Службите на Општина Центар, денеска повторно го исчистија насобраниот смет околу кантите во населбата Кале што се под надлежност на ЈП „Комунална хигиена“ и Град Скопје, објавија од Општина Центар.

„И ова утро, повторно го исчистивме насобраниот смет околу кантите во населбата Кале што се под надлежност на ЈП „Комунална хигиена“ и Град Скопје. Комунална хигиена два пати испраќа деманти дека чисти според динамика утврдена со Оперативна програма за собирање и транспортирање на комунален отпад, но службите на Општина Центар скоро една недела го собира сметот тука. Викендов, направивме и дезинфекција, ги искречивме ѕидовите и поставивме канти за отпад откако утврдивме дека има само една од градот. И во населбата Крњево исто така, денеска не е исчистен сметот“, вели Герасимовски.

Општина Центар упатува апел до Комунална хигиена поажурно да работи, затоа што жителите во Центар секојдневно се јавуваат сметот да се исчисти.

Пратеникот на СДСМ, Борче Цветков, на денешната собраниска седница посветена на пратенички прашања упати прашање до министерот за економија и труд, Бесар Дурмиши, за тоа кој ќе понесе одговорснот во власта за дебаклот со мерките и така наречените „кошнички“ со што за осум месеци ги доведе граѓаните до работ на егзистенцијален колапс. Високи цени, погрешни мерки и стагнација на платите.

„Неспособноста и несериозните мерки на власта, за осум месеци ги доведе граѓаните до работ на егзистенцијален колапс.

Колеги пратеници од власта, не знам дали сте свесни, но секоја ваша нова мерка за наводна заштита на стандардот на граѓаните, не само што е задоцнета, туку и нема допир со реалноста и со она што значи вистинска потреба на граѓаните.

Осум месеци си играте со граѓаните, со нивната егзистенција. Осум месеци водевте инает, не прифаќате туѓи предлози како да се справите со предизвикот на високите цени на прехранбените производи.

Ветувавте подобар живот за граѓаните, ветувате грижа за се што ги засега. Што направивте?#, праша Цветков.

Според него, цените наместо надолу, вртоглаво пораснаа.

„Заради тоа што со вашите мерки им дозволивте на трговците да печалат на грбот на граѓаните.
Ги оставивте граѓаните сами да се снаоѓаат и да си да го решат проблемот, да ги бојкотираат маркетите, во услови кога од тој што треба – власта, не добија никаква заштита.
Да биде апсурдот поголем, најлицемерно вие министре Дурмиши и премиерот Мицковски, истите вие што ги донесовте погрешните мерки, го поддржавте бојкотот. Со тоа го признавте неуспехот на погрешните мерки. Но, паралелно го признавте успехот на Владата на СДСМ за креирање на економски политики и мерки“, нагласи тој.

Ја коментираше и најновата мерка за замрзнување на маржите.

„Во состојба на безидејност, моравте да прикажете дека нешто работите, па најлесно ви беше да ја ископирате мерката од 2022 година.

Министре, и оваа мерка во дадениов момент ви е задоцнета, парцијална и ќе даде минорни и нецелосни ефекти, кои нема драстично да ги почувствуваат граѓаните … Потрошувачката кошничка нема да биде којзнае колку поевтина, оваа мерка нема целосна да го санира веќе оштетениот семеен буџет.

Со претходните мерки како што рече Владата веќе дозволила цените да достигнат плафон, а дополнително, платите не растат.

„Вашиот премиер Мицковски предлага маркетите да ги објавувале цените на нивните веб-сајтови, а граѓаните сами да си споредуваат.

Ова е поигрување и потценување на интелигенцијата на народот, народот што ве гласал. Каква корист имаат граѓаните од тоа што ќе ги гледаат и споредуваат цените. Наместо конкретни решенија вие нудите „рецепти за експериментиж. Граѓаните скапо ја плаќаат вашата неспособност“, подвлече тој.

Премиерот Христијан Мицкоски денеска одговарајќи на новинарско прашање во однос на ограничувањето на маржите и колкаво намалување на цените се очекува од таа мерка, изјави:

„Во текот на вчерашниот ден имавме седница на Владата на којашто од страна на министерот за економија и труд добивме исцрпен брифинг, но истовремено би рекол и дебрифинг од страна на извештајот којшто го има доставено Државниот пазарен инспекторат. Договоривме во најскоро време да се излезе со предлог.

Денеска се сретнавме, пред да дојдам овде во Кавадарци, бев во Собрание имаше пратенички прашања, нели според новиот деловник, опозицијата прашува ние одговараме, се сретнав со министерот, предлогот го имам веќе во работна верзија. Во текот на денот ќе се усогласува и очекувам на итна седница во текот на утрешниот ден истиот да биде донесен и да биде спроведен од страна на супермаркетите или хипермаркетите.

Маржата малопродажна и големопродажна се ограничува едната на 10 и другата на 10 проценти и очекувам тука да има, се разбира драматично намалување на цените на оние производи коишто вистински ги користат граѓаните. Тие се проширени со друг тип на производи коишто се за хигиена, исто така и бебешката храна е вклучена. Така што од тоа што можев да го видам, гледам дека речиси е сѐ опфатено, она што граѓаните го користат. Инаку оваа мерка ќе важи до 30 април, за понатаму ќе видиме како ќе се одвиваат работите“, кажа Мицкоски.

Појасни дека истовремено е донесен и заклучок, за кој како што рече наидува на потсмев кај некои од опозициските гласноговорници и опозициските партии.

„Да сите, би рекол супермаркети или хипермаркети на своите веб страни транспарентно, на дневна основа ги ажурираат цените. Ако сега влезете не можете да прочитате кои се цените на производите.

Е сега дали тоа ќе има некаков ефект, тоа е пракса во некои од земјите во светот, ако во еден ланец маркети, еден производ чини Х парички, а во друг чини Х половина парички, тогаш како консумент јас ќе се подзамислам од каде да го купам тој производ, но и тоа ќе создаде своевидна на конкуренција на едните со другите.

И третиот заклучок беше, министерот за економија и труд да свика работна средба и координација со сите институции како што е Комисијата за заштита на конкурентноста, Државниот пазарен инспекторат итн, сите оние коишто се значајни, да излеземе повторно на терен и да ја прошириме малку акцијата, да видиме и на други трговски супер или хипермаркети во делот на белата техника, како сето ова функционира“, нагласи Мицкоски