Пратеничката на СДСМ, Славјанка Петровска, денес присуствуваше во Делегацијата на ЕУ, во Скопје, каде имаше свој говор, и каде втора година по ред, се одржува настан во сеќавање на 24 февруари, кога во 2022 година, почна руската инвазија врз Украина.

-Како демократски општества не можеме и не смееме да ја оставиме Украина сама. И тогаш и денес, ќе бидам гласна во повикот дека поддршката и помошта која ја даваме на Украина мора да биде повидлива и пореална. Затоа што не смееме да заборавиме дека и тогаш и сега, Украина е живиот штит на Европа, рече Петровска, во својот говор.

Република Северна Македонија помина низ тешки политички и економски предизвици, па дури и безбедносни и затоа длабоко ја разбираме важноста на меѓународната солидарност и поддршка, потенцираше Петровска.

-Лично јас, верувам и сите ние, ги поддржуваме сите дипломатски напори кои имаат за цел постигнување на праведен и траен мир – мир што ќе биде во согласност со меѓународното право и волјата на украинскиот народ. Иднината на Украина е иднина на Европа. Наша заедничка одговорност е да обезбедиме сигурност и одржливост на одлуките кои ќе бидат донесени, рече во својот говор, пратеничката на СДСМ, Славјанка Петровска.

Таа се осврна и на прашањето кое деновиве се поставува, а тоа е: дали Путин победува.

-Тоа не е затоа што му е грижа за илјадниците загинати од двете страни, туку затоа што знае дека војната е изгубена. Она што требаше да биде 48 часовна инвазија и освојување на Киев, се претвори во 3 годишен отпор, решителност, храброст и одлучност. Затоа нашата поддршка за Украина не смее да престане, и сите ние заедно мора да останеме со Украина до крај. Затоа што денес, Украина не само што се брани од агресијата, туку се бори и за принципите врз кои почива мирот во Европа, рече Петровска.

Премиерот Христијан Мицкоски вели дека има исклучително блиска и непосредна соработка со министерот за животна средина, Изет Меџити, кого ДУИ со денови го обвинува за корупција. Мицкоски ја повика партијата да достави докази, доколку ги има.

„Сите што поседуваат докази за такво нешто ги повикувам, го знаат мојот број, ако треба, ќе напуштам состанок за да ги предадеме на органите што треба да постапуваат. Во спротивно, морам да ги предупредам од ДУИ дека продолжуваат да сеат пердуви, да се занимаваат со магла, магла што е оптоварена со зборот корупција, бидејќи тоа беше нивно второ име во минатото, во кое главен атрибут беше трговскиот центар ‘Соравија’ во Скопје, автомобилите ‘ролс-ројс’ на сватовите, деловните простории на тогашниот потпретседател и шеф на кабинет на господинот Ахмети и така натаму. Можам на една цела прес-конференција да ги редам скандалите. Разбирам дека тоа е Фројд и дека тоа владее со нивната потсвест, но јас апсолутно имам доверба во работењето на господинот Меџити“, рече денес премиерот Мицкоски одговарајќи на новинарски прашања во Владата по објавата за реконструкциите на болницата „8 Септември“ и охридскиот аеродром „Св. апостол Павле“.

Демократската унија за интеграција и денес потсети на корупциски скандал во Министерството за животна средина, каде што контролата на Државниот управен инспекторат утврдила злоупотреба на службената должност на министерот Меџити и на неговиот кабинет. ДУИ наведува дека доверливи извори од Министерството за животна средина потврдиле дека шефот на кабинетот на Меџити бил клучна фигура во шемата за уцени и мито со вршење притисок врз компании и граѓани за секоја административна услуга.

Министерот за надворешни работи и надворешна трговија, Тимчо Муцунски, денес се обрати на Сегментот на високо ниво на 58-та сесија на Советот за човекови права (СЧП) на Обединетите нации во Женева.

Во своето обраќање, министерот Муцунски истакна дека Советот за човекови права е најзначајниот форум за справување со предизвиците кои го попречуваат остварувањето и заштитата на основните човекови права и слободи ширум светот. Тој нагласи дека почитувањето на демократските принципи, човековите права, човечкото достоинство и владеењето на правото се универзални вредности што мора да бидат почитувани од сите. Истовремено, ја потврди посветеноста на државата кон постигнување на највисоките стандарди за заштита на човековите права и нивна доследна имплементација на национално ниво.

„Промоцијата и заштитата на човековите права, како и посветеноста кон јакнење на мултилатералната соработка за нивно почитување и заштита, се темел на надворешната политика на нашата држава.

Остануваме посветени на заштитата на човековите права и слободи, со посебен фокус на правата на жените и децата, заштитата на лицата со попреченост, како и борбата против сите облици на дискриминација и спречување на нивните нарушувања,“ истакна министерот Муцунски.

Тој додаде дека Република Северна Македонија, како членка на Советот за човекови права во периодот 2025-2027 година, ќе остане цврсто посветена на заштитата на човековите права и на соодветното справување со нивните нарушувања, без разлика каде тие се случуваат.

„Како член на Советот, остануваме посветени на заштитата на човековите права и соодветното справување со нивните нарушувања, без разлика каде се случуваат,“ нагласи министерот Муцунски.

Тој истакна дека Советот за човекови права останува клучна платформа за дискусија и справување со предизвиците што го доведуваат во прашање уживањето на човековите права и слободи на глобално ниво. „Ова е можност што не смееме да ја пропуштиме, доколку сакаме поефикасно и одговорно дејствување за Агендата за човекови права,“ заклучи тој.

На Високиот сегмент на 58-та сесија на Советот за човекови права, кој ќе трае од 24 февруари до 4 април, учествуваат шефови на влади и држави, како и министри за надворешни работи. Главната цел на сесијата е реафирмирање на важноста на работата на Советот и неговите механизми за целосно справување со предизвиците што влијаат врз уживањето на човековите права и слободи.