Македонија
Викендов во Прилеп ќе се одржи карневалот „Прочка“

По 16-ти традиционален пат во Прилеп, овој викенд, ќе се одржи меѓународниот карневал „Прочка 2017“.
Како и секоја година организатори на овој настан се Општина Прилеп, одделението за култура и Здружението на граѓани „Прилепски мечкари“. Овој карневал прерасна во вистинска атракција и голем промотивен бренд не само за Прилеп туку и за цела Македонија. Подготовките за Карневалот започнуваат во петок со отворање на изложбата која секоја година е сведок на најрзлични креации на маски изработени од учениците во основните и средните училишта насочувани од нивните наставници по ликовно образование и одделенска настава, кои се партнери во целокупната организација.
„Во саботата пак ќе се одржи првата научна конференција насловена како „Обреди и фестивали под маски на Балканот: традиција, состојба, тенденција.“ во хотелот Кристал Палас. Гости, учесници на конференцијата се пријавени од Србија, Бугарија и Македонија, додека реферати ќе има и од етнолози од Словенија, Хрватска и Грција. На оваа конференција треба да се истакне улогата на маската и маскирањето како дел од културната историја и наследство на територијата на Балканот низ вековите, а собраниот материјал ќе биде испечатен и издаден од Општина Прилеп заедно со Институтот за Старословенска култура кои заеднички ја организираат. Да напоменам и тоа дека од лани детскиот карневал е посебен настан и тој ќе се одржи во сабота со почеток во 12.30ч. кога ќе биде парадата на учесниците до 14 години, на плоштадот „Методија Андонов Ченто“, каде што покрај дефилето ќе има куклено шоу, магионичари, жонглерски и други атракции за сето тоа да заврши со заедничка забава. Централен настан е меѓународното дефиле кое ќе се одржи во недела, на кое ќе се претстават бројни групни и поединечни маски, а стартот е од ЦК „Марко Цепенков. Трасата ќе се движи се до плоштадот „Методија Андонов Ченто“ каде што ќе биде главното претставување со изведена кореографија и музика“, изјави Снеже Ристеска, советник за култура во Општина Прилеп.
Организаторите апелираат сите оние кои се уште не се пријавени, а сакаат да учествуваат на Карневалот да ја посетат страницата на карневалот каде има пријава која можат да ја испратат по електронски пат или пак непосредно пред карневалот во билетарницата на ЦК „Марко Цепенков“. За најубавите маски ќе има и награди во неколку категории за кои ќе одлучува стручна жири комисија.
„Освен гостите од Прилеп и Македонија, оваа година потврдено присуство имаат групи од два град од Албанија, Каваја и Корча, од Србија има од Бања Ковиљача, Шабац, Лесковац, Белград, Бела Црква, Врњачка Бања и уште неколку други, од Бугарија ќе ни дојдат гости од Перник. Годинава значи се очекува да имаме околу 1.000 учесници. Здружението „Прочкари“ прави маска која што не е видена досега на овие балкански простори, маска која ќе даде голем поттик за размислување за нашите обичаи и традиции, а паралелно со тоа и средните училишта изработуваат интересни маски“, истакна Ванчо Георгиев, претседател на здружението „Прилепски мечкари“.
Од Локалната самоуправа истакнаа дека очекуваат сите овие случувања да донесат многу позитивна енергија и расположение во Прилеп, кое ќе овозможи барем за момент да ги оставиме проблемите настрана и да уживаме.
„Карневалот „Прочка“ е еден од поголемите културни брендови не само на Прилеп туку и на Македонија и влегува на мапата на тој т.н. фестивалски и културен туризам кој Прилеп го негува веќе со години“, изјави Марјан Ристески, градоначалник на Прилеп.
Одбележувањето на Карневалот како и секоја година традиционално завршува во понеделникот, со ручек од посно гравче кое го даваат „Прилепските мечкари“. Тоа е вековна традиција и секоја година се одржува во некој верски објект, каде касапите се молат за прошка на своите гревови, а потоа се служи ручекот со посен грав кој претставува вистински специјалитет, затоа е подготвен само на масло, без вода. Тоа е тајна на касапите која досега не сакаат да ја откријат. „Прилепските мечкари“ ги покануваат сите кои сакаат да го пробаат овој грав да дојдат во понеделник во 12 часот во манастирот „Св. Ѓорѓија“, кој се наоѓа над вештачкото езеро./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Доаѓаат тешки моменти за корумпираните судии, обвинители, политичари и бандити, најави ВМРО-ДПМНЕ

