Македонија
ВМРО-ДПМНЕ: Додека од уста не ги извадија правата на Албанците, ДУИ и Артан Груби си ги полнеа џебовите, СДСМ молчеше

Според ВМРО-ДПМНЕ, СДС и ДУИ се едно исто. И двете партии, како што велат, ги користат најчувствителните теми во општеството за ситни политички поени и за лично богатење на поединци.
„СДС долго време се криеше зад флоскулата „едно општество за сите“, за од друга страна да ги направи најголемите и најдлабоките поделби во македонското општество. Додека го делеше македонското општествено ткиво, лицата на чело на СДС, како Зоран Заев и Венко Филипче и нивните браќа, правеа милиони. Исто и ДУИ додека се повикуваше на Албанците и себеси се промовираше како нивен најголем и единствен заштитник, Албанците од Македонија масовно се иселуваа. Додека од уста не ги извадија правата на Албанците, раководството на ДУИ меѓу кои Артан Груби, си ги полнеа џебовите. Артан Груби и ДУИ единствено што направија за Албанците е што ги злоупотребија за тие да се богатат. Додека Артан Груби крадеше, ДУИ ги убедуваше сограѓаните Албанци дека се бори за нив. А, секој изминат ден на ДУИ на власт беше причина повеќе Албанците, исто како и Македонците, да си заминуваат од државата“.
Според партијата на Мицкоски, Груби и ДУИ секогаш биле само за заштита на интересите и џебовите на поединци, а не за Албанците и најмалку за Македонците.
СДС, како што нагласуваат, знаеја за криминалот на Груби, на кој прво му дадоа одврзани раце да краде, па потоа му се приклучија и заеднички се богатеа на грбот на народот.
„И уште една причина поради која СДС молчеше за криминалот на Груби, е затоа што така се држеа на власт. И се така седум години народот осиромашуваше, државата се пљачкаше, а челниците на СДС и ДУИ се богатеа. Коалицијата на СДС и ДУИ, беше криминална коалиција од интерес за ограбување на Македонија, а за лично богатење на нивните луѓе. Затоа и се поддржуваа седум години. Но, СДС и ден денес одработува за Груби, кои наместо да се дистанцираат од него и да го повикаат да се врати да се соочи со правдата, тие држат прес-конференции смислувајќи разно разни приказни. Наместо уште да му служат на Артан Груби, СДС да им се извини на македонските граѓани за сервилноста и грабежот на Македонија“, истакнуваат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Посебен режим на сообраќај во Скопје поради протест

СВР Скопје ги известува граѓаните дека утре со почеток во 11.00 часот поради одржување на протест, Единицата за безбедност на патниот сообраќај ќе преземе мерки за посебен режим на сообраќајот.
Протестот предвидено е да започне пред зградата на ССМ на улицата „Мирче Ацев“ со движење лево по улицата „Филип Втори Македонски“, десно по улицата „11-ти Октомври“, право по улицата „Димитрие Чуповски“, десно по улицата „Васил Главинов“, право по булеварот „ВМРО“, лево по булеварот „Илинден“ до пред Влада на Република Северна Македонија.
СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.
Македонија
Љутков во Кјото: Напредок во културната соработка со Јапонија

Министерот за култура и туризам, Зоран Љутков, кој е дел од владината делегација која е во посета на македонскиот павилјон во рамките на „ЕКСПО 2025“ во Осака, Јапонија, денеска во Кјото, заедно со Игор Јанушев, генерален секретар на Владата на Македонија, и Андријана Цветковиќ, прв амбасадор на Македонија во Јапонија, оствари работна средба со комесарот за културни врски на Јапонија, Шуничи Токура.
На средбата беа разгледани можностите за унапредување на соработката во областа на културата и туризмот меѓу двете земји.
Од Министерството соопштија дека Љутков и Токура изразија подготвеност за дефинирање конкретни идни активности што ќе придонесат за зближување на македонскиот и јапонскиот народ преку културна размена и туристичка промоција.
Во тој контекст, министерот Љутков потсети дека минатата година во Скопје беше потпишан билатерален документ кој, како што истакна, претставува значаен импулс во продлабочувањето на културните врски меѓу Македонија и Јапонија.
„Меморандумот претставува прв билатерален договор во оваа сфера меѓу нашите држави и има цел да овозможи поблиско запознавање и соработка на двете култури и чекор што отвора нови хоризонти за креативна размена, заеднички проекти и долгорочно пријателство“, потенцираше Љутков.
На средбата Љутков подвлече дека меѓународната соработка и презентација на вредностите на македонската култура се приоритет во културната политика на Владата и на Министерството за култура и туризам. Во таа смисла, тој укажа дека нашата држава и во иднина ќе настојува континуирано да биде присутна на големите настани во Јапонија, вклучително и да организира и комплексни манифестации преку кои ќе ѝ се овозможи на јапонската јавност да се запознае со нашите автори, репродуктивни уметници, нашето творештво и културно наследство.
Македонија
Перински во Шуто Оризари: Со поддршка од над еден милион евра го подобруваме животот на локалното население

Министерот за локална самоуправа, Златко Перински, и неговиот заменик, Ерџан Селими, денеска ја посетија Општина Шуто Оризари, каде што одржаа средба со градоначалникот Курто Дудуш и членовите на општинскиот Совет.
При посетата, која се реализираше во рамки на иницијативата „Каде што срцето е дома“, се разговараше за клучните прашања кои се однесуваат на локалниот развој, со посебен фокус на инфраструктурата и животната средина. Присутните едногласно констатираа дека атмосферската канализација е едно од најгорливите проблеми со кои се соочува општината, а во насока на надминување на овој проблем, Општината со владина поддршка веќе презема конкретни мерки.
Се имплементираат четири проекти за подобрување на атмосферската канализација, кои се дел од 24 одобрени на Шуто Оризари на првиот владин повик за поддршка на инфраструктурни општински проекти со вкупна вредност од над 1 милион евра.
Меѓу значајните теми на средбата беше и претстојната измена и дополнување на Законот за локална самоуправа, со кои ќе се овозможи унапредување на отчетноста на градоначалниците и зголемување на транспарентноста во работењето на општините.
Министерот Перински при посетата на Шуто Оризари истакна дека таа е пример за мултиетничка заедница на Македонци, Роми, Албанци и Турци, и токму таа разновидност е нејзината најголема сила. Притоа, ја истакна и важноста на продолжување на активната соработка помеѓу локалната и централната власт, за да се обезбеди одржлив развој и напредок на локалната самоуправа во сите сфери.
Министерството и Владата, порача министерот, ќе продолжат со континуирана поддршка на Шуто Оризари како еден од главните чекори кон зајакнување на локалната самоуправа и подигнување на стандардот на живот на сите граѓани во неа.