Македонија
ВМРО-ДПМНЕ пред конечна одлука за референдумот – Секој да постапи по сопствен избор

Секој граѓанин да постапи по свое убедување за референдумот на 30 септември, ова е пораката што јавноста најверојатно ќе ја слушне вечерва од седиштето на опозициската ВМРО-ДПМНЕ. Раководството на партијата во текот на денот одржува средби со пратеничката група на ВМРО-ДПМНЕ, а за попладнево се закажани состаноци на Извршниот и на Централниот комитет.
Неофицијално, пораките што партискиот лидер Мицкоски ги упати во говорот од протестниот марш во Кичево се насоките околу кои се движат размислувањата на мнозинството во ВМРО-ДПМНЕ.
„Кој е Христијан Мицкоски да му каже на народот што треба да прави? Да се обидува да го замајува со скапи маркетиншки трикови и странски пиар-советници, кој ми го дал мене ова право?“, рече Христијан Мицкоски на 3 септември од Кичево.
Сепак, дел од членството, актуелни и поранешни функционери на партијата, не ги следат официјалните партиски насоки. Членови на раководството на партијата јавно повикуваат да се излезе да се гласа на референдумот, а пратеникот Антонио Милошоски активно води кампања за бојкот.
Официјалниот став за референдумот ВМРО-ДПМНЕ досега повеќепати одложуваше да ѝ го соопшти на јавноста, иако е познато дека не се согласува со начинот на кој е формулирано референдумското прашање, како и дека се против на договорот со Грција. Овие ставови лидерот Мицкоски им ги соопштил и на странските дипломати што деновиве беа во посета на Македонија во знак на поддршка за референдумот. Мицкоски лично и на германската канцеларка Меркел ѝ кажал дека добиле навигација од средбите со граѓаните и конечената одлука за референдумот ќе ја соопштат неделава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Срамно и безидејно е да се глуми после војна, генерали“, реагираат од „Идеа лаб“ на обвинувањата од СДСМ

По екстремно успешно организираниот Европски младински олимписки фестивал, за кого добивме потврда лично од претседателот на Европскиот олимписки комитет, политичките превирања не престануваат да ја дезинформираат јавноста со небулози, велат од ПР-агенцијата „Идеа лаб“, по прес – конференцијата на Јовица Јанковиќ од СДСМ кој кажа дека владата немала пари за младите на олимпијада ама имала за ПР агенции на власта.
„Имено, денеска на прес-конференција политичката партија СДСМ излезе со податок дека нашата агенција е ангажирана за промоција на фестивалот со финансиски надомест од Министерството за спорт, што е апсолутна невистина. Имено, точно е дека бевме ангажирани во делот на промоција на фестивалот, но ангажманот го добивме од Македонскиот олимписки комитет и тоа во делот на: промоција на настанот на социјални мрежи, изработка и координација на фан зоните, координација и организација на церемонија на отворање, затворање и церемонии на доделување медали“, се наведува во реакцијата.
Од „Идеа лаб“ велат дека за истиот ангажман на месечно ниво, доставува фактури до МОК за испорачаните услуги.
„Срамно и безидејно е да се глуми после војна, генерали. За фестивалот споменат на денешната прес-конференција добивме лично признание од Спирос Капралос, за најдобра одржана церемонија на отворање од 1991 година до денеска. Наместо да се зборува тоа, во медиумите, се шират лаги и невистини. Кога веќе некој решил да ни прави бесплатна реклама, можеше да спомене дека и во 2023 година, работевме на „Преспа Форум Дијалог“, кога партијата која денеска нѐ прозива, а тогаш беше на власт, нѐ ангажираше преку Министерството за надворешни работи. Во 2021 година Идеа Лаб работеше на проекти за Општина Аеродром кога локалната власт беше во рацете на партијата која денеска одржа небулозна прес-конференција. Искрено, Ве замолувам да не нè вмешувате во вашите политички превирања. Ние сме комерцијален субјект и за нашиот ангажман е неважна политичката определба, туку резултатите кои ќе ги испорачаме пред клиентот“, изјави Димитар Атанасовски, управител на ПР и маркетинг агенцијата „Идеа Лаб“.
Македонија
Муртезани – Брн: Проширувањето мора да остане кредибилен процес заснован на заслуги

