Македонија
ВМРО-ДПМНЕ ја известила меѓународната заедница дека можни кандидати за уставни судии се членови на политичка партија
Двајцата можни кандидати за членови на уставниот суд – Цветанка Иванова од СДСМ и адвокатот Талески од Битола, исто така од СДСМ, го прекршуваат членот 111 од Уставот доколку бидат предложени и избрани за судии во Уставниот суд. Ова го истакна пратеникот Антронијо Милошоски, кој соопшти дека пратеничката група ги известила меѓународните фактори, особено делегацијата на Европската Унија дека функцијата на судија во Уставниот суд е неспоива со членување во политичка партија.
„Иванова и Талески најмногу што направиле е што се истакнале во нивното членство во СДСМ. Затоа сметаме дека ова би претставувало не само партизација, туку и заевизација на Уставниот суд. Во време кога Македонија е на ниското 111. место поради корупцијата, со многу лоши оцени, меѓу другото и поради партизацијата на важни државни институции, не смееме да дозволиме заевизација на Уставниот суд. Од друга страна, еден од кандидатите коишто се предложени, Цветанка Иванова, освен што е партиски активна, таа не го исполнува критериумот на истакнат правник. Таа дипломирала на правен факултет, но нема ниту еден стручен и научен труд, ниту, пак, каква било пракса во правосудни или други органи кои се занимаваат со примената на правото за да може да се смета дека е истакнат правник“, рече Милошоски.
Пратеникот истакна дека очекува позитивна реакција од владејачкото мнозинство и меѓународниот фактор.
ВМРО-ДПМНЕ апелира до владејачкото мнозинство, не само со пратениците во Собранието, туку и со јавноста да ги сподели сите оние личности коишто поднеле писмо за намери да бидат третирани како можни кандидати за уставни судии. Според партиските сознанија на ВМРО-ДПМНЕ, таква желба пројавиле најмалку неколку квалификувани судии со долгогодишен, децениски стаж во нивната работна кариера.
„За жал, владејачкото мнозинство сè уште ги крие овие имиња веројатно затоа што им е незгодно да направат споредба помеѓу кандидатите коишто се квалификувани за судии во Уставниот суд и партиските членови коишто тие сметаат дека треба да бидат послушни на Зоран Заев во Уставниот суд“, додаде Милошоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Чаир, Бутел и Шуто Оризари
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 11.00 часот корисниците од дел од улицата Бајрам Шабани и дел од улицата Чаирска, општина Чаир;
· во периодот од 09.00 до 10.00 часот корисниците од објектите околу Фитофарм-Визбегово, општина Бутел;
· во периодот од 09.00 до 12.00 часот корисниците позади бензинската ОКТА во Шуто Оризари, општина Шуто Оризари.
Македонија
Делови од Карпош и Шуто Оризари денеска без вода
Од ЈП Водовод и Канализација известуваат дека денеска поради уличен дефект на улицата Демирхисарска бр 13 прекинато водоснабдување ќе имаат корисниците од улицата Демирхисарска, од 17:30 часот до завршување на дефектот, општина Шуто Оризари.
Од ЈП Водовод и Канализација исто така известуваат дека денеска поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхломска, општина Карпош.
Водоснабдувањето ќе биде прекинато од 09:00 часот до завршување со работните активности.
Македонија
Утрото постудено и магливо, преку денот сончево со мала до умерена облачност
Утрото постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Времето во наредните денови
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла.

