Македонија
ВМРО-ДПМНЕ повторно за донациите од Туфекџиќ и Богоевски на СДСМ

ВМРО-ДПМНЕ повторно се прашуваат зошто СДСМ молчи за донациите од граѓанските активисти, Ивана Туфекџиќ и Павле Богоевски, кои на последните избори станаа пратеници од СДСМ.
„СДСМ/Сорос и нивните мегафони молчат за донацијата од 118.000 денари кои невработениот студент Ивана Туфекџиќ му ги даде на аболицираниот криминалец Зоран Заев. Оваа квази-граѓанска активистка парите во висина од 40 студентски стипендии наместо да ги донира кон граѓански организации, ги донираше на политичката партија за чиј интерес се претставуваше како студентски активист и дел од платеничката насилна шарада на СДСМ/Сорос“, се вели во партиското соопштение.
Велат дека СДСМ/Сорос и мегафоните молчат и за донацијата од 184.000 денари кои соросовиот платеник Павле Богоевски ги донираше на сметка на СДСМ. Богоевски на улица се шеташе со уста полна со термини како правда и независно граѓанство, а парите ги даде на аболициран криминалец за чиј интерес демолираше и уништуваше споменици. Како заслуга за вандализмот во служба на СДСМ/Сорос се најде на нивната пратеничка листа.
Порачуваат дека на сите им е јасно дека Туфекџиќ и Богоевски, исто како и Лидија Димова и ред други квази-активисти се само слепи послушници на нивниот ментор Владе Милчин кој преку ден се претставуваше како невладин сектор, а навечер блудничеше во прегратките на СДСМ./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МНР ја демантира партијата Левица: Паушални и целосно неточни наводи кои не соодветствуваат со фактичката состојба

Министерството за надворешни работи и надворешна трговија категорично ги демантира неточните информации изнесени од страна на политичката партија „Левица“, поврзани со работењето на Конзулатот на Република Северна Македонија во Њу Џерси.
„Станува збор за паушални и целосно неточни наводи кои не соодветствуваат со фактичката состојба. Воедно, ја информираме јавноста дека дипломатско-конзуларното претставништво функционира со редовно работно време и е целосно на располагање за сите услуги и потреби на македонската дијаспора во Соединетите Американски Држави“, велат од Министерството.
Македонија
Перински во Зелениково: Инвестирањето во локални проекти е основа за подобар квалитет на живот

Во рамките на иницијативата „Каде што срцето е дома“, министерот за локална самоуправа, Златко Перински, денеска ја посети Општина Зелениково, каде што одржа работна средба со градоначалникот Коста Маневски и членовите на општинскиот Совет. Средбата беше искористена за размена на идеи и ставови во однос на актуелните предизвици со кои се соочува општината, но и за планирање на идни чекори за понатамошен развој и напредок на локалната самоуправа. Фокусот беше ставен на најважните приоритети за подобрување на животните услови на жителите и за унапредување на инфраструктурата.
Една од темите што беше разгледана беше предлогот за измена и дополнување на Законот за локална самоуправа. Министерот Перински истакна дека оваа измена ќе донесе значајни подобрувања во управувањето на сите општини, со зголемена отчетност и транспарентност, што ќе овозможи поефикасни услуги за граѓаните. Според министерот, измените ќе ги зајакнат општините и ќе им овозможат да се справат со предизвиците со кои се соочуваат, создавајќи подобри услови за живот.
Општина Зелениково, која се наоѓа во јужниот дел на Скопската котлина и ја сочинуваат 14 населени места со рурален карактер, сериозно го насочува својот фокус на подобрување на патната инфраструктура. На првиот владин повик за поддршка на инфраструктурни општински проекти, на Општината и беа одобрени три проекти, а на вториот повик, таа аплицираше за седум проекти.
Министерот Перински нагласи дека Владата ќе продолжи да ги поддржува локалните самоуправи и да инвестира во нив што е од големо значење за остварување на заедничките цели за создавање на пофункционални и современи локални заедници. Поддршката од Владата, како што беше нагласено, претставува значителен фактор за успешната реализација на инфраструктурни проекти и за обезбедување на континуиран развој на сите општини и региони. Таа со засилен интензитет ќе продолжи и во иднина во насока на создавање пофункционални општини кои овозможуваат подобро секојдневие за сите.
Македонија
Речиси третина од фирмите чии лиценци ќе се одземаат имаат блокирана сметка или се неактивни, според истражувањето на Центарот за граѓански комуникации

Центарот за граѓански комуникации го објави истражувањето за фирмите коишто се на списокот што го објави Министерството за транспорт и врски за одземање на нивните лиценци за градежно работење и урбанистичко планирање, а по спроведените контроли и трагичниот настан во Кочани.
Иако на списокот на фирми на коишто ќе им се одземат лиценци за градежно работење и урбанистичко планирање што го објави Министерството за транспорт и врски има 479 фирми, всушност лиценци ќе им се одземат на 426 фирми, бидејќи на списокот има некои фирми што се повторуваат, а други на коишто им се одземаат по неколку лиценци.
Истражувањето за фирмите на коишто ќе им се одземат лиценци за градежно работење и урбанистичко планирање што го објави Министерството за транспорт и врски, покажува дека на фирмите ќе им се одземаат 11 различни видови лиценци. Вкупно ќе бидат одземени 471 лиценца.
Истражувањето открива дека:
– Лиценци ќе им се одземат на 426 фирми, бидејќи од 479-те фирми на списокот има некои што се повторуваат, а други на коишто им се одземаат по неколку лиценци.
– На фирмите ќе им се одземаат 11 различни видови лиценци, а вкупно ќе бидат одземени 471 лиценца.
– За најголем дел од фирмите, лиценците што ќе им се одземат не се услов за фирмите да работат и да добиваат државни тендери.
– Во моментов, само 49 од фирмите што се на листата за одземање лиценци имаат актуелни договори за јавни набавки во вкупна вредност од 26 милиони евра.
– Сепак, само 23 фирми кои имаат важечки договор за јавна набавка всушност ќе ја загубат лиценцата којашто била услов за добивање на тендерот. Овие фирми имаат вкупно 58 договори за јавна набавка, чија вкупна вредност изнесува 14 милиони евра.
– Од сите фирми на списокот, 101 има добиено тендер во последните три години, во вкупна вредност од 77 милиони евра.
– 28 % од фирмите за одземање лиценца се со блокирана сметка или се правно или деловно неактивни, а останатите фирми се активни.
– Приходи оствариле 85 % од фирмите во вкупна годишна вредност од 128 милиони евра (за 2023 година која е последната година за којашто има објавено податоци).
– Најголем дел од фирмите остваруваат ниски годишни приходи. Секоја трета (31 %) од фирмите има годишен приход помал од 15 илјади евра, додека приходи поголеми од 1 милион евра имаат само 33 фирми, односно 8 %.
– Во сите овие фирми работат 2188 луѓе. 4 % од овие фирми немаат вработен, а 3 % имаат само еден вработен. Со повеќе од 10 вработени се само 3 % од фирмите.