Премиерот конечно одвои време да слушне што се кажува, да види каква грешка прави и какви последици нè чекаат, истакна Тони Јарески, пратеник од редовите на ВМРО-ДПМНЕ на собраниската говорница.

„Македонија има своја политика и интереси. Тие им припаѓаат на сите Македонци. Оној што сака да работи за интересите на Бугарија, Грција или Србија, тој може да се смета за добар Бугарин, Грк или Србин, но не и за добар Македонец“. Ова е еден од многуте цитати со кои сакавме да допреме до свеста и совеста на пратениците од мнозинството и претставниците на влада. Ова е еден од цитатите на великанот Гоце Делчев“, изјави Јарески.

„Многу великани дале  живот, многу цитати беа кажано, но се чини не допираат до вас. Затоа луѓето кои ќе кренат рака за овој обид за велепредавство можат да бидат добри Бугари. Бидејќи со таков однос работат само за интересите на Бугарија, не Македонија“, рече Јарески.

Потенцираше дека со овој чекор се прави грешка од која нема назад.

„Овој обид за национална катастрофа кој го приредува СДСМ има причина, тендери и уште некој месец власт. Никогаш нема да влеземе во ЕУ доколку ова помине овде. Дали знаете дека ова крај нема, ужас без крај. Дали знаете каква катастрофа следи, што нè чека доколку се продолжи по овој пат. Нема разлика помеѓу оној првиот предлог за кој рековте не и сега овој за кој велите да. Сметаат дека сме нација на Коминтерната, неосознаени Бугари и вие сега на тастер ќе им дадете тоа да се напише во книгите и ќе им барате докази“, рече Јарески.

„Почеток за преговори нема бидејќи барањата за преговорите немаат крај, и бараат да се отвори Уставот, но тоа нема да се случи. Овој договор е ништовен, ниеден пратеник на ВМРО-ДПМНЕ нема да подржи уставни измени, ВМРО-ДПМНЕ ќе ги штити интересите на Македонија и Македонците. Сите вие што ќе кренете рака за ова предавство ќе завршите на буништето на историјата. Затоа оваа течност нека ве потсетува на крвата што ја газите, на жртвите од фашизмот, на децата од Ваташа и на крвта на хероите кои загинаа од Македонија а што вие ја поганите со вашите дела“, потенцираше Јарески.