Македонија
ВМРО-ДПМНЕ ги обвини партиите на власт за вмешаност во бегството на Мемети, се бара политичка одговорност

Партиски кадри на СДС и ДУИ директно се вмешани во бегството на Мемети, политичка одговорност од власта за овој случај мора да има, велат од опозициската ВМРО-ДПМНЕ преку соопштение.
Од партијата коментираат дека двете партии на власт ја претвориле Македонија во Див Запад.
„Затвореник им избега, пукаше и рани полициски службеник, а Ковачевски и Спасовски се скриени во глувчешка дупка. Со денови нема одговори од страна на СДС и ДУИ, која е улогата на партиските послушници во бегството на Беким Мемети? Нема одговор која е вмешаноста на Љупчо Кузмановски во целото филмско сценарио за бегство на затвореникот Мемети, кој треба да издржи 20-годишна казна?
Дали Кузмановски е советник за безбедност на КПУ „Идризово“ и директорот Шпенд Тахири и дали како советник е одговорен директно за безбедноста на затворот и спроведување затвореници и со тоа директно е виновен за филмското бегство на Мемети? Дали Миле Зечевие директно е инволвиран во поставувањето на Кузмановски на оваа раководна позиција во КПУ „Идризово“? Власта на СДС и ДУИ со денови не одговори дали и колку во бегството на Мемети има политичка одлука, со тоа што инволвирани и осомничени во овој случај се активни партиски кадри и членови и на СДС и на ДУИ“, наведува партијата во соопштението.
Од тука се децидни дека овој случај е само уште еден доказ за целосното девастирање на безбедносниот систем со криминал и корупција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски ќе се сретне со Орбан во Будимпешта

Премиерот Христијан Мицкоски в петок ќе присуствува на CPAC конференција во Будимпешта, Република Унгарија, соопшти владината прес-служба.
Мицкоски во рамки на посетата ќе се сретне со унгарскиот премиер, Виктор Орбан.
Македонија
Сојузниците од НАТО треба да трошат по 5 отсто од БДП за одбраната, му рекол Рубио на Муцунски

Државниот секретар на САД, Марко Рубио на средбата со шефот на македонската дипломатија, Тимчо Муцунски, нагласил дека е неопходно сојузниците во НАТО да дадат поддршка и да постигнат 5 отсто издвојување за одбраната, соопшти Стејт Департментот во соопштение по средбата.
Двајцата ја потврдиле силната врска меѓу Соединетите Американски Држави и Северна Македонија и ги истакнале заедничките интереси во однос на регионалната стабилност, економската соработка и НАТО.
Тие разговарале и за можностите за проширување на економската соработка, вклучувајќи ја трговијата и инвестициите.
Муцунски по средбата соопшти дека е потврдено стратешкото партнерство со САД, а нашата држава продолжува да дава активен придонес како кредибилен сојузник, со инвестиции повеќе од 2 отсто од БДП во одбранбениот сектор.
Македонија
Не се глупирајте, му порача Арсовска на Изет Меџити

Кажете колку пари земавте за нелегалните објекти и не се глупирајте, му порача градоначалничката Данела Арсовска на вицепремиерот, Изет Меџити, кој претходно денес и’ најави кривична пријава.
Меџити ја нарече Арсовска инструмент за остварување на планот на ДУИ за дестабилизација преку општините, на што градоначалничката реагираше преку Фејсбук статус попладнево.
„Изет изјавил дека ќе сум ја дестабилизирала државата. Изет, единствена дестабилизација од мене ќе добиете ти и твојот измеќар Висар што ти ги потпишувал незаконските дивоградби за кои луѓе ви платиле милиони евра, а сте ги лажеле дека ќе можат да ги легализираат. Не се глупирајте, ви ја знаеме играта, ви ги знаеме лагите, знаеме кога се обидувате да манипулирате со јавноста и да ја дефокусирате. Како тоа секогаш кога некој ќе ви чепне во криминалот тоа е „обид за дестабилизација“? Каква е таа матрица на ВМРО-ДПМНЕ и измеќарите од ВЛЕН? Секогаш кога се во тесно, кога флагрантно се фатени со „рачињата во медот“, тоа било обид за дестабилизација. Каква дестабилизација? Што ќе се дестабилизира? Ќе ви кажам јас што. Единствено нешто што ќе се дестабилизира од откривањето на криминалот со дивоградбите во Чаир е вашата комоција и прилив на нелегални пари. Тоа ќе биде дестабилизирано. Кажете колку пари земавте за нелегалните објекти, не се глупирајте“, напиша Арсовска.
Меџити претходно ѝ порача на Арсовска да се занимава со своите надлежности и најави и пријава против неа за, како што рече, лажни тврдења во врска со објектот во Чаир пред кој се сликала и го објавила. Меџити овој случај го квалификува како „последен обид и план на Ахмети за дестабилизација преку општините“.