Македонија
Владата му додели помош од 30 милиони денари на Арачиново – Градот Скопје, Центар, Карпош и Чаир сметаат дека не се обесправени

Градоначалниците на Градот Скопје и општините Центар, Карпош, Чаир не се чувствуваат обесправено затоа што Владата ѝ додели 30 милиони денари на општината Арачиново за справување со потешкотиите во тековното работење настанати поради Ковид-19 кризата. Тие велат дека централната власт со скоро исти суми финансирала и нивни општински прокети.
„По целосна разработка на проектите кои што градот и општините од градот имаат доставено до Влада, со цел на централната власт да и помогне на локалната власт и да изврши финансирање на определени проекти, завршени се во вкупен износ од околу 35 милиони евра за сите општини во нашата држава. Така што, нема обесправени општини во смисла дека добиваат материјална помош од централната власт а предизвикана поради скратените буџетски приливи на нашите буџети од ковид-кризата. Очекувам дека Владата ќе излезе со целовкупниот концепт многу набрзо. Не гледам дека има хендикепт во таа смисла“, рече градоначалникот на Скопје, Петре Шилегов.
Градоначалникот на Карпош, Стефан Богоев, вели дека со пари од Владата во неговата општина ќе се реализираат два проекти, а сумата е колку и онаа што и е доделена на Арачиново.
„Добро би ни дошле и на нас, но не би рекол дека се чувствуваме обесправени. Ние како Општина Карпош аплициравме со проекти и горе-доле добивме исто толкава сума. Тој проект е за реконструкција за плочникот во Влае и реконструкција на улица о Долно Нерези. Не се чувствуваме обесправени, но не е лоша идејата Владата да помага на таков начин“, рече градоначалникот на Карпош, Стефан Богоев.
Висар Ганиу, како градоначалник на Чаир вели дека неговата општина добила 62 милиони денари за реализација на проекти во населбата Серава и е благодарен на тоа.
„Нас ни е мило што Владата помага на Арачиново. Ние аплициравме долго време со проекти кои ни се неопходни тука, ние добивме 62 милиони, навистина сме задоволни. Во населабата Серава, летно време нема вода за пиење, а во строго градско подрачје, За таа населба ќе се користат парите“, вели градоначалникот на Чаир, Висар Ганиу.
Градоначалникот на Центар, Саша Богдановиќ, смета дека секоја општина има свои приоритети. Општината со која раководи имала аплицирано за инфраструктурни прокети, а Владата исплатила 800.000 евра за нивна реализација.
„Секоја општина си има одредена специфичност. Центар учествувала со проекти во Владата, а ние добивме 800.000 евра за обнова на училишта, градинки, канализација. Секоја општина со свој приоритет. Владата е тука да излезе со поддршка на одредени барања. Урбаните општини имаат подобри приходи, а секоја општина си имаат свои барања. Ние како општина имаме огромна поддршка од Владата. Во изминатите 13 години не сме добивале ни денар“, вели Саша Богдановиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре променливо облачно со сончеви периоди , утринските температури ниски, дневната до 15 степени

Времето утре, променливо облачно со сончеви периоди. Ќе дува слаб до умерен ветер од северен правец, поизразен долж Повардарието. Минималната температура ќе биде во интервал од -1 до 5, а максималната ќе достигне од 8 до 15 степени.
Во Скопје, променливо облачно со сончеви периоди. Ќе дува слаб до умерен ветер од северен правец. Минималната температура ќе се спушти до 2, а максималната ќе достигне до 12 степени.
Во недела утрото ќе биде ведро и студено со ниски утрински температури, кои наместа ќе се спуштат под нула степени. Во текот на денот ќе преовладува сончево и потопло време со мала до умерена облачност, која кон крајот на денот ќе се зголемува. Во текот на ноќта и во понеделник ќе има повремени локални врнежи од дожд. До среда ќе дува умерен до засилен северен ветер, а температурите ќе се задржат под просекот за овој период од годината.
Македонија
Мицкоски-Мацут: Србија е искрен партнер и пријател со кого ја споделуваме визијата за стабилен, безбеден и просперитетен Балкан

Премиерот Христијан Мицкоски, денес во Владата оствари средба со премиерот на Република Србија, Ѓуро Мацут, кој престојува во официјална посета на нашата земја.
Двајцата премиери разговараа за унапредување на билатералните односи, економската соработка и инфраструктурното поврзување.
Акцент беше ставен и на трговската размена, заедничките енергетски проекти и олеснувањето на движењето на луѓе и стоки.
Мицкоски истакна дека Србија е искрен партнер и пријател, со кого ја споделуваме визијата за стабилен, безбеден и просперитетен Балкан.
Мацут изрази поддршка за реформските процеси во државата и нагласи дека Белград и Скопје ќе продолжат да соработуваат на заеднички проекти кои се во интерес на граѓаните на двете земји.
Двете страни се согласија дека продлабочувањето на пријателските врски меѓу двете држави претставува значаен придонес за регионалната стабилност и европската перспектива на Западен Балкан.
Македонија
(Видео) Коњановски: Реката Драгор добива ново лице

Во следниот мандат, една од најголемите заложби ќе биде реализација на многу значаен проект, уредувањето на коритото на реката Драгор, симбол на нашата љубов кон Битола, кон нејзината историја и иднина. Сега е време овој симбол да добие ново лице, со уредување по највисоки светски стандарди, изјави Тони Коњановски, кандидат за градоначалник на Битола од ВМРО – ДПМНЕ и коалицијата „Твоја Македонија“.
„Со овој проект не само што ја заштитуваме реката и околината, туку создаваме простор кој ќе нè обединува. Реконструираните мостови и новите пешачки патеки ќе овозможат полесно и побезбедно движење, ќе го поврзат градот од сите страни и ќе ја зајакнат неговата функционалност“, рече тој.
Дополнително, додаде Коњановски, поставувањето на современо, енергетски ефикасно осветлување, ќе овозможи Драгор да биде жив и безбеден дел од градот и во текот на ноќта.