Министерката за одбрана, Славјанка Петровска, го назначи Владимир Анчев за државен секретар во Министерството за одбрана.

Анчев во својата кариера има работено на многу менаџерски позиции во јавниот и во приватниот сектор. Во речиси дведеценискиот работен ангажман има стекнато богато искуство во доменот на меѓународната соработка и менаџментот на човечките ресурси – првенствено во рамките на Универзитетот „Св. Кирил и Методиј“ како соработник за меѓународна соработка, а потоа и во Генералниот секретаријат на Владата и Министерството за информатичко општество и администрација, каде што фокусот го става на развојот на софтвер за управување со човечки ресурси за 1.300 институции, како и воведување и одржување стандарди за управување со квалитет.

Работната кариера ја продолжува во приватниот сектор како менаџер на човечки ресурси, каде што го води процесот за воведување оддел за човечки ресурси и подготовка на правилници за внатрешна организација, како и анализа на трудот и спроведување на функционална анализа.

Во Министерството за одбрана работи од октомври 2020 година како посебен советник, а од декември 2021 активно придонесува во функционирањето на Министерството како државен советник.

Анчев има организирано голем број обуки од областа на менаџментот со посебен фокус на човечките ресурси, член е на Македонската асоцијација за човечки ресурси и Регионалната школа за јавна администрација, а автор е и на поголем број истражувачки трудови посветени на развојот на системот за јавна администрација.

Тој дипломирал право на Правниот факултет „Јустинијан Први“ на Универзитетот „Св. Кирил и Методиј“.