Со судството и обвинителството во Македонија, како што велат од владејачката ВМРО-ДПМНЕ, раководи кланот Заеви и кланот Ахмети.
Тие, според партијата на Мицкоски, се директните виновници кои држат судии и обвинители затоа што се уплашени поради криминалот кој го имаат направено.
„Затоа секој случај кој ќе почне завршува со неуспех.
Затоа секоја пријава на МВР или докази или допрен глас и укажување од Владата или јавноста за криминал на луѓе од СДС и ДУИ завршуваат без епилог, во нечија фиока или затворени се како случаи.
Но, имаме една порака. Ако до Нова година не се смени ова и нема чекори за борба против корупцијата за еклатантни примери на криминал на разни политичко мафијашки групации во земјава, ние ќе објавиме и тргнеме во одлучна акција и чекори кои тоа ќе го променат од корен.
Укажувавме, повикувавме, апелиравме, молевме, но безуспешно“.
Народот, според ВМРО-ДПМНЕ, е разочаран.
Апатијата, како што оценуваат се зголемува.
„Довербата во правна држава ја нема. Надежта се губи.
Нема да го дозволиме тоа. Ќе биде или тие или Македонија. Или тие сите криминалците без разлика на политичка и етничка припадност на една страна, или ние со народот на другата.
Доаѓаат тешки моменти за корумпираните судии, обвинители, и политичари и бандити“.
Македонија
Поради нерегуларности, привремено запира со работа приватниот Факултет за бизнис економија во Скопје , одлучи МОН

Поради констатирани нерегуларности во работењето и непостапување по задолжение за отстранување на истите, Министерството за образование и наука информира дека е донесена одлука за привремено запирање на работата на приватната висока стручна школа – Факултет за бизнис економија во Скопје.
Нерегуларностите се констатирани од страна на посебна комисија во рамки на МОН за вршење надзор над законитоста во работењето, а одлуката за времено запирање на работата на оваа приватна високообразовна установа е донесена и врз основа на мислење од страна на Одборот за акредитација на високото образование.
На Факултетот за бизнис економија, појаснуваат од МОН, нема запишани нови студенти во академската 2025-2026 година. Кон веќе запишаните студенти, високообразовната установа ќе ги исполни обврските предвидени во Законот за високо образование со цел овозможување непречена понатамошна едукација, односно префрлање на други факултети.
„Почитувањето на законските прописи мора да биде основен принцип во работењето на сите образовни установи. Тоа е единствениот начин да се обезбеди одржлив квалитет кон корисниците на образовните услуги.
Во изминатите 15 месеци затворени се и 14 приватни научни институти, од кои дел поради неактивност, а дел поради неисполнување на условите за работа. МОН и во иднина неселективно ќе продолжи да ја контролира работата на образовните и научните установи и да презема соодветни мерки онаму каде ќе бидат констатирани отстапувања од правните норми“.
Македонија
Ако ниските плати им се причина да судат неетички и да прават пактови со бандити, имаме еден предлог до нив, одете си веднаш, порачуваат од ВМРО-ДПМНЕ

Според ВМРО-ДПМНЕ, денешните реакции од Здружението на судии се, како што велат, крајно загрижувачки.
„Ја видовме реакцијата на судиите и обвинителите.
Мислевме дека ќе прочитаме нешто повеќе посериозно и потемелно, кога тие гледаме самите си кажаа што е причината што вака работат. Ниските плати.
Со тоа во нивната совест си ги оправдуваат погрешите одлуки и постапки, веројатно дел од нив од истите причини и земаат мито, па тоа го оправдуваат со крајно нечовечната и неетичка позиција „ниски ни се платите”.
Чест на исклучоците во таа професија кои се уште се повеќе од расипаните зрна во амбарот, но овие реакции од денес се запрепастувачки и крајно загрижувачки и ако ниските плати им се причина да судат неетички и да прават пактови со бандити и криминалци и корумпирани политичари и мафијаши тогаш имаме еден предлог до нив.
Нека си одат веднаш“.
На нивно место, додаваат од владејачката партија, ќе дојдат луѓе кои си ја сакаат државата и сакаат да воведат ред, дури и за плати од 1500 до 2000 евра какви што примаат судиите денес.
Вакво, според нив, понижувачко, нелогично и промашено соопштение, не може како што велат, дури ни СДС да смисли.
„Секако повторуваме чест на многуте исклучоци во таа професија кои се срамат од своите колеги и кои си ја сакаат државата“.