Македонија
ВЛЕН: Лани ДУИ ja разреши, денеска плачат за Весна Дамева

ДУИ, овој партиски клан што уништи сè, сега од опозицијата почна да продава политички морал и да зборува за притисоци. Но, ова не им успева бидејќи граѓаните многу добро знаат како го злоупотребиле секој институционален механизам само за своја корист, вклучувајќи ги и судовите, велат од ВЛЕН.
„Јавноста е добро запознаена дека обвинителот за организиран криминал и корупција, Ислам Абази, е близок до ДУИ. Тоа беше потврдено со објавени фотографии со братот на лидерот Ахмети, како и со високи функционери на оваа партија. Многу поранешни функционери на ДУИ најдоа „утеха“ во судскиот систем, каде што продолжуваат да делат „непристрасна правда“. Пример за ова е Иџет Мемети, кој беше фатен на дело и во исто време му направи ветинг на ДУИ.
Тоа што ДУИ зборува за постапување спротивно на законите е апсурдно само по себе. ДУИ е синоним за кршење на законите и влијание врз судскиот систем во континуитет. И за ова мора и ќе има одговорност“, оценуваат од коалицијата.
Потсетуваат на ДУИ и нивниот лидер Али Ахмети, кога на средбата на Водно со поранешниот претседател Пендаровски побара враќање на својот, како што го нарекуваат, шеф на бел коњ, Никола Груевски.
„И токму на оваа средба Ахмети имаше предложено два начина за негово враќање од Будимпешта, поточно преку “своите“ во судовите во земјата. Потсетуваме и дека за овој случај партијата на Ахмети изврши притисок и врз претседателот на Врховниот Суд, Беса Адеми. А за овие притисоци на оние кои продаваат лажен морал добија и опомени од странски амбасади за континуираниот притисок врз Беса Адеми.
Истата Весна Дамева која денеска поднесе оставка и ДУИ пролеат крокодилски солзи за притисок врз неа, Селим Адеми – член на ДУИ, кој во тоа време во својство на потпретседател ја надгласи и ја разреши од функцијата претседател бидејќи на дневен ред ги ставил точките што и одговараат на поранешната власт“, стои во соопштението на ВЛЕН.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски на саемот „Четири години работа за тебе“: Делата, а не зборовите ја покажуваат вредноста

На денешниот настан „Саем-Отчет“ под мотото „4 години работа за тебе“, претседателот на ВМРО-ДПМНЕ, Христијан Мицкоски, имаше свое обраќање пред присутните, истакнувајќи ја важноста на отчетноста и реализираните проекти во изминатите четири години.
„Честта е огромна да се присуствува на политичкиот саем кој е одговор на прашањето што работеа градоначалниците на ВМРО-ДПМНЕ и коалицијата во последните четири години. Тоа за нас претставува и одговорна одговорност, затоа што не бегаме од сите наши решенија, од целата наша работа и од проектите кои ги направивме изминатите четири години“, рече Мицкоски.
Тој нагласи дека вредноста на една личност не се состои од зборовите, туку од делата, не од памфлетите, туку од енергијата вложена за постигнување на успех.
„Образот и честта се најскапата работа која може да се задржи и за која нема манипулации, лажења ниту неискрен однос. Поважно од сè е стоечки исправено со гордо крената глава да кажеме дека поминавме низ еден тежок период, каде во исто време ги вадевме општините од бездната во која беа, последно долгогодишно запоставување, и решававме проблеми на граѓаните“, рече Мицкоски.
Тој истакна дека во текот на тие четири години, три години секој градоначалник на ВМРО-ДПМНЕ и Коалицијата работел со централна Влада која немала слух и имала други приоритети, кои не вклучувале локалните проблеми на граѓаните.
„Програмата која ја ветивме, во најголем дел, вие ја остваривте“, потенцира Мицкоски во обраќањето на Саем-Отчет.
На настанот присутните имаа можност да видат и детални прикази на проекти и реализирани активности на градоначалниците на ВМРО-ДПМНЕ и коалицијата во изминатите четири години, како дел од транспарентноста и отчетноста пред граѓаните.
Скопје
Дел од Кеј 13-ти Ноември останува без водоснабдување

Поради дефект на водоводна цевка, дел од корисниците на Кеј 13-ти Ноември, од хотел „Холидеј ин“ до Камениот мост, ќе останат без вода од 13:00 часот, информираат од ЈП „Водовод и канализација“ – Скопје.
Водоснабдувањето ќе биде прекинато се додека траат работните активности за отстранување на дефектот. Од јавното претпријатие апелираат до граѓаните за трпение и разбирање додека трае интервенцијата.
Македонија
„Храброста на нашите колеги е пример за идните генерации“, порачаа од ЕБР на Денот на Единицата

Единицата за брзо распоредување (ЕБР) денеска одбележува 24 години од своето формирање, а припадниците на оваа единица потсетија дека не ги забораваат своите колеги кои го дале животот за безбедноста и мирот на Македонија.
„Додека денес го одбележуваме Денот на Единицата за брзо распоредување и им оддаваме почит на храброста, посветеноста и професионализмот на припадниците на оваа единица, не смееме да ги заборавиме сите оние кои го дадоа својот живот за безбедноста и мирот на нашата татковина“, порачаа од ЕБР преку социјалните мрежи.
Тие додадоа дека жртвата на нивните колеги претставува темел на слободата, а нивната храброст е пример за идните генерации.
„Вечна им слава и почит“, завршуваат од ЕБР во пораката по повод јубилејот.