Кога станува збор за здравјето на граѓаните, не смее да има никакви калкулации, политикантство или дејствување само заради задоволување на суетата. Македонија се соочува со сериозна закана за здравјето на граѓаните, но и со економски колапс, кој ќе биде со катастрофални последици за нашата држава. Состојбата е лоша, а тоа го посочи и претседателот на државата, кој самиот призна дека системот не може да издржи и дека ќе колабира, соопшти ВМРО-ДПМНЕ.

Според партијата, на бизнисот итно му е потребна инјекција, пари и помош. Од брзината на имплементација на мерките зависи дали ќе се спречи економската катастрофа. Лавина отпуштања од работа веќе почнаа во неколку градови.

„ВМРО-ДПМНЕ предлага итно замрзнување на обврските на компаниите кон државата чија работа е поврзана или е погодена од ситуацијата. Предлагаме и итно замрзнување на обврските за компаниите кон банките и заемодавателите, најмалку за март, а доколку е потребно и кризата продолжи, и за април. Владата мора да ја преземе обврската и да ги сторнира и плати каматите по однос на кредитите на компаниите за март, а доколку продолжи кризата, и за април. ВМРО-ДПМНЕ предлага државата да ги плати трошоците за вработените во компаниите што се погодени во висина од 50 отсто од вкупниот трошок за вработените, односно 50 отсто од бруто-платата. Мора да  се направи анализа на сè она што се случува во моментот, кои сектори и компании се погодени и да им се исплати државна помош во форма на субвенции. Смешните мерки и 5 милиони евра наменети за стопанството не решаваат ништо“, се додава во соопштението.