За ВМРО-ДПМНЕ, успешен попис ќе биде само пописот што е целосно усогласен со стандардите на Европската Унија и со стандардите на Евростат, изјави пратеникот Илија Димовски и рече дека пописот би требало да се одржи во 2021, а не оваа година како што најавува власта.

„За жал, граѓаните, а и ние, повторно имаме чувство дека пописот се користи за политички цели и е предмет на политички калкулации помеѓу партнерите во владејачкото мнозинство. Како пример, видовме дека тоа не е добро и не сакаме да дозволиме да биде предмет на политички калкулации“, рече Димовски.

Тој истакна дека пописот не смее и не треба да се разбере како страв или како радост на која било етничка заедница од можноста за добивање или губење какви било граѓански права.

„Пописот мора да биде исклучиво статистичка операција што ќе помогне за понатамошниот развој на Република Македонија“, истакна Димовски.

Тој рече дека ВМРО-ДПМНЕ ќе побара од владиното мнозинство пописот да го спроведе во 2021 година.

ВМРО-ДПМНЕ бара во најмала рака да има еден формулар каде што попишувачите и човекот што дал податоци ќе стави свој потпис и ќе одговара за податоците.

„Тие што ќе се попишуваат преку електронска апликација, според нас, не треба да се водат како резидентно население. Немаме проблем да се попишуваат граѓаните, но да знаеме точно кои се резиденти според статистиките на стандардите на ЕУ и Евростат, а кои се попишуваат, а не се резиденти во нашата држава, затоа што може да се случи во пописот како резиденти во Република Македонија да се попишат и лица што живеат подолго од една година, а немаат македонско државјанство“, рече Димовски.