Дали се точни информациите дека планираат продажба на МЕПСО?
– Дали се свесни дека со ова Македонија целосно ќе ја изгуби својата енергетска независност како држава, односно ќе зависи во тој дел, од друга странска држава?
– Зошто ова се прави во целосна тајност, непосредно пред избори каде повторно, исто како и во 2006 година, се свесни за изборниот потоп кој ги чека?
– Дали е ова уште еден класичен пример за корупција, како многу кои ги видовме низ годините, случај на „бонбона бизнис“ и провизии за поединци во државниот врв?
– Дали знаат дека додека секојдневно зборуваат за ЕУ, НАТО и Америка, со овој чекор 24% од македонскиот енергетски систем, би припаднал, во сопственост на кинеска државна компанија?
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.
Македонија
(Фото) Успешна евакуација на повредено лице со хеликоптер на Армијата

Вчера, во попладневните часови, по добиено барање од Центарот за управување со кризи (ЦУК), Армијата на Република Северна Македонија, поради сериозноста на повредите и непристапниот терен, изврши итна медицинска евакуација со хеликоптер од вВИНГ, на лице кое паднало во провалија во близина на Ливадичко Езеро, Шар Планина.
Повреденото лице, при падот, се здобило со скршеници на раката, ногата и колкот, како и со обилно крварење, поради што било во критична состојба. На лице место интервенираше екипаж- тим на парамедици, кои и покрај непристапниот терен успешно го извлекоа и имобилизираа повредениот.
„Армијата во координација со ЦУК и здравствените установи изврши успешна медицинска евакуација и го предаде повреденото лице на екипа од итната медицинска помош, по што истото беше транспортирано на понатамошен болнички третман.
Армијата на Република Северна Македонија, заедно со останатите институции во државата продолжува да дејствува во интерес на граѓаните, обезбедувајќи навремена и професионална поддршка“, се наведува во соопштението на Генералштабот на Армијата