Македонија
ВМРО-ДПМНЕ: Нема да добиеме во јуни датум за преговори со ЕУ

Македонија минатиот јуни не доби датум за преговори. Датум за преговори нема да добиеме ниту овој јуни, велат од ВМРО-ДПМНЕ преку соопштение.
„Земја која е закована на дното на листите за корупција не може да се надева на членство во ЕУ. Земја водена од аболицирани криминалци кои работат по принципот „евро за црквата, евро за вице” нема да станат дел од ЕУ. Тоа е цената која граѓаните ја плаќаат за лагите на Зоран Заев и неговиот послушник Стево Пендаровски.
Губитникот Стево Пендаровски кој никогаш за ништо не носел одлуки е избран од Зоран Заев само за да го штити и прикрива криминалот“, велат од ВМРО-ДПМНЕ.
Опозицијата додава Пендаровски, како и Заев, нема принципи.
„Пендаровски ги поддржува неморалните акти на лидери на партии од неговата коалиција кои за пари го продаваа името на државата. Пендаровски молчи за снимките кои ги виде целата јавност затоа што и тој би го продал името за глас на изборите кој би му овозможил да помогне во криминалите на Заев. Губитникот Стево Пендаровски молчи и за криминалот со „Глобал“ од 8 милиони евра и срамната аболиција со која Заев и избега на правдата, затоа што е спремен на се, па дури и на криминал само за да добие на избори.
Губитникот Стево Пендаровски е во друштво на криминалции и тоа не му пречи. Губитникот Стево Пендаровски е соработник во криминалот. Човек кој што е во криминал, не може да ја придвижи Македонија кон ЕУ. Таквите луѓе се ретроградни и истите ја туркаат Македонија на дното“, смета ВМРО-ДПМНЕ.
Партијата додава дека државата има потреба од нов тип на политичари, чесни и честити, а гласот за Гордана Сиљановска Давкова е глас за промени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Славевски најави мерки за поттикнување поповолно кредитирање за купување станови

Директорот на Агенцијата за катастар на недвижности, Иван Живковски, денеска оствари работна средба со гувернерот на Народната банка, Трајко Славевски.
На средбата се разговараше за тековната состојба на пазарот на недвижности и за можностите за поефикасна размена на информации меѓу двете институции. Како што соопштија од Катастар, целта на средбата е креирање нови мерки за полесен пристап до кредити за купување прв стан.
Директорот Живковски ја изрази подготвеноста на Катастарот за интензивна соработка со Народната банка, нагласувајќи дека податоците за тековните трендови на пазарот на недвижности се клучни за креирање ефективни политики. Тој посочи и дека во тек е работа на повторно активирање на Регистарот на цени и закупнини, кој претходното раководство го имаше целосно прекинато.
Гувернерот Славевски истакна дека се подготвуваат мерки за поттикнување поповолно кредитирање на објекти за живеење, особено за млади граѓани и брачни парови кои првпат купуваат стан.
„Нашата цел е да овозможиме подобри услови и достапност на кредити за становите што се купуваат за живеење. Со тоа ќе им помогнеме на граѓаните што имаат вистинска потреба од сопствен дом, во услови кога цените на недвижностите растат“, рече Славевски.
Агенцијата за катастар и Народната банка договорија потпишување на меморандум за соработка, кој ќе овозможи подобра размена на информации, брза достапност на податоци за недвижности и зајакнување на аналитичките капацитети за следење на пазарните трендови.
Соговорниците се согласија дека разликувањето на кредитите за прво живеалиште од оние за инвестиции, како и зајакнатата институционална соработка, ќе создадат услови за поефикасна поддршка на граѓаните при решавање на станбеното прашање и индиректно ќе влијаат на стабилизирање на цените на пазарот на недвижности.
Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.