Економијата во Македонија стагнира, а низ регионот и во Европа бележи раст, тврдат од ВМРО-ДПМНЕ, од каде што додаваат дека паради корупцијата во власта, инвестициите нè заобиколуваат и наместо во Македонија, странските инвеститори се одлучуваат за земјите од соседството.

„СДСМ ја зароби државата, а со тоа и целото општествено-економско работење падна на колена. Република Македонија ја заврши 2017 година без раст на БДП. Државата по долг период не бележи раст и тоа е само поради неспособноста на актуелната влада. СДСМ не работи за граѓаните, туку за теснопартиските интереси и елитите од „Бихаќска“. Секое македонско семејство од почетокот на годината е задолжено со нови 1.200 евра. Нов долг има, раст нема. Инвестиции воопшто. Ова го има само во Република Македонија под водство на СДСМ“, велат од ВМРО-ДПМНЕ.

Според партијата, власта удрила по џебот на граѓаните и тоа не еднаш, туку повеќепати.

„Немилосрдното задолжување на идните генерации е проследено и со покачување на акцизата на нафтените деривати 3,5 денари. Ова не беше доволен удар по џебот на граѓаните, па власта се реши на покачување на персоналниот данок на доход од 10 на 18 отсто. Или буквално кажано, задолжувањето на СДСМ, од кое граѓаните немаат никаков бенефит, ќе го враќаат токму тие преку повисоки даноци. Фијаското на економски план и целата безидејност СДСМ го покрива со дефокусирање на јавноста преку политичкиот прогон на неистомислениците“, додаваат од ВМРО-ДПМНЕ.

Неистомислениците се влечат по притвори и по судови со цел создавање приказна во медиумите, која ќе ја дефокусира јавноста од вистинските проблеми и економското фијаско приредено лично од Зоран Заев и СДСМ, велат од ВМРО-ДПМНЕ и според оваа партија државата е заробена, институциите се злоупотребуваат, а законите не важат.