Македонија
(Видео) ВМРО-ДПМНЕ: Поканата за лидерска средба дополнително ќе се анализира

За денот и локацијата на лидерската средба органите на партијата дополнително ќе анализираат и ќе биде одлучено во согласност со агендата на лидерот Христијан Мицкоски, рече портпаролот на ВМРО-ДПМНЕ, Димче Арсовски, на новинарско прашање дали партијата ќе прифати лидерска средба в петок во 14 часот во Клубот на пратениците, на која денеска повика премиерот Зоран Заев. Тој го повтори ставот на Мицкоски дека единствена тема на евентуалната лидерска средба би требало да бидат предвремени избори.
„Ние сме децидни дека на таа лидерска средба како прво и единствено прашање за кое мора да се разговара се предвремени парламентарни избори. Во однос на денот и времето и локацијата дополнително ќе биде анализирано во органите на партијата и ќе биде одлучено во согласност со агендите на претседателот и временските можности“, рече Арсовски.
Тој рече дека најпрвин на таа лидерска средба мора да се разговара за предвремени парламентарни избори, а веднаш потоа може да се разговара за сè друго.
„Значи, прва и единствена точка на разговор треба да биде предвремени парламентарни избори“, рече Арсовски.
Тој рече дека кај Зоран Заев во денешното обраќање се видело дека нема расположение за избори и дека тој, како што рече, едноставно бега од избори со самото тоа што кажал дека може да се разговара за изборниот модел, меѓутоа да не бидат притисок предвремените парламентарни избори.
„Со самото тоа тој покажува дека се плаши и бега од избори од проста причина, како што знаете, целата јавност е сведок на големата корумпираност на неговото давење во скандали, на најкорумпираната Влада во моментот, на наместени тендери, на лични провизии итн., така што единствен во моментот што бега од избори е Зоран Заев и тој самиот го потврди тоа“, рече Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.
Македонија
Судијата за врски на Франција за балканскиот регион во посета на Јавното обвинителство

Јавниот обвинител на Република Северна Македонија Љупчо Коцевски денеска се сретна со францускиот амбасадор Кристоф Ле Риголер, на средба за претставување на новоназначениот судија за врски на Република Франција за регионот Сирил Лакомб.
Тој е еден од вкупно 20 судии за врски на Франција во светот, а од државниот обвинител Коцевски се информираше директно за состојбите во обвинителството. Притоа, судијата за врски Лакомб понуди поддршка со оперативна и техничка помош, но и експертиза преку француските правосудни органи.
Бидејќи и самиот бил јавен обвинител и лице за врски на Република Франција со Европравда, Лакомб се интересираше и за постапката за делегирање на обвинителот за врски на Република Северна Македонија во оваа меѓународна институција.
Јавниот обвинител Коцевски, од своја страна, изрази благодарност за континуираната француска поддршка за работата на Јавното обвинителство.
Македонија
Камион излета од магистралниот пат Деве Баир – Крива Паланка, сообраќајот во прекин

Од 17:10 часот магистралниот пат Деве Баир – Крива Паланка кај место викано Самоков е во прекин за сите возила во двата правци поради собраќајна незгода. Товарно моторно возило излетало од патот и на самиот пат има расврлани метални предмети кои ги превезувало, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.