Денес, во ВМРО-ДПМНЕ е нова генерација луѓе што креираат автентична политика што треба да донесе промени што на државата ѝ се неопходни. Ова е време на големи предизвици со кои оваа Влада не може да се справи поради својата неспособност, соопшти ВМРО-ДПМНЕ.

„Сведоци сме на ад хок решенија во економијата, на енормно задолжување на државата и на комплетно сервилно однесување во преговорите со Бугарија. Денешните признанија во судскиот процес се доказ за постоење брутален политичкиот прогон и терор од страна на власта. Очигледно, соочени со притисокот на овој прогон со закани за големи казни, денешните искази се индивидуален чин на луѓето да се спасат од овој притисок. Методите на Заев продолжуваат и од неговиот двојник Ковачевски.

Само за потсетување, се соочуваме со власт што држеше во заложништво пратеник во премиерската вила, само за да опстане извршната власт. Ако тоа се случи пред некој месец на овој начин, може само да го замислиме степенот на теророт врз овие луѓе за да се спроведе денешното сценарио на „признавање вина“.

Оваа власт го потценува овој народ, кој беше сведок на многу вакви епизоди последниве пет години. Оваа власт е на колена. За оваа власт, приоритет се криминалот и корупцијата што се тераат под изговор на кризна ситуација. Ова власт нѐ турка сѐ подолу во сиромаштија додека индивидуалци се богатат“, се вели во соопштението.

Од партијата порачуваат дека Владата го потценува народот и дека многу бргу ќе дојде времето кога ќе треба да одговараат за сѐ што направиле.

Од ВМРО-ДПМНЕ се заканија дека нема да има отстапки за криминалите.

„ВМРО-ДПМНЕ има луѓе што ќе направат позитивна промена во оваа држава и нема да отстапиме пред какви било притисоци. Времето на промени доаѓа многу бргу“, се додава во соопштенито.