Македонија
ВМРО-ДПМНЕ: Македонија е рекордер по починати од корона на милион жители во целиот регион
Власта исклучително лошо ја менаџира здравствената и економската криза која произлезе од епидемијата со корона вирусот. Заев и соработниците се занимаваат со внатрепартиски пресметки и матни зделки, а здравствените работници се оставени без долго најавуваната набавка на медицинска опрема и заштитни средства, кои им се неопходни за борба со епидемијата, соопшти ВМРО-ДПМНЕ.
Според партијата, затоа Македонија е рекордер по починати од корона на милион жители во целиот регион и имаме голем процент заразени здравствени работници.
„Власта на Заев е ставена во полн погон за исцицување на буџетот и предизборна корупција, додека граѓаните се борат за своето здравје и својот живот. Мислат дека ако граѓаните се во страв и под полициски час, нема да може да се разбере за сомнителните тендери или за кршењето на полицискиот час на нивните активисти, кои со грст производи спакувани во партиски брендирани пакети ќе го купуваат гласот на најзагрозените гласачи. Граѓаните ја гледаат не само нивната неспособност, туку ја гледаат и нивната криминогеност.
Наместо за народот и стопанството тие се борат сред епидемија за фотелја и за нивниот џеб. Затоа Македонија има буџетска дупка од 120 милиони евра во првите три месеци и генериран нов долг од 250 евра за секое семејство. СДСМ и Заев знаат дека крајот на нивното владеење е многу блиску и стануваат се понервозни. Политичката одговорност ќе ја понесат и од тоа нема бегање, а потоа ќе следи и истрага за нивните сомнителни потези“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Јанев со раководството на СВР Скопје: безбедносната состојба задоволува но има реални можности за натамошно подобрување
Директорот на Бирото за јавна безбедност при Министерството за внатрешни работи, Александар Јанев денеска го посети Секторот за внатрешни работи Скопје каде што имаше работен состанок со раководството на оваа организациона единица на македонската полиција, а кој што беше посветен на целите и задачите на Секторот во насока на натамошно подобрување на неговата ефикасност и квалитет на работа во интерес на безбедноста на граѓаните во главниот град.
На средбата беше резимирана актуелната состојба во повеќе сфери од безбедноста на територијата под надлежност на СВР Скопје, особено од аспект на сложеноста на обврските и задачите што произлегуваат од спецификите на подрачјето (бројност и фреквентност на луѓе, административни и други значенија и слично) при што беше оценето дека безбедносната состојба задоволува но и дека има реални можности за нејзино натамошно подобрување. Во тој контекст на состонакот, меѓу другото, стана збор и за скорешните предвидени измени во организационо-структурното функционирање на Секторот, и дека тие сигурно можат позитивно да се одразат во секојдневното работење на сите служби во рамки на оваа организациона единица при Бирото за јавна безбедност.
Македонија
Филков-Кељменди: разменети искуства, а посебен акцент ставен на т.н. систем за електронско управување и распределување на предметите
Во рамки на службената посета на Република Косово, делегацијата предводена од министерот за правда Игор Филков оствари работна средба со државниот јавен обвинител, Бесим Кељменди.
На средбата се дискутираше за досегашната соработка меѓу двете држави на ова поле. Беа разменети и позитивните практики и искуства, а посебен акцент беше ставен на Информатичко-комуникациските технологии, односно т.н. систем за електронско управување и распределување на предметите.
Во таа насока, од страна на Јавното обвинителство на Република Косово беше презентиран начинот на работа на системот за електронско управување на предметите.
Двете страни се согласија за интензивна соработка помеѓу Република Северна Македонија и Република Косово и за нејзино натамошно продолжување и продлабочување во оваа сфера.
Македонија
Митева и Љатифи Азизи избрани за портпароли на Владата
Денеска се одржа владина седница на која се избраа портпароли на Владата на Република Северна Македонија.
За портпарол на Владата е избрана Марија Митева.
„М-р Марија Митева по професија е дипломиран правник на Универзитетот Св. Кирил и Методиј – правен факултет Јустинијан I, со магистратура по деловно право и положен правосуден испит.
На професионален план, Марија поседува богато работно искуство во правната и политичката сфера, со повеќе од 10 години прогресивно работно искуство. Нејзината професионална историја вклучува позиции како советник за правни работи во Владата, како и советник за нормативни работи во Град Скопје. Во изминативе години активно се занимава со политика, што резултираше со нејзин избор за пратеник во Собранието каде беше вклучена во креирањето и разгледувањето на значајни закони и политички одлуки кои влијаат на иднината на државата.
За портпарол на Влада е назначена и Венера Љатифи Азизи.
Венера Љатифи Азизи е поранешна уредничка и новинарка во Радио Слободна Европа во Прага, уредничка во новинската агенција МИА, уредничка и водителка во Алсат М Телевизија, уредничка во весникот КОХА, А1 Телевизија, и други медиуми во земјата. Актуелно вработена во кабинетот на градоначалникот на Општина Чаир како одговорно лице за односи со јавноста и за поддршка на градоначалникот. Дипломиран политиколог во Универзитетот на Југоисточна Европа. Актуелно магистрант по дипломатија и меѓународни односи на тема „Улогата на дипломатските претставништва и евроатланските интеграции на Северна Македонија“, се нагласува во владиното соопштение.
Наум Стоилковски е именуван за Советник за комуникации и односи со јавност задолжен за координација на портпароли.
„Стоилковски е дипломиран новинар на Правниот факултет „Јустинијан Први“ при Универзитетот „Св. Кирил и Методиј“ во Скопје.
Стоилковски има повеќедецениска долга и плодна медиумска и новинарска кариера во домашни и странски медиуми, каде што професионално се надоградува и извршува повеќе функции во медиумската сфера.
Во неговата кариера работел во пишани медиуми, дневни весници, неделници, работел како ТВ новинар, уредник на вести, продусер, уредник и водител на ТВ и радио емисии, како и на современите интернет медиумски содржини“, појаснуваат од Владата.