Министерот за европски прашања на Северна Македонија, Орхан Муртезани, денеска оствари билатерална средба со министерот за европски прашања на Ирска, Томас Брн, кој престојува во работна посета на Скопје.
Средбата беше проследена со заедничка прес-конференција на која министрите упатија силна заедничка порака во поддршка на процесот на проширување на Европската Унија и европската перспектива на Северна Македонија.
Министерот Муртезани истакна дека проширувањето на Унијата е прашање на заедничка безбедност, стабилност и визија, и дека Северна Македонија останува доследно посветена на спроведување на реформите и на воспоставување на европски стандарди.
Притоа подвлече дека процесот мора да биде заснован на заслуги и ослободен од билатерални условувања, како предуслов за зачувување на кредибилитетот на европската интеграција.
„За нас, европската интеграција не е само надворешно-политичка цел, туку длабоко внатрешна трансформација. Нашиот фокус останува на реформи, резултати и јасна посветеност кон европските вредности,“ изјави Муртезани.
Од своја страна, министерот Брн го поздрави напредокот на Северна Македонија и изрази силна поддршка за нејзиниот пат кон полноправно членство во ЕУ. Тој нагласи дека Ирска има позитивно искуство од членството, кое ја зајакнало нејзината култура, јазик и меѓународна позиција.
„За Ирска, тоа што седиме на масата на ЕУ и што сме дел од одлуките е од големо значење. Верувам дека и Северна Македонија, но и сите граѓани и ваши и наши, како и сите граѓани на Унијата, ќе имаат придобивки од овој процес,“ истакна Брн.
Министерот Брн информираше дека Ирска ќе го преземе претседавањето со Советот на Европската Унија во средината на 2026 година, при што го посочи проширувањето како еден од приоритетите во рамки на нивното претседателство.
Министрите се согласија дека е од клучна важност граѓаните да ги препознаат придобивките и конкретните резултати од европскиот процес, и дека тоа бара заедничка посветеност, искрен дијалог и фер услови.
Македонија
Хуманитарен музички настан на Споменикот на слободата во Кочани

На први и втори август ќе се одржи хуманитарен музички настан Расплет фестивал, на Споменикот на слободата во Кочани, организиран од млади луѓе меѓу кои и бендот Корка од Кочани.
Главна цел на настанот е да се подигне свеста дека донациите не треба да се намалат и дека се потребни исто како уште првите денови на формирањето на Support Kocani.
„Донациите стивнуваат. Ние сме овде да ве потсетеме дека донациите не смеат да запрат, бидејќи им се најпотребни на повредените кои чекаат за нив, од кои некои директно се вклучени во фестивалот за нивна повторна социјализација. Причината за дводневното времетраење е за да може да се привлече поголемо внимание кон Кочани и сите засегнати од трагедијата и да се собере што можно поголем број на донации. Вториот дел од настанот (сабота 02/08/2025) ќе започне покасно, да се остави простор на мировниот марш, кои ние со сè срце го подржуваме, учествуваме и повикуваме луѓе да земаат учество и надвор од Кочани“, велат организаторите.
Тие наведуваат дека целиот настан е посветен нa Сара Јорданова, нивна драга пријателка и соученичка која го загуби својот живот во пожарот, но и кон сите други засегнати.
На сцената ќе настапат артисти како Хајка, Taxi Consillium, Корка, Алембик, Јаблан, Don Playa, Луфтанза, Соба Глувих, Големата Вода, Mallard и DJ Gianni.