Македонија
ВМРО-ДПМНЕ во Собранието алармира за енормното загадување на воздухот
Пратениците на ВМРО-ДПМНЕ и коалцијата „За подобра Македонија“, денеска во Собранието на РМ поднесоа информација за енормното загадување на амбиенталниот воздух во земјата, соопшти Никола Мицевски, координатор на пратеничката група на ВМРО-ДПМНЕ и коалицијата, при своето обраќање во прес-центарот на Собранието.
Покрај оваа инофрмација, пратениците на ВМРО-ДПМНЕ ќе побараат да се одржи и јавна распава во Комисијата за транспорт, врски и екологија во врска со енормното загадување, каде што ќе бидат повикани граѓански и еколошки здруженија, експерти и сите други што може да придонесат за да се спречи влошување на состојбата.
Мицевски истакна дека загадувањето на воздухот во Република Македонија урива рекорди како никогаш досега.
„Благодарение на актуелната власт, Македонија и официјално стана држава со најзагаден воздух во Европа. Оваа власт на чело со СДСМ и нивните функционери кога беа во опозиција ветуваше дека ќе го реши проблемот со загадувањето со низа мерки и проекти. Но, излажа. Не само што не го подобри квалитетот на воздух, туку, напротив, загадувањето на воздухот урива рекорди. Очигледно е дека СДСМ загадувањето го користеше само за политички поени и дека во ниту еден момент не помисли да се справи со оваа ситуација“, рече тој.

Координаторот на пратеничката група на ВМРО-ДПМНЕ додаде дека ситуацијата со енормното загадување на амбиенталниот воздух е алармантна и, како што рече, се доведува во прашање здравјето на граѓаните.
„Загрижувачки се податоците на Европската агенција за животна средина, која во последниот европски извештај за квалитетот на воздухот истакнува дека повеќе од 3.000 лица во Македонија годишно умираат како резултат на загадениот воздух. Во истиот тој извештај Македонија е прогласена за земја со најзагаден воздух и е во врвот по бројот на смртни случаи на жител“, истакна Мицевски.
Според него, власта, покрај тоа што ништо не прави за да го реши проблемот со загадувањето, се обидува преку исклучување на мерните станици во државата тоа да го скрие од граѓаните.
„СДСМ мора барем еднаш да понесе одговорност и барем еднаш да покаже дека искрено се грижи за граѓаните бидејќи сега е власт и може да реализира сè што ветуваше за подобрување на воздухот, а не да се моли да дувне ветар или да заврне дожд за да го тргне смогот што граѓаните секојдневно го дишат“, посочи тој.
Мицевски истакна дека како пратеници во Собранието избрани од граѓаните имаат обврска да алармираат за ваквата состојба поради што решиле да поднесат информација за енормното загадување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Зимзоленд: Продолжуваме со работа, шпекулација е дека настанот ќе биде затворен
Од Зимзоленд велат дека продолжуваат со работа и дека информациите за неговото затворање се шпекулации.
„Во последните часови на одредени медиуми се појавија неточни информации и шпекулации дека Зимзоленд ќе биде затворен. Ве информираме дека ова не е точно. Зимзоленд продолжува да работи со редовно работно време“, се наведува во јавното соопштението.
Во него се додава дека е точно дека во претходните денови имало инспекциски надзори, но велат дека до надлежните служби била доставена целосната и потребна документација.
Македонија
Ѓорѓиевски најавува враќање на празничниот дух, на 15 декември почнуваат настаните на плоштад „Македонија“
На 15 декември почнуваат предновогодишните настани на плоштад „Македонија“.
„Градот Скопје со радост најавува дека годинава празничниот дух повторно се враќа на плоштадот „Македонија“. Со посебна атмосфера, богата програма и многу изненадувања за сите генерации, претстојниот настан го означува почетокот на новогодишните и божиќните празнувања во главниот град“, велат од Градот.
„ Ајде заедно да го осветлиме градот. 15.12.2025 во 18:00 часот. Почитувани скопјани, драги родители, најдраги дечиња, нашиот град е најубав тогаш кога свети од радост, насмевки и празнична магија. А сите ние – и младите, и возрасните ја заслужуваме таа топлина што ја носат Новогодишните и Божиќните празници. Затоа, со огромна радост ве поканувам заедно да го означиме почетокот на едно ново празнично поглавје исполнето со забава, музика, многу подароци и вашите омилени херои кои ќе ги израдуваат најмалите. На 15 декември, во 18 часот, на плоштадот „Македонија“, заедно со вас ќе го осветлиме градот и после неколку години ќе ја почувствуваме првата искра на празничниот дух. Веќе од наредниот ден, па сѐ до самата Нова година, ќе следуваат секојдневни настани и забави за сите генерации. А дочекот, ви ветуваме, ќе биде спектакуларен и незаборавен“, објави градоначалникот Орце Ѓорѓиевски.
Македонија
Притвор за скопјанецот кој насилно упадна во студиото на „Инфомакс“
Судот му определи притвор на 43-годишниот скопјанец кој вчера насилно упадна во студиото на „Инфомакс“.
Според информациите од МВР, полицијата поднесе кривична пријава по брза постапка против Г.С.(43) од Скопје поради постоење основи на сомнение за сторени кривични дела насилство и спречување на службено лице при вршење службено дејствие.
„Имено по претходна пријава од страна на А.М. водител на емисијата ‘Инфомакс’ и по преземени мерки од страна на полициските службеници извршен е разговор со оштетениот и сведоците на настанот, обезбедени се видео записи од безбедносни камери, извршен е службен разговор со пријавениот и документирани се заканувачки пораки од пријавениот кон оштетениот. Тој е изведен пред судија на претходна постапка при што му е изречена мерка притвор“, соопшти МВР.

