Македонија
ВМРО-ДПМНЕ: Единствено освежување денес во воздухот во Македонија е фактот што СДС од опозиција отвори очи и виде дека не сработеле ништо за животната средина

СДС вети, дека ќе обезбеди чист воздух во македонските градови. Имаа апсолутна власт, претседател, влада и градоначалници и успеаа да не сработат ништо за животната средина и почистиот воздух, велат од ВМРО-ДПМНЕ.
„Последиците од нивната неработа, ги гледаме денес. СДС донесе некаква листа на желби, наречена план, но заборави да сработи нешто и планот остана нереализиран. И додека, по медиуми зборуваа за колку сакаат чист воздух, СДС не заборавија на првата седница на нивната влада, да ги намалат давачките за петрол кокс, па фирмите на Заеви, да можат да остваруваат екстра профит, на штета на загадениот воздух и здравјето на луѓето. СДС го направи горивото за Заеви поевтино, за сметка на тоа, сега Струмица е најзагаден град во Македонија? Дали вредеше да му го зголемиме профитот на Заев, за сметка на здравјето на струмичани? Во 8 години власт, СДС не сакаше да го донесе Законот за индустриски емисии. Зборуваа за разни бајки, ни објаснуваа што се не знаат или што се не можат, но прст не мрднаа во насока на контрола на загадувачите. Тоа не е само забелешка во сите ЕУ извештаи, тоа е обврска кон нашите деца. Зарем треба да се потсетиме дека СДС направи се што беше во нивни раце да го распарчи и уништи системот за централно греење во Скопје“, посочуваат од ВМРО-ДПМНЕ и додаваат:
„После 8 години власт на СДС, испораката на природен гас низ Македонија, не мрдна ни милиметар. Природен гас не донесоа низ цевка ни во Велес, ни во Тетово, ни во Прилеп, ни во Битола, ни во Неготино. Преку Фондот за иновации СДС испра милионски суми, кои требаше да придонесат за почист воздух. Дали некој во СДС, следи што придонеле средствата кои ги даваа на свои блиски од Фондот за иновации поврзани со повикот за почист воздух? Колку е почист воздухот заради тие милиони евра? Зборуваа за зелени површини, а го укинаа проектот Засади ја својата иднина со кој се засадија милиони дрвца. Го запуштија системот за брза реакција на пожари, ги покрадоа Македонски шуми. Програмата на Владата на ВМРО-ДПМНЕ и коалиционите партнери за справување со проблемот на загадениот воздух се преточува во акција. Дефинирани се мерки и акции, дефинирани се надлежни институции и рокови. Загадениот воздух не е проблем што може да се реши за едно попладне, еден месец или една сезона. Загадениот воздух не е проблем што може да го реши еден човек или една институција. Оваа Влада посветено работи да го заврши својот дел од работата. Борбата со загадениот воздух бара вклучување на сите чинители, државните институции, индустријата и граѓаните. Планската програма за почист воздух се вградува во планот за работа на секој државна институција. Владата на ВМРО-ДПМНЕ ја започна борбата со овој горлив проблем кој што го наследивме од СДС и кој ги убива нашите најблиски. Ги повикуваме сите чинители, да го дадат својот придонес за почист воздух. Секој од својот двор, од својот ауспух, од својот оџак да започне со грижата за сопственото здравје и здравјето на своите комшии. Заедно низ тешка и посветена работа ќе стигнеме до почист воздух, позелена Македонија и здрави деца. Граѓаните на Македонија не ги зачувува фактот дека вест на денот за СДС е што во опозиција видоа дека како власт не работеле ништо корисно“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.