Македонија
ВМРО-ДПМНЕ ја повика Владата да ја ревидира листата на производи со зголемено ДДВ

Пратеникот од ВМРО-ДПМНЕ, Бојан Стојаноски, на денешната прес-конференција ја повика Владата уште денес да свика седница и да си ја коригира листата со производи и да ги врати со стапка на ДДВ од 5 %.
Во листата на производи што од денес ќе биде со 10 наместо со 5 % ДДВ се наоѓаат и прехранбени производи, кои се со замрзнати цени до 30 ноември оваа година, рече Стојаноски.
„Значи, министрите во неколку дена за едни исти производи ги замрзнаа цените бидејќи се основни прехранбени производи, а во исто време ги ставија и на листа на луксузни производи. Има ли капетан на бродот или сидрото силно влече напред, ама кон дното?
Се обидовме да ги разубедиме колегите пратеници од СДСМ и ДУИ да не ги поддржат измените на законот за ДДВ предложени од Владата, но за жал нивната волја е киднапирана од извршната власт. Со измените на Законот се предвидува да ви се земат десетици милиони евра поради покачено ДДВ на храна“ изјави тој.
Стојаноски рече дека на листата нема перка од ајкули, месо од делфин, кит ама замрзнатите теста, млечни и сирни намази, сирење и урда, зденка, пармезан, ајдемер и гауда кашкавал, павлака за готвење, растителните сирења и намази ќе бидат дополнително оданочени.
„Поскапи ќе бидат и лутеницата, цвеклото, фефероните, мајонезот, сите видови апетисани, компоти, конзервирана храна, полнети макарони, тортиљи и нудли станаа луксуз според Ковачевски, па народот ќе треба да ги плаќа поскапо. Поскапува и храната за децата, како гризот, овесните снегулки, муслите, сладоледот, еурокремот, сите видови бонбони, чипсот, сите чаеви, тропското овошје, сите видови сушено овошје, сусамот, сончогледот, инстант кафињата, наполитанките, црниот бибер, мастиките, најголем дел од зачините.
Ова се производи од секојдневието на секој од нас, кои власта одлучи да ги поскапи. Живее во време на двоцифрена инфлација изминативе две години, која е особено висока кај храната и надминува 30 %, а кај некои прехранбени производи и над 50 %“, порача пратеникот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Ангажираме лични асистенти во училиштата, плата 15.000 денари, вложуваме во инклузивно образование

Општина Центар и оваа учебна година ангажира лични асистенти за ученици со посебни образовни потреби во рамки на проектот „Образование за сите“.
Право на пријавување на јавниот повик имаат лица со завршено средно образование, а предност ќе имаат кандидати со високо образование од областа на наставата, психологијата, педагогијата, дефектологијата и социјалната работа, како и оние со претходно искуство во работа со деца со попреченост.
Избраните кандидати ќе работат по 20 часа неделно, со месечен надоместок од 15.000 денари.
Градоначалникот на општина Центар Горан Герасимовски истакна дека личните асистенти се клучни за успешен инклузивен образовен процес.
„Нашите асистенти им помагаат на учениците полесно да се адаптираат и функционираат во училишната средина. Тоа многу значи, не само за децата, туку и за родителите и наставниците. Морам да потенцирам дека сме единствена општина во Скопје што, и покрај сите предизвици, продолжува самостојно, од свој буџет, да го спроведува овој проект“, рече Герасимовски.
Јавниот повик е отворен пет работни дена, а пријавувањето се врши во Архивата на Општина Центар, барака 6, секој работен ден од 9 до 15 часот.
Македонија
Одвоени средби на министерот Муцунски со министрите за надворешни работи на Словенија и Словачка

На маргините на Бледскиот стратешки форум, министерот за надворешни работи и надворешна трговија, Тимчо Муцунски, оствари одвоени средби со министерката за надворешни и европски работи на Република Словенија, Тања Фајон, и со министерот за надворешни и европски работи на Република Словачка, Јурај Бланар.
Во фокусот на разговорите беа регионалната соработка и стабилноста, како и билатералните односи. Соговорниците го нагласија силниот потенцијал и подготвеноста за нивно понатамошно продлабочување.
На двете средби беше потврдено сојузништвото во рамките на НАТО Алијансата. Воедно, стана збор и за реформските процеси, европските аспирации на нашата држава, предизвиците на тој пат и континуираната поддршка од Словенија и Словачка.
Македонија
„Дали службите за безбедност и разузнавање под водство на кадри на СДС го следеле и прислушкувале Мицкоски со знаење на обвинителот Коцевски“, прашува ВМРО-ДПМНЕ

„Злоупотребата на институциите во партиски и политички цели веќе е видено сценарио од СДС, поинаку тие и не знаат. Разликата во последниот случај е во тоа што ги злоупотребиле и ставија во служба на партијата едни од најзначајните институции кои треба да се грижат за безбедноста на граѓаните и државата, и тоа, поддржани и потпомогнати од судско обвинителската власт“, велат од ВМРО-ДПМНЕ.
„СДС на чело со Зоран Заев и Венко Филипче ги злоупотребиле Агенцијата за разузнавање и Агенцијата за национална безбедност за да го следат и прислушкуваат претседателот Христијан Мицкоски, новинари, бизнисмени, јавни личности.
Со цел хајка и политички прогон против ВМРО-ДПМНЕ и претседателот Мицкоски, како и замолчување на гласот на новинарите и уцена на бизнисмени во периодот од 2019-2024 година службите за безбедност и разузнавање работеле за СДС, наместо за државата.
Сознанијата кои ги имаме говорат дека претседателот Мицкоски неосновано бил ставен на оперативна обработка од страна на службите под водство на кадри од СДС, со единствена цел за политичка елиминација.
АНБ и АР водени од кадрите на СДС како Виктор Димовски, Заре Милошески и Еролд Муслиу ја следеле комуникацијата на претседателот Христијан Мицкоски, неговото движење и неговото делување.
Слободата на говорот, на движење и делување се загарантирани со закон и Устав за сите граѓани на Македонија, додека ваквиот начин на злоупотреба на виталните безбедносни институции за следење на политичкиот противник се методи кои ја заробуваат државата и се спротивни на сите закони и прописи.
Овој случај сериозно ја нарушуваат демократијата, но и безбедноста на државата и граѓаните и ваквите методи се крајно тоталитарни, несвојствени за западните развиени демократии.
Но она што од друга страна ја запрепастува македонската јавност е молкот на Јавното обвинителство, иако сите овие информации ги има во подетална форма поткрепени со факти и докази.
Бараме ЈО итно да отвори случај и да бара одговорност раководните лица на институциите во тој период, како и нивните политички наредбодавци во врвот на СДС.
Освен одговорност, очекуваме и одговори дали сегашниот главен јавен обвинител, Љупчо Коцевски бил одговорен да го следи издавањето на ПИМ мерките од 2019 до 2024 година?
Исто така треба да се одговори, кому и зошто му служеле прислушкуваните материјали и дали со добиените информации се тргувало со влијание, се замолчувале новинари и се уценувале бизнисмени?
Со сето ова веќе станува јасно зошто СДС не гласаше за разрешувањето на Коцевски, а можеби и главно обвинителската функција му е награда за сработеното со ПИМ мерките?
Од друга страна Венко Филипче е опкружен со истите луѓе кои прислушкувале и го злоупотребувале државниот систем и денес тие се дел од понудата на партијата“, соопшти ВМРО-ДПМНЕ.