Македонија
„Визер – Скопски маратон“ изненадува со секој чекор – нови медали за штафетен маратон, маици и бесплатни групни тренинзи

Во текот на годините „Визер – Скопскиот маратон“ ги соборува сите рекорди во поглед на својата организација. Од 1.249 во првата до над 10.000 тркачи во последната година, од 22 до 58 земји учеснички од целиот свет и безброј иновации и идеи сè со цел да се подобри искуството на секој што ќе стапне на или до патеката.
За 15. јубилејно издание тимот на „Визер – Скопски маратон“, Сојузот на спортовите на град Скопје, посочи дека штафетниот маратон ќе биде со име „Штафетен маратон – ЕУ за спорт“ под покровителството на ЕУ. Ќе бидат организирани бесплатни групни тренинзи, кои ќе ги водат познатите атлетичари Сашо Даневски, Кокан Ајановски и Весна Кираџиева. Повеќе инфо за термините и сите други детали ќе има на официјалната веб-страница и социјалните мрежи.
Сите заинтересирани што сакаат да добијат маица во стартниот пакет ќе мора да се пријават најдоцна до 31 март, по овој датум не следува маица во стартниот пакет. Истиот датум е краен рок и за оние што сакаат нивното име да им биде испишано на стартниот број.
Традиционално, како и минатите години, сите учесници ќе добијат 20 евра вредносен ваучер од насловниот спонзор – „Визер“.
Од Сојузот на спортовите порачуваат дека изминатиот викенд патеката беше измерена од страна на стручно лице на ИААФ и АИМС, со што „Визер – Скопскиот маратон“ го обновува постојниот сертификат за точноста на патеката и таа ги исполнува сите стандарди за исполнување норми за учество на олимписки норми и светски првенства.
Оваа година „Визер – Скопски маратон“ ќе се одржи в сабота, 4 мај 2019 година, и заинтересираните може да се пријават на официјалната веб-страница на http://skopskimaraton.com.mk/ или кај партнерот за онлајн-регистрација https://www.smartrace.club/. „Визер – Скопски маратон“ е под покровителство на Град Скопје, Делегацијата на ЕУ и Агенцијата за млади и спорт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Над 15.000 матуранти утре ќе полагаат мајчин јазик и литература

Над 15.000 матуранти утре ќе го полагаат мајчин јазик и литература, задолжителен дел во рамки на првиот екстерен испит.
За државна матура годинава се пријавени 15.004 кандидати, од кои 8.816 ученици се од средните стручни училишта, 5.966 од гимназиите и 222 од училиштата за уметничко образование.
Вториот екстерен испит од државната матура, кој е изборен (математика, англиски јазик, француски јазик, германски јазик, руски јазик, италијански јазик, филозофија, естетика), ќе се полага на 11 јуни.
Матурантите кои во јуни нема да ја положат државната матура или не во целост, ќе имаат втора шанса. На 12 август е испитот по мајчин јазик, а два дена подоцна е полагањето на изборниот екстерен испит.
Македонија
Вкусна трпеза и музика во 18 часот во Паркот на Франкофонијата во Скопје

Градоначалникот Горан Герасимовски ги поканува скопјани денеска во 18.00 часот на добра традиционална македонска и европска трпеза во Паркот на Франкофонијата. Герасимовски вели дека културно-гастрономскиот настан „Нож и виљушка на европска чинија“ e можност за дружење, културна размена и зајакнување на заедништвото.
„Денеска, со почеток во 18.00 часот повторно го организираме настанот ‘Нож и виљушка на европска чинија’, кадешто ќе дегустираме вкусна храна и ќе слушаме добра музика од диџеј Зоки Бејбе и Наде Талевска бенд. Центар поврзува – преку храна и музика. Ве чекаме во Паркот на Франкофонија да го прославиме богатството на различности со убава трпеза и пријатна атмосфера“, истакнува Герасимовски.
Гастрономскиот настан „Нож и виљушка на европска чинија“ е организиран од Општина Центар и истиот е отворен за сите граѓани.
Македонија
Објавен конкурсот за државната награда „Св Климент Охридски“ за 2025 година

Одборот за доделување на државната награда „Св. Климент Охридски“ распиша Конкурс за доделување на државната награда „Св. Климент Охридски“ за 2025 година.
Со оваа награда се оддава највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност.
Конкурсот за државната награда ќе трае од 1 до 30 јуни 2025 година.