Владата донесе одлука за блокирање 173 интернет-страници за онлајн-коцкање, кои на нелегален начин нудеа услуги за игри на среќа во нашата земја, изјави вицепремиерот Изет Меџити.

„Заедно со 53-те страници што беа блокирани минатиот месец, оваа бројка сега изнесува 226. Замислете, за помалку од два месеца затворивме 226 страници за нелегално онлајн-коцкање – и оваа бројка не е конечна. Само замислете за еден миг колку длабоко и колку далеку има навлезено мафијата на коцкањето во нашите животи и каква штета има предизвикано кај поединци и семејства погодени од оваа епидемија“, рече тој.

Според него, ова е директен удар врз една криминална мрежа, која со години била толерирана и заштитена од структури тесно поврзани со претходната власт.

„За жал, една политичка партија, која денес се претставува како чувар на правата и на достоинствениот живот на Албанците, беше главен спонзор на коцкањето и вклучувајќи се директно во оваа индустрија, ова политичка партија ѝ го даде на коцкарската мафија потребниот политички штит за да расте и да се развива, без да ја загрози никој. Како последица, нашите населби беа преполнети со казина, а нашите телефони, таблети и компјутери станаа цел на напад од нелегалните платформи за игри на среќа. Тоа што ДУИ му го направи на албанското општество во Северна Македонија е тешка катастрофа – и за ова катастрофа одговорност ќе има“, рече Меџити.

Ако до вчера имавме казина покрај училиштата, покрај домовите, покрај животите на нашите деца, додаде тој, денес воспоставуваме ред, закон и достоинство.

„До вчера ДУИ градеше коцкарски империи врз сиромаштијата и очајот на Албанците. Денес, ‘Влен’ ги урива тие империи на криминалот и ја гради иднината“, рече Меџити.